ސިވިލް ކޯޓުން ނިންމަވާ މައްސަލަތައް އިސްތިއުނާފްކުރައްވަން ބޭނުންވާ ފަރާތްތަކަށް، ނުރަސްމީ ގަޑިތަކުގައިވެސް އިސްތިއުނާފް ކުރެއްވޭނެ ކަމަށް އެ ކޯޓުން ވިދާޅުވެއްޖެއެވެ.
ސިވިލް ކޯޓުން ނެރުއްވި އިޢުލާނެއްގައި ވިދާޅުވެފައިވަނީ، ހައިކޯޓަށް އިސްތިޢުނާފަށް ފޮނުވުމުގެ މުއްދަތު ހަމަނެފައިނުވާ މައްސަލަތަކުގެ އިސްތިޢުނާފް ފޯމުތައް ރަސްމީގަޑީގައި، ނުވަތަ ކޯޓު ހުޅުވިފައި ހުންނަ ނުރަސްމީ ގަޑިތަކުގައި ބަލައިގަންނަ ގޮތަށް ހަމަޖައްސަވާފައިވާ ކަމަށެވެ. އެގޮތަށް އެކަން ހަމަޖެއްސެވީ އެ ކޯޓުން ރައްޔިތުންނަށް ދެވޭ ޚިދުމަތްތަކުގެ ތެރޭގައި ހިމެނޭ އިސްތިޢުނާފީ ފޯމު ބަލައިގަތުމުގެ ޚިދުމަތް ތަނަވަސް ގޮތެއްގައި ހަމަޖެހިފައި އޮތުމަކީ އެފަދަ ފަރާތްތަކަށް ބޭނުންތެރި ކަމަކަށް ވާނެތީ ކަމަށް ސިވިލްކޯޓުން ވިދާޅުވެއެވެ.
މިދިޔަ އަހަރުގެ ތެރޭގައި ސުޕްރީމް ކޯޓުން ކަނޑައެޅުއްވި އުޞޫލެއްގައި ވިދާޅުވެފައިވަނީ ކޯޓެއްގެ ނިންމުމެއް އިސްތިއުނާފަށް ހުށަހަޅަން ބޭނުން ނަމަ ހުށަހަޅަން ޖެހޭނީ އެ މައްސަލައެއް ނިންމެވި ކޯޓަކަށް ކަމަށެވެ. އޭރުން އެ ކޯޓަކުން އެ މައްސަލައިގެ ލިޔުންތައް ހައި ކޯޓަށް ފޮނުއްވާނެ ކަމަށް ވެސް އެ އުޞޫލުގައި ވިދާޅުވެފައިވެއެވެ.