މިނިސްޓްރީ އޮފް ޖެންޑަރ އެންޑް ފެމެލީން ކުރިޔަށް އޮތް އަހަރު ހިންގަވަން ރާއްވަވާފައިވާ ބައެއް ޙަރަކާތްތައް މަދަނީ ބައެއް ޖަމްޢިއްޔާތަކާ ގުޅިވަޑައިގެން ހިންގެވުމަށް ހަމަޖައްސަވައިފިއެވެ.
އެ މިނިސްޓްރީން ހާމަކުރައްވާ ގޮތުގައި އަމިއްލަ ޖަމްޢިއްޔާތަކާ ގުޅިވަޑައިގެން ހިންގެވުމަށް ހަމަޖައްސަވާފައި ވަނީ، ޢިޖުތިމާއީ ރައްކާތެރިކަމާގުޅޭ މަސައްކަތްތަކެކެވެ. މިގޮތުން އަމިއްލަ ޖަމްޢިއްޔާތަކާ ގުޅިވަޑައިގެން ހިންގަވާ ބައެއް ޙަރަކާތްތައް ހިންގެވުމާބެހޭ އެއްބަސްވުންތަކެއް މިއަދު ވަނީ އެކަށައަޅުއްވާފައެވެ. އޭގެތެރޭގައި ހިމެނެނީ ސޮސައިޓީ ފޮރ ހެލްތް އެޑިއުކޭޝަން (ޝީ) އާއި އެޑްވޮކޭޓިންގ ދަ ރައިޓްސް އޮފް ޗިލްޑްރަން (އާކް) އާއި ރިޓަޔަރީޒް އެސޯސިއޭޝަން އޮފް މޯލްޑިވްސް (ރޭމް) އާއެކު ވެވުނު އެއްބަސްވުންތަކެކެވެ. img:http://s4.psmnews.mv/images/660x400/14817285571733.jpg|ޖެންޑަރ މިނިސްޓްރީން ޖަމްޢިއްޔާތަކާއެކު އެއްބަސްވުންތަކެއްގައި ސޮއިކުރައްވުމަށް ބޭއްވި ރަސްމިއްޔާތުގެ ތެރެއިން - ފޮޓޯ: ޕީއެސްއެމް
މި އެއްބަސްވުންތަކުގައި ޖެންޑަރ މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ޖެންޑަރ އެންޑް ފެމެލީ ޑރ. އަތާޢު ﷲ އަޙްމަދު ރަޝީދުއެވެ. ސޮސައިޓީ ފޮރ ހެލްތް އެޑިއުކޭޝަން ޝީއާ އެކުގައި ސޮއިކުރެއްވީ ދައުލަތުގެ ބެލެހެއްޓެވުމުގެ ދަށުގައި ދިރިއުޅޭ ކުޑަކުދިންނަށް ބޭނުންވާ ސައިކޯ ސޯޝަލް ސަޕޯޓް އިންޓަރވެންޝަން ޕްރޮގްރާމްތައް ދެމެހެއްޓެނިވި ގޮތެއްގައި ހިންގެވުމުގެ އެއްބަސްވުމެކެވެ. އެޑްވޮކޭޓިންގ ދަ ރައިޓްސް އޮފް ޗިލްޑްރަން، އާކްއާއެކު ސޮއިކުރެއްވީ ކުޑަކުދިންގެ ހައްޤުތައް ރައްކާތެރިކޮށް، ކުރިއެރުވުމަށް ތަފާތު ޙަރަކާތްތައް ހިންގުމާއި މަރުކަޒުތަކުގައި ދިރިއުޅޭ ކުދިނަށް ތަފާތު ޕޮރޮގްރާމްތައް ހިންގުމުގެ އެއްބަސްވުމެކެވެ. ރިޓަޔަރީޒް އެސޯސިއޭޝަން އޮފް މޯލްޑިވްސް، ރޭމްއާއެކު ސޮއިކުރެއްވީ ޢުމުރުން ދުވަސްވީ މީހުންގެ ޙައްޤުތައް ރައްކާތެރިކޮށް ކުރިއަރުވާ ހޭލުންތެރިކަން އިތުރުކުރުމުގެ މަސައްކަތްތައް ހިންގުމާބެހޭ އެއްބަސްވުމެއްގައެވެ.
މި އެއްބަސްވުންތަކުގައި ސޮއިކުރި ޖަމްޢިއްޔާތަކުން ވަނީ އިޖްތިމާޢީ ރައްކާތެރިކަމުގެ މަސައްކަތްތައް ކުރިއަށް ގެންދިއުމަށްޓަކައި މިނިސްޓްރީގެ ޕާރޓްނަރުންގެ ގޮތުގައި މަސައްކަތް ކުރާނެކަމުގެ ޔަޤީންކަން އެ ޖަމްޢިއްޔާތަކުން ދީފައިވެއެވެ. މި ރަސްމިއްޔާތުގައި ޖެންޑަރ މިނިސްޓްރީން، އަމިއްލަ ޖަމްޢިއްޔާތަކާއި ކުންފުނިތައް ގުޅިގެން މަސައްކަތް ކުރާނެ ދާއިރާތައް ކުރިމަގުގައި އިތުރަށް ފުޅާކުރުމަށް މަސައްކަތް ކުރައްވާނެ ކަމަށް ވިދާޅުވިއެވެ.