8 މިލިއަން ރުފިޔާ ޚަރަދުކުރައްވައިގެން ށ. މިލަންދޫ ބަނދަރުގައި ތަރައްޤީ ކުރުމަށް ހަމަޖެހިފައިވާ "ދަތުރު ހިޔާ" ގެ ބިންގާ އަޅުއްވައިފިއެވެ.
މި ދަތުރުހިޔާގެ ބިންގާ އަޅުއްވާދެއްވާފައިވަނީ މިލަންދޫ އިޖްތިމާޢީ ކަންކަމުގައި އިސްކޮށް މަސައްކަތް ކުރައްވާ އިސްރަށްވެއްސެއް ކަމުގައިވާ ޢަބުދުﷲ ޢަބުދުއްރަޙްމާނާއި މިލަންދޫ ކުރީގެ ކަތީބު މުޙައްމަދު ޙަސަނެވެ.
80 ފޫޓް 40 ފޫޓްގެ މި ދަތުރުހިޔާ އިމާރާތްކުރުމަށް ހަމަޖެހިފައިވަނީ ދެ ބުރިއަށެވެ. މި ޢިމާރާތުގެ ފުރަތަމަ ފަންގިފިލާގައި ހުންނާނީ ދަތުރުވެރިންގެ މާރުކޭޓަކާއި މުދާ ރައްކާކުރާ ޚާއްސަ ބައެކެވެ. މި ޢިމާރާތުގެ ދެވަނަ ފަންގިފިލާ ޚާއްސަކުރެވިފައިވަނީ ޒަމާނީ ފެންވަރުގެ ރެސްޓޯރެންޓަކަށެވެ. މީ އެސް.ޖޭ ކޮންސްޓްރެކްޝަންގެ ހިލޭ އެހީގައި ށ. މިލަންދޫގައި ކުރިއަށްގެންދާ ޕްރޮޖެކްޓެއް ކަމަށް އެރަށު ކައުންސިލުން މައުލޫމާތު ދެއްވައެވެ. އަދި އަންނަ އަހަރުގެ މާރޗްމަހުގެ ތެރޭގައި އެތަނުގެ މަސައްކަތް ނިންމާލެވޭނެ ކަމަށްވެސް ށ. މިލަންދޫ ކައުންސިލުން މައުލޫމާތު ދެއްވައެވެ.