އަންނަ މަހުގެ 1 ވަނަ ދުވަހުން ފެށިގެން "މޭޑް އިން މޯލްޑިވްސް" ލޯގޯ ބޭނުންކުރައްވަން ފެއްޓެވުމަށް އިކޮނޮމިކް މިނިސްޓްރީން ހަމަޖައްސަވައިފިއެވެ.
މޭޑް އިން މޯލްޑިވްސް ލޯގޯއަކީ މުދާ ގަންނަ ފަރާތްތަކަށް އެ މުދަލަކީ ރާއްޖޭގެ އުފެއްދުމެއްކަން އެނގޭގޮތް ހެއްދެވުމާއި، ރާއްޖޭގެ އުފެއްދުންތަކަށް އެކަށީގެންވާ އަގު ހޯއްދަވައިދެއްވުމަށާއި ރާއްޖޭގެ އުފެއްދުންތަކަށް މާކެޓް ހޯއްދަވައިދެއްވުމަށް މ ތަޢާރަފްކުރައްވާ ލޯގޯއެކެވެ.
މޭޑް އިން މޯލްޑިވްސް ލޯގޯގެ ސްކީމްގައި ބައިވެރިވާ ފަރާތްތަކުން އަމަލު ކުރަންޖެހޭ އުސޫލްތައް އަންނަ މަހުގެ އެއްވަނަ ދުވަހު ގެޒެޓު ކުރެވިގެންދާނެ ކަމަށާއި ގެޒެޓްކުރައްވާ ހިސާބުން ފެށިގެން މޭޑް އިން މޯލްޑިސް ލޯގޯ ދޫކުރައްވަން ފަށްޓަވާނެ ކަމަށް އިކޮނޮމިކް މިނިސްޓްރީން ހާމަކުރައްވައެވެ.
މޭޑް އިން މޯލްޑިވްސް ލޯގޯއާ ގުޅޭގޮތުން ޕީއެސްއެމްއަށް ދެއްވި އިންޓަރވިއުއެއްގައި އިކޮނޮމިކް މިނިސްޓަރުގެ ނާއިބް ޢަބްދުﷲ މުޙައްމަދު ވިދާޅުވީ، މި ލޯގޯ ތަޢާރަފްކުރެއްވުމުން ދިވެހި އުފެއްދުންތެރިންނަށް ބޮޑު ކުރިއެރުންތަކެއް ލިބޭނެ ކަމަށް ޤަބޫލްފުޅުކުރައްވާކަމަށެވެ.
ދިވެހި އުފެއްދުންތައް ތައްޔާރުކުރާ ހުރިހާ ފަރާތްތަކުން، މި ލޯގޯ ބޭނުންކުރުން ލާޒިމް ނުވާނެކަމަށްވެސް ޢަބްދުﷲ މުޙައްމަދު ވިދާޅުވިއެވެ.
"މޭޑް އިން މޯލްޑިވްސް" ލޯގޯ، ތަކެތި އުފައްދާ ފަރާތްތަކަށް ދޫކުރައްވަން ހަމަޖެހިފައިވަނީ ވަރަށް ކުޑަ އަގެއްގައިކަމަށާއި، ލޯގޯ ސްޓިކަރގެ އަގު އުޅޭނީ ދެ ލާރިއާއި ދިހަ ލާރިއާ ދެމެދުގެ އަގުތަކެއްގައިކަމަށް މީގެ ކުރިން އިކޮނޮމިކް މިނިސްޓްރީން ވަނީ ވިދާޅުވެފައެވެ.