ފެނަކައިން ކަރަންޓު ދެމުން އަންނަ ށ. ނަރުދޫ އިންޖީނުގޭގައި ހިނގި އަލިފާނުގެ ޙާދިސާއެއްގައި އެރަށުން މިއަދު ކަރަންޓު ކެނޑިފައި އޮތުމަށްފަހު ވަގުތީ ގޮތުން އެރަށަށް ކަރަންޓު ދީފިއެވެ.
ޕީއެސްއެމްއަށް މަޢޫލޫމާތު ދެއްވަމުން ފެނަކައިގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ މިއަދު ހަވީރު 5:30 ހާއިރު ވަގުތީގޮތުން މުޅި ރަށަށް ކަރަންޓު ދީފައިވާ ކަމަށެވެ. ވަގުތީ ގޮތުން ކަރަންޓް ދީފައިވަނީ އެ އިންޖީނުގޭގައި ހުރި 80 ކިލޯވޮޓްގެ ޖަނަރޭޓަރަކުންކަމަށް ޝަރީފް ވިދާޅުވިއެވެ. އަދި އެ އަތޮޅު ފޭދޫން 128 ކިލޯވޮޓްގެ ޖަނަރޭޓަރެއް މިރޭ އެ ރަށަށް ގެންގޮސް މިރޭ ފަތިހުގެ ކުރިން ދާއިމީ ޙައްލު ހޯދޭނެ ކަމަށް ފެނަކައިން ބުނެއެވެ.
img:http://s3.psmnews.mv/images/660x400/14912110721030.jpg|ނަރުދޫ އިންޖީނުގެ- ފޮޓޯ: ސޯޝަލް މީޑިއާ
ނަރުދޫ އިންޖީނުގޭގައި އަލިފާނުގެ ޙާދިސާއެއް ހިނގީ މިއަދު މެންދުރު 12:00 ހާއިރުއެވެ. އަލިފާނުގެ ހާދިސާ ހިނގިއިރު އެރަށަށް ކަރަންޓު ދިނުމަށް ފެނަކައިން ބޭނުންކުރަމުން އައީ 80 ކިލޯވޮޓްގެ ދެ ޖަނަރޭޓަރާއި 50 ކިލޯ ވޮޓްގެ އެއް ޖަނަރޭޓަރެވެ. މިޙާދިސާގައި 50 ކިލޯ ވޮޓްގެ ޖަނަރޭޓަރު ވަނީ ބޭނުން ނުކުރެވޭ ވަރަށް ހަލާކުވެފައެވެ. އަދި 80 ކިލޯވޮޓްގެ އެއް ޖަނަރޭޓަރުވެސް ވަނީ ވަރަށް ބޮޑަށް މަރާމާތު ކުރަންޖެހޭ ވަރަށް ހަލާކުވެފައެވެ.
މި ޙާދިސާ ހިނގުމާއެކު އިންޖީނުގެއިން ކަރަންޓް ކަނޑާލައި، ނަރުދޫ ރައްޔިތުންގެ އެހީތެރިކަމާއެކު ކުޑަ ވަގުތުކޮޅެއްގެ ތެރޭގައި އަލިފާން ނިއްވާލެވުނު ކަމަށް ފެނަކައިން ބުނެއެވެ.
ނަރުދޫ އިންޖީނުގޭގައި ހިނގި އަލިފާނުގެ ޙާދިސާ މޯލްޑިވްސް ޕޮލިސް ސަރވިސްއިން މިހާރު ގެންދަވަނީ ތަޙުޤީޤް ކުރައްވަމުންނެވެ.