މަޖީދީމަގު 3 ވަނަ ސެގްމެންޓްގެ މަސައްކަތް ނިމި، ހަތަރުވަނަ ސެގްމެންޓުގެ މަސައްކަތް މިހާރު ކުރިއަށް ގެންދަވާއިރު، އަމާޒަކީ 21 ދުވަހުގެ ތޭރޭގައި 4 ވަނަ ސެގްމެންޓްގެ މަސައްކަތް ނިންމެވުން ކަމަށް ހައުސިންގ މިނިސްޓްރީން ވިދާޅުވެއްޖެއެވެ.
ނިމިގެން މިދިޔަ އަހަރުގެ ފަހުކޮޅު ސަރުކާކުން ފެއްޓެވި ޢުމްރާނީ ތަރައްޤީގެ މަޝަރޫޢުތަކުގެ ތެރެއިން އެއް މަޝްރޫޢަކީ މާލޭގެ މަގުތައް ރަނގަޅު ފެންވަރަކަށް ހެއްދެވުމުގެ އައު މަޝްރޫޢެކެވެ. މި މަޝްރޫޢުގެ ދަށުން މާލޭގެ 13 މަގެއް ތަރައްޤީ ކުރައްވަން ވަނީ ޓައިމްލައިން ކަނޑައަޅުއްވާފައެވެ.
މިދިޔަ ޑިސެމްބަރު މަހުގެ 28 ވަނަ ދުވަހު ވަނީ މަޖީދީ މަގުގެ 4 ވަނަ ސެގްމެންޓްގެ ޢަމަލީ މަސައްކަތް ފަށްޓަވާފައެވެ. 4 ވަނަ ސެގްމެންޓްގެ ގޮތުގައި ކަނޑައަޅުއްވާފައިވަނީ އޯޑިއޯނު ހުރި ބިމުން ފެށިގެން ޗާންދަނީމަގާއި ހަމަޔަށެވެ.
މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ ޙަސަން ރަޝީދު ވިދާޅުވީ މި ސެގްމެންޓުގެ މަސައްކަތް، މިހާތަނަށް ނިންމެވި ސެގްމެންޓްތަކާއި ވަރަށް ބޮޑަށް ތަފާތުވާނެ ކަމަށެވެ. އަދި މިއީ ގޯޅިތައް ގިނަ ކާރޫބާރޫ ބޮޑު ސަރަޙައްދަކަށް ވާތީ، މި ސެގުމެންޓް ހިމެނޭ ސަރަޙައްދު އެއްފަހަރާ ބަންދުކުރެއްވުމުގެ ބަދަލުގައި، މަސައްކަތް ކުރިއަށް ގެންދަވާނީ ބައިބަޔަށް ބައްސަވާލައްވައިގެން ކަމަށެވެ. ގައު އެތުރުމުގެ މަސައްކަތް ފަށްޓަވަން ހަމަޖެހިފައިވަނީ މަގުގެ ދެފަރާތުގެ ޕޭމަންޓް، ސައިޑުވޯކް ޓޭންކުތައް ފައްތާ ނިންމަވާލެއްވުމަށްފަހު ކަމަށްވެސް ހައުސިން މިނިސްޓްރީން ވިދާޅުވެފައިވެއެވެ.
"އެންމެ ގިނަބަޔަކު ބޭނުންކުރާ މަގު މީ، އެހެންކަމުން އަބަދުވެސް ހިނގާބިނގާވެ އުޅޭނެ، ގޭގެއަށް ވަންނަން ބޭނުންވާނެ. އެހެންކަމުން އެބޭފުޅުންގެ ރައްކާތެރިކަމަށްވެސް އަޅުގަނޑުމެން ވަރަށްބޮޑު ސަމާލުކަމެއް ދޭންޖެހޭ" ސްޓޭޓް މިނިސްޓަރ ޙަސަން ރަޝީދު ވިދާޅުވިއެވެ.
ސްޓޭޓް މިނިސްޓަރ އިތުރަށް ވިދާޅުވީ މި މަޝްރޫޢުގެ މަސައްކަތް ކުރިއަށް ގެންދެވުމަށް ކުރައްވާ މަސައްކަތަށް ޢާއްމުންގެ ފާރާތުން އެއްބާރުލުން ލިބިވަޑައިގަންނަވާ ކަމަށެވެ.
"މިއަދާއި ހަމައަށްވެސް މި މަސައްކަތް ކުރިއަށްދާއިރު ރައްޔިތުންގެ ފަރާތުން ލިބޭ އެއްބާރުލުމަށް، އުއްމީދު މިކުރަނީ ކުރިއަށް އޮތްތަނުގައިވެސް މިގޮތުގެ މަތިން ކުރިއަށްދާނެކަމަށް." ސްޓޭޓް މިނިސްޓަރ ޙަސަން ރަޝީދު ވިދާޅުވިއެވެ.
މަޖީދީމަގުގެ 4 ވަނަ ސެގްމެންޓްގެ މަސައްކަތް ކުރައްވާއިރު، އެންމެ ބޮޑު އިސްކަމެއް ދެއްވަނީ ޓްރެފިކަށް ދިމާވާ މައްސަލަތައް ވީހާ ކުޑަވާގޮތަށް މަސައްކަތް ކުރިއަށް ގެންދެވުމަށް ކަމަށެވެ. 21 ދުވަހުގެ ތެރޭގައި ސެގްމެންޓް 4 ގެ މަސައްކަތް ނިންމަވާލައްވާނެ ކަމަށް ހައުސިން މިނިސްޓްރީން ވިދާޅުވެއެވެ.