އަންނަ އޭޕްރިލްމަހު ބޭއްވުމަށް ހަމަޖެހިފައިވާ މޯލްޑިވްސް ކޮންސިއުމަރ ފެއަރ 2017ގެ ޕާޓްނަރުންނާއެކު ބްލެކް ޕްރައިވެޓް ލިމިޓެޑްއިން އެއްބަސްވުމުގައި ސޮއިކޮށްފިއެވެ.
ބްލެކް ޕްރައިވެޓް ލިމިޓެޑްއިން އިންތިޒާމްކުރާ މޯލްޑިވްސް ކޮންސިއުމަރ ފެއަރއަކީ ހޯލްސޭލް ވިޔަފާރިވެރިންނާއި ރީޓެއިލް ވިޔަފާރިވެރިންނާއި ސަޕްލަޔަރުންނާއި މެނުފެކްޓްޗަރުންނަށް ޚާއްޞަ ފެއަރއެކެވެ.
ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތެއްގައި ފެއަރގެ ސެކިއުރިޓީ ޕާޓްނަރެއްގެ ގޮތުގައި ކަނޑައަޅާފައިވަނީ އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ޕްރައިވެޓް ލިމިޓެޑެވެ. ޕްރިންޓިންގ ޕާޓްނަރއެއްގެ ގޮތުގައި ހަމަޖައްސާފައިވަނީ އެމް ސެވަން ޕްރިންޓެވެ. ސައުންޑް އެންޑް ލައިޓް ޕާޓްނަރަކަށް އިވެންޓް މޯލްޑިވްސް ހަމަޖައްސާފައިވާއިރު ޓެލެކޮމް ޕާޓްނަރއެއްގެ ގޮތުގައި ކަނޑައަޅާފައިވަނި ދިރާގެވެ. ރެންޓަލްސް ޕާޓްނަރެއްގެ ގޮތުގައި ހަމަޖެއްސީ ޝޭޑީ ކެބިން ރެންޓަލްސްއެވެ. މި އިވެންޓުގެ މީޑިއާ ޕާޓްނާރުންނަކީ އަވަސް އޮންލައިން އަދި ސަން އޮންލައިންއެވެ.
ބްލެކް ޕްރައިވެޓް ލިމިޓެޑުން މެނޭޖިންގ ޑިރެކްޓަރ އިސްމާޢީލް ހުޝާމް ވިދާޅުވީ، މި ފެއަރގައި ބައިވެރިވުމުގެ ފުރުޞަތު މާޗުމަހުގެ 15 ވަނަ ދުވަހުގެ ނިޔަލަށް ހުޅުވާލާފައިވާކަމަށެވެ.
img:http://s3.psmnews.mv/images/660x400/14871421808546.jpg|ކޮންސިއުމަރ ފެއަރގެ ޕާޓްނަރުންނާއެކު ސޮއިކުރުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
"މިފަހަރުގެ އެންމެ ބޮޑު އެކްސްޕެކްޓޭޝަނަކީ އެއް އަހަރު ނިންމާލާއިރު ދެން ފެށޭއަހަރެއްގައި އިތުރު އެކްޓިވިޓީސްތަކާއިއެކު އިތުރު ޙަރަކާތްތަކާއި އިތުރު ބޭފުޅުން ބައިވެރިވަޑައިގަންނަވާނެ ގޮތެއް ހެދުން. އަޅުގަނޑުމެން މިދިޔަ އަހަރު ކޮންސިއުމަރ ފެއަރ ބޭއްވީ ނޭޝަނަލް އާރޓް ގެލަރީގައި. އިރާދަކުރެއްވިޔާ މިފަހަރު ދަރުބާރުގޭގައި މިކަންކަން ބޭއްވުމަށް ރޭވިގެން މިދަނީވެސް އެއަށްވުރެއް ލާރޖަރ ސްކޭލްއެއްގައި. އެހެންވީމަ އަޅުގަނޑުމެން މިދިޔައަހަރަށްވުރެ 3 ގުނަ ބޮޑުކޮށް މިފަހަރު ޓާރގެޓްކޮށްގެން މިއުޅެނީ" އިސްމާޢީލް ހުޝާމް ވިދާޅުވިއެވެ.
މޯލްޑިވްސް ކޮންސިއުމަރ ފެއަރގައި ދައްކުވައިދޭނީ ޢާންމުކޮށް ގޭތެރޭގައި ގެންގުޅޭ ސާމާނާއި އިލެކްޓްރޯނިކް އިކުއިޕްމަންޓާއި ކާބޯތަކެތީގެ ބާވަތްތަކާއި އަލަށް މާކެޓަށް ނެރުމަށް ހަމަޖެހިފައިވާ އުފެއްދުންތައްކަމަށް ބްލެކް ޕްރައިވެޓް ލިމިޓެޑުން ބުނެއެވެ.
މިފަހަރުގެ ފެއަރއަށް ޒިޔާރަތްކުރާ މީހުންގެ މެދުގައި ކޮންމެ ގަޑިއަކު އެއްފަހަރު ލަކީޑްރޯ ނެގުމަށް ހަމަޖެހިފައިވެއެވެ. އަދި ކޮންމެ ދުވަހަކު ގްރޭންޑް ޕްރައިޒް ވިނަރއެއް ހޮވުމަށްވެސް ހަމަޖެހިފައިވެއެވެ.
މިއީ މޯލްޑިވްސް ކޮންސިއުމަރ ފެއަރ ބާއްވާ 5 ވަނަ ފަހަރެވެ. ތިންދުވަހުގެ މުއްދަތަށް ބާއްވާ މި ފެއަރ ބޭއްވުމަށް ހަމަޖެހިފައިވަނީ ދަރުބާރުގޭގެ ރަންނަބަނޑޭރި މާލަމުގައެވެ.