ކުޑަކުދިންނަކީވެސް ޓެކްނޮލޮޖީއަށް އަހުލުވެރިވެފައިވާ ބަޔަކަށްވުން މުހިންމުކަމަށާއި، ބެލެނިވެރިން މިކަމަށް އިސްކަންދެއްވުމަށް ޕްރޮފެސަރ ޙަސަން އުގައިލް އިލްތިމާސްކުރައްވައިފިއެވެ.
އުގައިލް މިކަމަށް އިލްތިމާސްކުރެއްވީ، "ޒަމާނީ ހޯދުންތަކުގެ އަލީގައި ދަރިން ތަރުބިއްޔަތުކުރުން" މި މައުޟޫޢަށް ކިންޑަރ ޕްރީސްކޫލްން އިންތިޒާމްކޮށްގެން ބޭއްވި ލެކްޗަރއެއްގައި ވާހަކަދައްކަވަމުންނެވެ.
ޒަމާނީ ހޯދުންތަކުގެ އަލީގައި ކުދިން ތަރުބިއްޔަތުކުރުން، މިމަޢުޟުއަށް ވާހަކަދައްކަވަމުން ޕްރޮފެސަރ ޙަސަން އުގައިލް ވިދާޅުވީ މިޒަމާނުގައި ދަރިން ތަރުބިއްޔަތު ކުރާއިރު، ޒަމާނީ ވަސީލައްތައް ބޭނުން ކުރަން ޖެހޭކަމަށެވެ. އެހެންނަމަވެސް ކޮންމެ ކަމެއްގައިވެސް ހަރުދަނާ އުސޫލްތަކަކާއި، ވަކި ހައްދެއް ކަނޑައެޅިފައި އޮންނަން ވާނެކަމަށާ، ދަރިން ތަރުބިއްޔަތުކުރުމުގައިވެސް މިއުސޫލު ގެންގުޅެންޖެހޭކަމަށް އޭނާ ވިދާޅުވިއެވެ. ޢުގައިލް ވިދާޅުވީ ހަރުދަނާ ތަރުބިއްޔަތެއްގެ ބިންގާ އެޅުމައްޓަކައި ކަންކަން ތާވަލްކުރުން ވަރަށްމުހިންމު ކަމަށެވެ. އެގޮތުން ކަނޑައެޅިފައިވާ ތާވަލާއެއްގޮތަށް ކަންކަން ކުރުމަށް އާދަވާން ނަގާނީ އެމަސްދުވަހާއި ދެމަސްދުވަހުގެ މުއްދަތެއްކަމަށް ޢުގައިލް ވިދާޅުވިއެވެ.
"މީހާ ކަމަކަށް އަށަގަތުމަށް ގާތްގަނޑަކަށް ބޭނުންވާނީ 30 ދުވަހާއި 60 ދުވަހުގެ މުއްދަތެއް، ޖަލެއްގައި މީހަކު މިމުއްދަތައް އުޅެފިނަމަ، އެޖަލަކަށް އޭނާ އާދަވާނެ. އެގޮތުން މަޑުމަޑުން އެކުއްޖާ ތަރުބިއްޔަތު ކުރާނެގޮތް ވިސްނާ 30 ނުވަތަ 60 ދުވަހުގެ ޕްރޮގުރާމެއްބަހާލައިގެން ކުރިއަށްގެނދަންވީ، ކުޑަކުޑަ އެޗީވްމެންޓްތަކާއި އެކު މަޑުމަޑުންގޮސް ސަކްސެސްވަމުންގޮސް އެންމެ ފައިނަލް ސަކްސެސްއާއި ހަމަޔަށްދެވޭނެ" ޢުގައިލް ވިދާޅުވިއެވެ.
މި ފޯރަމުގައި ޢުގައިލްވަނީ ދަރިން ތަރުބިއްޔަތު ކުރުމުގައި ވިސްނަންޖެހޭ މުޙިއްމު ކަންތައްތަކާއި ގުޅޭގޮތުން ވަރަށް ތަފްސީލުކޮށް މަޢުލޫމާތުދެއްވަފައެވެ. އެގޮތުން ދަރިން ޒިންމާދާރު ކުރުވުމަށް ކުރެވިދާނެ ކަންތައްތަކާއި، ދަރިންގެ އުޅުމާއި އަޚްލާޤް ބައްޓަންކުރުރާނެގޮތް ބެލެނިވެރިނާއި ހިއްސާކުރައްވާފައިވެއެވެ.
ދޮޅުގަޑިއެއްހާއިރަށް ކުރިއަށްދިޔަ މި ފޯރަމްގައި ބައިވެރިވި ޢާއްމުންވަނީ އުގައިލާ ސުވާލުކޮށް މަޢުލޫމާތު ހޯދާފައެވެ.