އިންދިރާ ގާންދީ މެމޯރިއަލް ހޮސްޕިޓަލް- އައި.ޖީ.އެމް.އެޗްގެ އައި.ސީ.ޔޫގައި ތިބޭ ބަލި މީހުންގެ ގާތަށް ޒިޔާރަތްކުރާ ގަޑިއަށް ބަދަލުގެންނަވައިފިއެވެ.
އައި.ޖީ.އެމް.އެޗްގެ ޑިރެކްޓަރ ޕަބްލިކް ރިލޭޝަން އެންޑް މީޑިއާ އަޙްމަދު މައުސޫމް ވިދާޅުވީ އައި.ޖީ.އެމް.އެޗުން އެކުލަވާލެއްވި އައު އުޞޫލުގެ ދަށުން މިހާރު އައި.ސީ.ޔޫގައި ތިބޭ ބަލި މީހުންގެ ގާތަށް ޒިޔާރަތް ކުރެވޭނެ ވަގުތެއްގެ ގޮތުގައި ކަނޑައަޅުއްވާފައިވަނީ ހަވީރު 5:00 އިން ފެށިގެން އިރުއޮއްސި 6:00 ޖެހުމާހަމައަށްކަމަށެވެ. މިގެންނެވި ބަދަލާއެކު ބަލިމީހާ ކައިރިޔަށް ޒިޔާރަތް ކުރެވޭނީ ގިނަވެގެން ދެމީހުންނަށް ކަމަށްވެސް މަޢުސޫމް ވިދާޅުވިއެވެ.
"އައިސީޔޫގައި ތިއްބަވާނީ ދިފާއީގޮތުން ބާރު ދެރަ މީހުންކަމަށް ވާތީ އާއި ވަދެވަޑައިގްނަނަވާ މީހުންނަށްވެސް ކޮންމެ ވަރައްގެ ނުރައްކަލެއް އޮވޯ... ބޭނުމެއްނުވޭ އައި.ސީ.ޔޫއަށް ބޭފުޅުން ވަދެ ނުކުމެހަދާކަށް. އާންމު އުސޫލެއްވަނީ ކަނޑއަޅާފައި. އުސޫލާ އެއްގޮތަށް އައި.ސީ.ޔޫގެ ޙިދުމަތް ފައްޓަވާފައިވަނީ" މައުސޫމް ވިދާޅުވިއެވެ.
މީގެ ކުރިން އައިޖީއެމްއެޗްގެ އައިސީޔޫގައި ތިބޭ ބަލިމީހުންނަށް ޒިޔާރަތް ކުރާ ގަޑިއަކީ ހެނދުނު އެގާރައިން ބާރަށް އަދި ހަވީރު ފަހަކުން ހަޔަކަށެވެ.
އިންދިރާގާނދީ މެމޯރިއަލް ހޮސްޕިޓަލް- އައި.ޖީ.އެމް.އެޗުގެ އައި.ސީ.ޔޫގެ ޙިދުމަތް ތަރައްޤީކުރެއްވުމަށްޓަކައި ސަރުކާރުން ކުރައްވަމުންގެންދަވާ މަސައްކަތްޕުޅުގެ ތެރެއިން މިހާރު ވަނީ ޒަމާނީ ވަޞީލަތްތަކާއެކު އައު އައި.ސީ.ޔޫއެއް ތަރައްޤީކުރައްވާ ޙިދުމަތް ދެއްވަން ފަށްޓަވާފައެވެ. އަލަށް ހުޅުވި އައި.ސީ.ޔޫއަށް ބަލިމީހުން ބަދަލު ކުރައްވައި، އެތަނުގައި ޙިދުމަތް ދެއްވަން ފަށްޓަވާފައިވަނީ މިދިޔަ ހޮނިހިރުދުވަހުއެވެ. މިއައި.ސީ.ޔޫއަކީ ޖާގައިގެގޮތުން ތަނަވަސް އައި.ސީ.ޔޫއެކެވެ. ކުރިން ހުރި އައިސީޔޫއަކީ 8 އެނދުގެ އައިސޫޔޫއެކެވެ. އެހެންނަމަވެސް އަލަށް ހުޅުވި މި އައިސީޔޫގައި 15 އެނދު ހުންނާނެކަމަށް އައިޖީއެމްއެޗުން މަޢުލޫމާތުދެއްވައެވެ. އަދި އައި.ސީ.ޔޫ ތަރައްޤީކުރައްވާފައި ވަނީ ޒަމާނީ ވަސިލަތްތަކާއެކުކަންވެސް ފާހަގަކޮށްލެއްވެއެވެ. މީގެ އިތުރުން އައި.ސީ.ޔޫ ކައިރީގައި ބަލިމީހުންގެ އެހީތެރިން މަޑުކޮށްލާނެ ވެއިޓިން އޭރިޔާއެއް ވަނީ ހައްދަވާދެއްވާފައެވެ. އަދި އައި.ސީ.ޔޫ އާއި އެން.އައި.ވީ ޔުނިޓަށް ވަދެނުކުމެވޭނެ ގޮތަށް ބަލިމީހާގެ އެހީތެރިޔާއަށް އިލެކްޓްރޯނިކް ފާހެއް ދޫކުރައްވަން ވަނީ ނިންމަވާފައެވެ.