8 އަހަރަށްފަހު އެފްއޭއެމް އެވޯޑްސް، މިފަހަރު ފުޓްސަލްއަށް ވެސް އެވޯޑް ދޭނެ

8 އަހަރުގެ މެދުކެނޑުމަކަށްފަހު ބާއްވާ އެފްއޭއެމް އެވޯޑްސް ހަފްލާ، އަންނަ ބުރާސްފަތި ދުވަހުގެރޭ ބާއްވަން ނިންމައިފިއެވެ.

އެފްއޭއެމް އެވޯޑްސް އަކީ، ނިމިގެންދާ އަހަރު ރާއްޖޭގެ ފުޓުބޯޅަ އަދި ފުޓްސަލްގައި އެކިއެކި ގޮތްގޮތުން ފާހަގަކޮށްލެވޭ ކުޅުންތެރިންނާއި ކޯޗުން އަދި ޓީމުތަކުގެ ކާމިޔާބީ ފާޙަގަކޮށް، އެ ފަރާތްތަކުގެ އަގުވަޒަންކުރުމުގެ ގޮތުން ބާއްވާ ޚާއްސަ ޙަފްލާއެކެވެ.

މީގެ އަށް އަހަރުކުރިން 2018 ވަނަ އަހަރު މި އެވޯޑް ނައިޓް ބޭއްވި ފަހުން، އެކިއެކި ސަބަބުތަކާހުރެ މި އެވޯޑް ދީފައެއް ނުވެއެވެ. ފާއިތުވި މުއްދަތުގައި، ފުޓުބޯޅައިގެ އެންމެހާ ހަރަކާތްތައް ހުއްޓިފައި އޮތް ދުވަސްތަކާ ވެސް ރާއްޖެ ކުރިމަތިލާފައިވެއެވެ.

މިފަހަރުގެ އެފްއޭއެމް އެވޯޑްސްސްގައި އެންމެ ފާހަގަކޮށްލެވޭ ތަފާތު ކަމަކަށް ވެގެންދާނީ ފުރަތަމަ ފަހަރަށް އެންމެ މޮޅު ފުޓްސަލް ކުޅުންތެރިޔާއަށް އެވޯޑު ދިނުމެވެ. މިއީ ފުޓްސަލް ކުޅުންތެރިންގެ ކުޅުން ފާހަގަކޮށް، އެ ކުޅުންތެރިންގެ އަގުވަޒަންކޮށް މި ފެންވަރުގައި އެވޯޑުދޭ ފުރަތަމަ ފަހަރުކަން ފާހަގަކޮށްލެވެއެވެ.

މިފަހަރުގެ އެވޯޑު ހަފްލާގައި ދޭ އެވޯޑުތަކުގެ ތެރޭގައި:

• އެންމެ މޮޅު ފުޓުބޯޅަ ކުޅުންތެރިޔާ (ފިރިހެން)
• އެންމެ މޮޅު ފުޓުބޯޅަ ކުޅުންތެރިޔާ (އަންހެން)
• އެންމެ މޮޅު ފުޓްސަލް ކުޅުންތެރިޔާ
• އެންމެ މޮޅު ބިދޭސީ ކުޅުންތެރިޔާ
• އެންމެ އުންމީދީ ކުޅުންތެރިޔާ
• އެންމެ މޮޅު ގޯލްކީޕަރު
• އެންމެ ގިނަ ލަނޑު ޖެހި ކުޅުންތެރިޔާ
• މިދިޔަ ސީޒަންގެ އެންމެ މޮޅު ކޯޗު
• އެންމެ މޮޅު ރެފްރީ
• އެންމެ މޮޅު ކުލަބް
• އެންމެ މޮޅު ރީޖަނަލް ކުލަބް
• ސަޕޯޓަރުންގެ މެދުގައި އެންމެ މަގުބޫލު ކުޅުންތެރިޔާ

އެފްއޭއެމްގެ އަމާޒަކީ މިފަދަ އެވޯޑެއް މެދުވެރިކޮށް ދިވެހި ފުޓުބޯޅައާއި ފުޓްސަލްގެ ފެންވަރު މަތިކޮށް، ކުޅުންތެރިންގެ މެދުގައި ވާދަވެރިކަމާއި ހިތްވަރު އައުކުރުންކަމަށް އެ އެސޯސިއޭޝަނުން ބުނެއެވެ.

މީގެއިތުރުން، ކުޅިވަރުގެ ދާއިރާގައި ހަރަކާތްތެރިވާ ފަރާތްތަކުގެ މަސައްކަތް ބަލައިގަނެ، އެކަން ފާޙަގަކުރުމަކީ ދިވެހި ކުޅިވަރު ކުރިއެރުވުމަށް އެޅޭ މުހިންމު ފިޔަވަޅެއްގެ ގޮތުގައި އެފްއޭއެމް އިން ދެކެއެވެ.

އެފްއޭއެމް އެވޯޑްސް ނުވަތަ ފުޓުބޯޅަ އެސޯސިއޭޝަން އޮފް މޯލްޑިވްސް އިންދޭ ފުޓުބޯޅަ އެވޯޑު އެންމެފުރަތަމަ ދިނީ 2004 ވަނަ އަހަރުއެވެ.