ޓެކްނިކަލް އެންޑް ވޮކޭޝަނަލް އެޑިއުކޭޝަން ޓްރެއިނިންގ އޮތޯރިޓީ، ޓިވެޓުން މިއަހަރު އައު ދާއިރާއަކުން ޒުވާނުން ތަމްރީނުކުރައްވަން ފުރުޞަތު ހުޅުވުމަށް ނިންމަވައިފިއެވެ.
ޓިވެޓް އޮތޯރިޓީން ވިދާޅުވީ، މިއަހަރު އަލަށް ޒުވާނުން ތަމްރީނު ކުރެއްވުމަށް ފުރުޞަތު ހުޅުވާލެއްވުމަށް ހަމަޖެހިފައިވަނީ އެއާރޕޯޓު ރެޕުންގެ ގޮތުގައި މަސައްކަތްކުރަން ބޭނުންވާ ޒުވާނުންނަށް ކަމަށެވެ. ޕީއެސްއެމަށް ދެއްވި އިންޓަރވިއުއެއްގައި ޓިވެޓް އޮތޯރިޓީގެ އެސިސްޓެންޓް ޑިރެކްޓަރ އަލީ ރިޔާޒް ވިދާޅުވީ، އެއާޕޯޓު ރެޕުންގެ އިތުރުން ޓޫރިޒަމް އިންޑަސްޓްރީގެ ތަފާތު އެކި ކޯސްތަކަށްވެސް ފުރުޞަތު ހުޅުވާލެއްވުމަށް ހަމަޖެހިފައިވާ ކަމަށެވެ. މި ކޯސްތަކަށް ލެވެލް 3 އަދި 4 ފުރިހަމަކޮށްފައިވާ ކޮންމެ ޒުވާނަކަށް ކުރިމަތިލެވޭނެ ކަމަށާއި ކޯސްތަކަށް ކުރިމަތިލުމުގެ ފުރުޞަތު ހުޅުވާލާނެ ތާރީޚް ފަހުން ހާމަކުރައްވާނެ ކަމަށެވެ.
''އާންމުކޮށް މިއިންނަނީ ލެވެލް 3 އަދި 4 ފުރިހަމަކޮށްފައި ހުންނަ ކޮންމެ ޒުވާނަކަށް ކުރިމަތިލެވޭނެ. ލެވެލް ތިނެކަކީ ގްރޭޑް 7 އަދި ލެވެޓް ހަތަރަކީ ޖީސީއީ އޯލެވެލް 3 ފާސް އޮވެގެން ބައިވެރިވެވޭނެ'' އަލީ ރިޔާޒް ވިދާޅުވިއެވެ.
ޓިވެޓް އޮތޯރިޓީން ކުރިއަށް ގެންދަވާ އެކި ޕްރޮގްރާމްތަކުގައި މިއަހަރު 1387 ޒުވާނަކު ކޯސް ފުރިހަމަކުރަމުންދެއެވެ. މީގެ ތެރޭގައި ނާރސިންގާއި، ފޮޓޯގްރަފީއާއި، ފާމަސިސިންޓުންނާއި، ކޭޝިއަރ އަދި ޓޫރިޒަމް ދާއިރާގެ އެކި ކޯސްތައް ހިމެނެއެވެ. img:http://s4.psmnews.mv/images/660x400/14850769834439.jpg|ޓިވެޓް އޮތޯރިޓީން ހިންގަވާ ތަމްރީނުތަކުން ތަމްރީނެއްގެ ބައިވެރިން - ފޮޓޯ: ޓިވެޓް އޮތޯރިޓީ
ޓިވެޓް އޮތޯރިޓީން މިދިޔަ އަހަރު ހިންގި އެކި ކޯސްތައް 1708 ދަރިވަރަކު ފުރިހަމަކުރިއެވެ. ޓިވެޓް އެތޮރިޓީން ގެންދަވަނީ ރާއްޖޭގެ އެކި ސިނާޢަތަށް ބޭނުންވާ ހުނަރުވެރި ޒުވާނުން ބިނާކުރެއްވުމަށް ތަފާތު ކޯސްތައް ހިންގަވަމުންނެވެ. އެޑިއުކޭޝަން މިނިސްޓްރީގެ ދަށުން ހިންގަމުން އަންނަ ޓެކްނިކަލް އެންޑް ވޮކޭޝަނަލް އެޑިއުކޭޝަނަލް ޓްރެއިނިންގ އޮތޯރިޓީ، ޓިވެޓް އޮތޯރިޓީ ސަރުކާރުން އުފައްދަވާފައިވަނީ 2011 ވަަނަ އަހަރުއެވެ.