މިނިސްޓްރީ އޮފް ހެލްތާއި ވޯލްޑް ހެލްތު އޯގަނައިޒޭޝަން، ޑަބްލިއު.އެޗް.އޯ ގުޅިވަޑައިގެން "ގްލޯބަލް ހެލްތު ޑިޕްލޮމަސީ ޓްރެއިނިންގ" ގެ ނަމުގައި މިމަހުގެ 13 ވަނަ ދުވަހުން މިއަދުގެ ނިޔަލަށް ބޭއްވެވި މަސައްކަތު ބައްދަލުވުމުގައި، ޞިއްޙީ ވުޒާރާއާއި، އެ ވުޒާރާގެ ދަށުން ހިންގާ ޞިއްޙީ އެކި ޚިދްމަތްދޭ އިދާރާތައް ހިމެނޭ ގޮތަށް ޖުމްލަ 35 މުވައްޒަފުން ބައިވެރިވިއެވެ.
މިއީ، ދިވެހި ރާއްޖެއިން ބައިވެރިވާ ޞިއްޙީ ދާއިރާގެ ބައިނަލްއަޤްވާމީ ބައްދަލުވުންތަކުގައި ބައިވެރިވާ ޞިއްޙީ ދާއިރާގެ މުވައްޒަފުން ތަމްރީންކުރެއްވުމަށާއި، އެފަދަ ބައްދަލުވުންތަކަށް ރާއްޖެއިން ހުށަހަޅާ ހުށަހެޅުންތަކުގެ ފެންވަރު ރަނގަޅުކުރެއްވުމާއެކު، ބައްދަލުވުންތަކުގެ ބޭނުން އެންމެ އެދެވޭ ގޮތެއްގައި ހިފުމުގެ ހުނަރުތައް މުވައްޒަފުންނަށް ދަސްކޮށްދިނުމަށް ބޭއްވެވި ބައްދަލުވުމެކެވެ. ބައްދަލުވުމުގެ ބައިވެރިން ބުނީ، މި ތަމްރީންގެ ސަބަބުން ބައިނަލްއަޤުވާމީ އަދި ސަރަޙައްދީ ބައްދަލުވުންތަކަށް ތައްޔާރުވުމަށާއި، އެފަދަ ބައްދަލުވުންތަކުގައި މަޝްވަރާތައް ކުރިޔަށްގެންދާނޭ ގޮތްތައް ދަސްވިކަމަށެވެ.
"ޑަބްލިއު.އެޗް.އޯގެ ބައްދަލުވުންތަކުގައި އަޅުގަނޑުމެން ހުށަހަޅާ އެއްޗަކަށް ބިނާކޮށް އެހީތެރިކަން ފޯރުކޮށްދެނީވެސް. މިތަމްރީނުގެ ސަބަބުން އަޅުގަނޑުމެންނަށް ވޯލްޑް ހެލްތު އެސެމްބްލީއާއި އަދި ރީޖަނަލް ކޮމިޓީގެ ބައްދަލުވުންތަކުގައި މަޝްވަރާ ކުރާނެގޮތް އެގިގެން ހިގައްޖެ." މި ތަމްރީނުގައި އެޗް.ޕީ.އޭއިން ބައިވެރި މުވައްޒަފަކު ކިޔައިދިނެވެ.
" ބައިނަލް އަޤްވާމީ އަދި ޞަރަޙައްދީ ބައްދަލުވުންތަކަށް އަޅުގަނޑުމެން ވަރަށް ގިނަ ޑޮކިއުމެންޓްސްތަކެއް އެބަ ހުށަހަޅަންޖެހޭ އަހަރުގެ އެކި ހިސާބުތަކުގައި. މިތަމްރީން ޕްރޮގްރާމުގައި މިފަދަ ޑޮކިއުމެންޓްތައް ލިޔާނޭ ގޮތް ދަސްކޮށްދީފި. ހަމަޔަޤީނުންވެސް ދެން އަޅުގަނޑުމެން ހުށަހަޅާ ލިޔުންތަކުން ބަދަލު ފެނިގެންދާނެ. މިއީ ނަތީޖާ ނެރުމަށް ލިބިގެންދިޔަ ރަނުގެ ފުރުޞަތެއް" ތަމްރީނުގައި ބައިވެރިވި ހެލްތު މިނިސްޓްރީގެ މުވައްޒަފަކު ކިޔައިދިނެވެ.
ބައްދަލުވުން ނިންމަވަލެއްވުމަށް ޕެރެޑައިސް އައިލޭންޑް ރިސޯޓްގައި ބޭއްވެވި ޙަފްލާގައި ބައިވެރިންނަށް ސެޓިފިކެޓް ޙަވާލުކޮށްދެއްވީ، ރާއްޖޭގައި ހުންނަވާ ޑަބްލިއު.އެޗް.އޯގެ މަންދޫބު އަރްވިންދް މާތުރެވެ. ޙަފްލާގައި ވާހަކަފުޅު ދައްކަވަމުން އަރްވިންދް މާތުރް ވިދާޅުވީ، ޞިއްޙީ ދާއިރާގެ މުވައްޒަފުންނަކީ ޤާބިލް ހުނަރުވެރި ބަޔަކަށް ހެއްދެވުމަށް، ދިވެހި ސަރުކާރުން ކުރައްވާ މަސައްކަތްތައް ބަލައިގަންނަކަމަށެވެ. އަދި އެޖަމްއިއްޔާޢިން އަބަދުވެސް، ރާއްޖެއަށް އެހީތެރިވުމުގައި ދެމިއޮންނާނެކަމަށް މާތުރު ވިދާޅުވިއެވެ.
" ރާއްޖެއިން ބައިނަލް އަޤްވާމީ މައިދާނުގައި ޞިއްޙީ ދާއިރާއިން ކުރިއެރުންތަކެއް ހޯދަމުން މިދަނީ. އަޅުގަނޑު ވަރަށް ފާހަގަކޮށްލަން ބޭނުން، ދިވެހި ސަރުކާރުން ޞިއްޙީ ދާއިރާގެ މުވައްޒަފުން ބިނާ ކުރުމަށް ކުރަމުންދާ މަސައްކަތްތައް. ޑަބްލިއު.އެޗް.އޯއިން އަބަދުވެސް ރާއްޖެއަށް އެހީތެރިވުމުގައި ދެމިތިބޭނަން. އަޅުގަނޑު އުންމީދުކުރަނީ ނިމިގެން މިދިޔަ ތަމްރީނުގެ ބައިވެރިން ލިބުނު ފުރުޞަތުގެ ބޭނުން ހިފައި، ބައިނަލް އަޤްވާމީ އަދި ޞަރަޙައްދީ ފެންވަރުގައި ހުނަރު ދައްކާލާ ނަތީޖާ ނެރުމަށް އިތުުރު ހިތްވަރަކާއެކު މަސައްކަތް ކުރާނޭކަމަށް" ރާއްޖޭގައި ހުންނަވާ ޑަބްލިއު.އެޗް.އޯގެ މަންދޫބް އަރްވިންދް މާތުރު ވިދާޅުވިއެވެ.
ޑަބްލިއު.އެޗް.އޯގެ ފަންނީ އެހީތެރިކަމާއެކު، ބޭއްވެވި މި މަސައްކަތު ބައްދަލުވުމުގައި ކިޔަވައިދެއްވީ ތައިލޭންޑްގެ ހެލްތު މިނިސްޓްރީގެ ކަމާގުޅޭ މާހިރުންނެވެ.