ގްލޯބަލް ފަންޑްގެ މިޞަރަޙައްދުގެ ކޮންސްޓިޓުއެންސީ ބައްދަލުވުން ރާއްޖޭގައި ފެށިގެން ކުރިޔަށް އެބަދެއެވެ.
މާދަމާގެ ނިޔަލަށް ކުރިޔަށްދާ މިބައްދަލުވުމުގައި މިޞަރަޙައްދުގެ މެމްބަރު ހުރިހައި ޤައުމަކުން ބައިވެރިވެފައިވެއެވެ. ގްލޯބަލް ފަންޑަކީ، އެޗް.އައި.ވީ އެއިޑްސްއާއި މެލޭރިއާ އަދި ޓީބީއަށް ނައްތާލުމަށް ދުނިޔޭގެ ފެންވަރުގައި މަސައްކަތް ކުރުމަށް އެކުލަވާލާފައިވާ ޖަމްއިއްޔާއެކެވެ.
އެހެންކަމުން ދުނިޔޭގެ ޤައުމުތަކުން މި ބަލިތައް ނައްތާލުމަށް މާލީގޮތުން މި ޖަމާއަތުން އެހީތެރިވެދެއެވެ. ކޮންމެ އަހަރަކުވެސް، ދުނިޔޭގައި މިބަލީގެ ޙާލަތު މުރާޖައާކޮށް ފަންޑް ދިނުމާއި ދީފައިވާ ފަންޑްތައް ހޭދަކޮށްފައިވާ މިންވަރު ބެލުމަށް ގްލޯބަލް ފަންޑްގެ ދެ ބޯޑް ބައްދަލުވުމެއް ބާއްވައެވެ. އެގޮތުން ރާއްޖޭގައި މިއަދު ފެށި މިބައްދަލުވުމަކީ، މިއަހަރުގެ ނޮވެމްބަރު މަހު އޮންނަ ބޯޑް މީޓިންގއަށް ތައްޔާރުވުމުގެ ގޮތުން ދެކުނު އިރުމަތީ އޭޝިޔާގެ ޤައުމުތަކުން ބާއްވާ ބައްދަލުވުމެކެވެ.
ޞަރަޙައްދީ މި ބައްދަލުވުމުން ފަށްޓަވައިދެއްވީ ރާއްޖޭގެ ހެލްތު މިނިސްޓަރ ޢަބްދުﷲ ނާޒިމް އިބްރާހިީމެވެ. އެމަނިކުފާނުގެ ވާހަކަފުޅުގައި، ގްލޯބަލް ފަންޑުން ނައްތާލަން މަސައްކަތް ކުރާ ތިން ބަލި، ނައްތާލުމަށް ރާއްޖެއިން ކުރަމުންދާ މަސައްކަތްތަކަށް އަލިއްޅުއްވާލައްވާ، އިތުރު އެހީ މިކަމުގައި ރާއްޖެއަށް ބޭނުންވާ ކަމަށް މިނިސްޓަރ ވިދާޅުވިއެވެ.
ގްލޯބަލް ފަންޑުގެ ޞަރަޙައްދީ ބައްދަލުވުމުގެ ރިޔާސަތު މިފަހަރު ބަލަހައްޓަމުން ގެންދަނީ ރާއްޖެއިންނެވެ. އެގޮތުން މިފަހަރުގެ ބައްދަލުވުމުގެ ރިޔާސަތު ބަލަހައްޓަވަމުން ގެންދަވަނީ ރާއްޖޭގެ ކަންޓްރީ ކޯޑިނޭޓިންގް މެކޭނިޒަމްގެ ޗެއަރ އަޙްމަދު ޢައްފާލްއެވެ. ޕީ.އެސް.އެމަށް މަޢުލޫމާތު ދެއްވަމުން އައްފާލް ވިދާޅުވީ، މި ބައްދަލުވުމުގެ އަމާޒަކީ ދެކުނު އިރުމަތީ އޭޝިޔާގެ ޤައުމުތަކުން މިކަމުގައި ގެންގުޅޭ ވިސްނުން، އެއްގޮތްކޮށް ގްލޯބަލް ފަންޑްގެ ބޯޑާ ހަމަޔަށް ގެންދިއުން ކަމަށެވެ. އަދި ރާއްޖެއިންވެސް މި ބައްދަލުވުމުގެ ތެރެއިން މަސައްކަތް ކުރާނީ އެއްވެސް ޤައުމެއް ބާކީ ނުކޮށް، އެއްހަމަޔަކުން ހުރިހާ ޤައުމުތަކަށް ޢަމަލު ކުރެވޭނޭ ގޮތްތަކެއް ހަމަޖެއްސުމަށް ކަމަށެވެ.
ބައްދަލުވުން ފެއްޓެވުމަށް މިއަދު ބޭއްވި ރަސްމިއްޔާތުގައި ރާއްޖޭގެ ކަންޓްރީ ކޯޑިނޭޓިންގ މެކޭނިޒަމްގެ ބޭފުޅުންނާއި، ކަމާއި ގުޅުން ހުރި އެކި ދާއިރާތަކުން އިސް މަސްއޫލުވެރިން ބައިވެރިވަޑައިގެންނެވިއެވެ.