އަމާޒަކީ ޒުވާން ޝޫޓަރުން އުފެއްދުން: ކެޕްޓަން ސަލާމް

ނެޝަނަލް ޝޫޓިން ސްޕޯޓްސް އެސޯސިއޭޝަން ޗެމްޕިއަންޝިޕް 2026ގެ ތެރެއިން އައު ހުނަރުވެރި ޝޫޓަރުންތަކެއް ފާހަގަކުރެވިގެންދާނެކަމަށާ، މުބާރާތަށްފަހު ޤައުމީ ސްކޮޑު އިތުރަށް ފުޅާވުމަކީ ކުރާ އުންމީދެއްކަމަށް ޝޫޓިން އެސޯސިއޭޝަނުން ބުނެފިއެވެ.

އަންނަ ނޮވެމްބަރުމަހުގެ ފުރަތަމަ ދުވަހު ފެށުމަށް ހަމަޖެހިފައިވާ މުބާރާތާ ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ޤައުމީ ޝޫޓިން ޓީމުގެ ފަރާތުން ކެޕްޓަން ޢަބްދުއްސަލާމް ބުނީ ޝޫޓިން އެސޯސިއޭޝަނުން ކުރަމުން އަންނަ އެންމެ ބޮޑު އެއް މަސައްކަތަކީ ހުނަރުވެރި ޒުވާން ޝޫޓަރުން އައިޑެންޓިފައިކުރުންކަމަށެވެ.

އެމަސައްކަތުގެ ދަށުން ޤައުމީ ޝޫޓިން މުބާރާތްތަކެއް ބާއްވަމުން އަންނައިރު، މިމުބާރާތްތަކުގެ ތެރެއިން އެފަދަ ހުނަރުވެރިން ފާހަގަވާކަމަށެވެ. އެހެންކަމުން ކުރިއަށް އޮތް ޤައުމީ މުބާރާތަށްފަހު އައު އެތުލީޓުންތަކެއް ޤައުމީ ސްކޮޑާ ގުޅޭނެކަމަށް ގަބޫލުކުރާކަމަށް ކެޕްޓަން ޢަބްދުއްސަލާމް ބުނެފަވެއެވެ. އަދި އައު ސްކޮޑާއެކު ކުރިއަށް އޮތް ސައުތު އޭޝިއަން ގޭމްސްއަށް ޓީމު ވަރުގަދަވެގެންދާނެކަމަށާއި، އަމާޒަކީ އެމުބާރާތުން މެޑައްޔެއް ޤައުމަށް ހޯދައިދިނުންކަމަށް ޢަބްދުއްސަލާމް ބުންޏެވެ.

"މުބާރާތަށް ހުޅުވާލުމުން ފުދޭވަރަކަށް ބޮޑު ތަރުހީބެއް ލިބެމުން އެބަދޭ. ކުރިއަށް އޮތްތަނުގައި މިބަލަނީ މިމުބާރާތުންވެސް ރަނގަޅު އެތުލީޓުން އަޅުގަނޑުމެންނާ ގުޅި، އަޅުގަނޑުމެން މިތައްޔާރުވާ ސައުތު އޭޝިއަން ގޭމްސްގައި ހަމަ ރަނގަޅު މެޑަލްއަކާ ހަމައަށް ދިއުން އަޅުގަނޑުމެންގެ އުންމީދަކީ" ކެޕްޓަން ޢަބްދުއްސަލާމް ބުންޏެވެ.

ނެޝަނަލް ޝޫޓިން ސްޕޯޓްސް އެސޯސިއޭޝަން ޗެމްޕިއަންޝިޕް 2026 ގައި ބައިވެރިވުމުގެ ފުރުސަތު ޝޫޓިން އެސޯސިއޭޝަން އޮފް މޯލްޑިވްސްއިން މިހާރުވަނީ އާންމުކޮށް ހުޅުވާލާފައެވެ. އަދި މުބާރާތުގައި ބައިވެރިވުމުގެ ސުންގަޑި އަންނަމަހުގެ 10 ވަނަ ދުވަހުގެ 23:59 އާއި ހަމައަށް އޮތްއިރު، މުބާރާތް ބޭއްވުމަށް ހަމަޖެހިފައިވަނީ ހުޅުމާލޭ ޝޫޓިން ރޭންޖްގައެވެ.

އަންނަމަހުގެ 05 ވަނަ ދުވަހުން ފެށިގެން މާލޭ ޝޫޓިން ރޭންޖާއި ހުޅުމާލޭ ޝޫޓިން ރޭންޖުގައި މުބާރާތުގައި ވާދަކުރާ ފަރާތްތައް މުބާރާތަށް ތައްޔާރުކުރުމުގެ ޓްރޭނިންތައް ކުރިއަށް ގެންދިއުމަށްވަނީ ހަމަޖައްސާފައެވެ. މީގެ އިތުރުން މިއަހަރުގެ ނެޝަނަލް ޝޫޓިން ސްޕޯޓް އެސޯސިއޭޝަން ޗެމްޕިއަންޝިޕް ކުރިއަށްދާނީ ޕެރަ އެތުލީޓުންވެސް ހިމަނައިގެންނެވެ.