ބޮލީވުޑްގެ މަޝްހޫރު ތަރި ސަލްމާން ޚާނާ އެނާގެ އާއިލާގެ ގިނަ ބަޔަކު ރާއްޖޭގައި ޗުއްޓީ ހޭދަކޮށްލުމަށްފަހު އެނބުރި ޤައުމަށް ގޮސް އާއްމުކުރި ރާއްޖޭގެ ރީތި ފޮޓޯތަކަށް އިންޑިއާގެ މީޑިއާގެ ސަމާލުކަން ހުއްޓިއްޖެއެވެ. ސަލްމާނާ އޭނާގެ ޢާއިލާގެ ގިނަ މެންބަރުން ރާއްޖެ އައިސްފައިވަނީ މިދިޔަ ހަފްތާގެ ބުދަދުވަހުއެވެ.
ފަތުރުވެރިންގެ މެދުގައި އެންމެ މަޤްބޫލް ޓޫރިސްޓް މަންޒިލެއްގެ ގޮތުގައި ރާއްޖެ މަޝްހޫރުވެފައިވާއިރު ހޮލީވުޑާއި ބޮލީވުޑްގެ މަޝްހޫރު ތަރިންނާއި މަޝްހޫރު ކުޅިވަރު ތަރިން ޗުއްޓީ ހޭދަކުރުމަށް ގިނަ ޢަދަދަކަށް ރާއްޖެ އަންނަމުންދެއެވެ.
އަމިއްލަ ފުށި ރިސޯރޓްގައި ސަލްމާނާއި އޭނާގެ އާއިލާގެ މެމްބަރުން ޗުއްޓީގައި ނަގާފައިވާ ފޮޓޯތައް ވަނީ އިންސްޓަގްރާމްގައި އާއްމުކޮށްފައެވެ. ރާއްޖޭގެ ރީތީކަން ފެނިގެންދާ މި ފޮޓޯތައް އާއްމުކުރުމާއެކު އިންޑިއާގެ މީޑީއާތަކުގައި މި ފޮޓޯތައް ވަނީ ދައުރުވާން ފަށާފައެވެ.
އިންޑިއާގެ ނޫސްތަކުގައި ލިޔެފައިވަނީ، ސަލްމާންގެ އައިލާ ރާއްޖެއަށް ދެވުމާއެކު، އަރާމުކުރުމަށް ވަގުތުތައް ދުއްވާނުލާ ރާއްޖޭގެ ރީތި ހިތްގައުމުކަން ބަލާލުމަށް ތަން ތަނަށް ޒިޔާރަތްކުރުމުގައި ހޭދަކޮށްފައިވާކަމަށެވެ. އަދި ސަލްމާންގެ އައިލާއިން އާއްމުކޮށްފައިވާ ފޮޓޯތަކުން ރާއްޖޭގެ ޤުދުރަތީ ރީތި ދޮންވެލި ގޮނޑުދޮށްތަކާއި ނޫވިލު ފަޅުތައްގެ ހިތްގައިމު މަންޒަރުތައް ފެންނަކަމަށެވެ. އަމިއްލަފުށީގައި ޗުއްޓީ ހޭދަކުރުމަށްފަހު ސަލްމާންގެ ކޮއްކޮ އަރުބާޒު އާއްމުކޮށްފައިވާ ފޮޓޯތަކުގައި ރާއްޖެއަށް ތަޢުރީފްކޮށްފައިވެއެވެ. އެގޮތުން އެމީހުންގެ ޗުއްޓީ ދުވަސްވަރު ރާއްޖެއިން ލިބުނު މެހްމާންދާރީއާއި ޚިދުމަތް ފާހަގަކޮށްފައިވެއެވެ.
ސަލްމާން އޭނާގެ ޢާއިލާއާއެކު ރާއްޖެ އައިސްފައިވަނީ ކޮއްކޮ އަރްޕިތާ ޚާންގެ ދަރިފުޅު އާހިލްގެ ފުރަތަމަ އުފަންދުވަސް ފާހަގަކުރުމަށެވެ. ރާއްޖެއައި އެ އާއިލާގެ މެމްބަރުން ތެރޭގައި އަރްބާޒް ޚާން އާއި އޭނާގެ ކުރީގެ އަންހެނުން މަލައިކާ އަރޯރާ ޚާންގެ އިތުރުން މަލައިކާގެ ކޮއްކޮ އަމްރިތާ އަރޯރާވެސް ހިމެނެއެވެ. މީގެއިތުރުން ސަލްމާންގެ ބައެއް ރައްޓިވެހިންވެސް މި ދަތުރުގައި ބައިވެރިވެފައިވެއެވެ.
މަޝްހޫރު ތަރި ސަލްމާން ޚާން ރާއްޖޭގައި ޗުއްޓީ ހޭދަކޮށްފައިވާއިރު މަޝްހޫރު ޚާނުންގެ ތެރޭގައި ހިމެނޭ އާމިރު ޚާންވެސް ވަނީ މިދިޔަ މަހު ރާއްޖޭގައި ޗުއްޓީ ހޭދަކޮށްފައެވެ.