ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް އަށް އެކި ގޮތްގޮތުން އެހީތެރިވެދިނުމަށާއި، އެކި ދާއިރާތަކުން ގުޅިގެން މަސައްކަތް ކުރުމުގެ އެއްބަސްވުމެއްގައި ޕަބްލިކް ސަރވިސް މީޑާއިން ސޮއިކޮށްފިއެވެ.
މި އެއްބަސްވުމުގެ ދަށުން ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް އާއި ޕަބްލިކް ސަރވިސް މީޑިއާ ދެމެދު ފަތުރުވެރިކަމުގެ ދާއިރާއިން މީހުން ކުރިއެރުވުމާއި، މި ދާއިރާއަށް ދިވެހިން އަހުލުވެރިކުރުވުމަށް މަސައްކަތްކުރުމަށް ދެފަރާތުގެ ދެމެދުގައި އެއްބަސްވެފައިވެއެވެ.
ޕަބްލިކް ސަރވިސް މީޑިއާއިން ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް އާ އެކު ވެވުނު އެއްބަސްވުމުގެ މައިގަނޑު މަޤްޞަދަކީ ހޮސްޕިޓާލިޓީ އެންޑް ޓޫރިޒަމް ދާއިރާއިން މީހުން ކުރިއެރުމާއި ދިވެހިން މިދާއިރާއަށް އަހުލުވެރި ކުރުމަށް ދެފަރާތް ގުޅިގެން މަސައްކަތްކުރުމެވެ. އަދި އެފެކަލްޓީ ޕްރޮމޯޓް ކުރުމަށާއި، އެތަނުގައި ހިނގާ ކަންތައްތައް ޕްރޮމޯޓްކުރުވިގެންދާނެ. މި އެއްބަސް ވުމުގައި ޕީއެސްއެމްގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އިބްރާހިމް ޚަލީލު އަދި އެފްއެޗްޓީއެސްގެ ފަރާތުން ސޮއިކުރެއްވީ ފެކަލްޓީގެ ޑީން ޒީނާޒް ހުސައިން އެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަ ދައްކަވަމުން އެފްއެޗްޓީއެސްގެ ޑީން ޒީނާޒް ހުސައިން ވިދާޅުވީ މި އެއްބަސްވުމަކީ ވަރަށް މުހިންމު އެއްބަސްވުމެއްކަމަށާއި، މި އެއްބަސްވުމުގެ ސަބަބުން ޕީއެސްއެމް އާއި އެފްއެޗްޓީއެސްއާ ވަރަށް ގިން ގޮތްގޮތުން ގުޅިގެން މަސައްކަތްކުރެވިގެންދާނެ ކަމަށެވެ.
ޕީއެސްއެމްގެ މެނޭޖިންގ ޑިރެކްޓަރ އިބްރާހިމް ޚަލީލު ވިދާޅުވީ ޕީއެސްއެމްގެ ޗެނަލްތައް މެދުވެރިކޮށް ކުރި މަގުގައި އެފްއެޗްޓީއެސް އިން ހުރި ފުރުސަތުތަކާއި، ފެކަލްޓީގ ސަބަބުން ރާއްޖެއަށް ލިބެމުންދާ މަންފާތައް ވީހާވެސް ފުޅާދާއިރާއެއްގައި ރައްޔިތުންނަށް ވަކިން ޙާއްސަކޮށް ފެކަލްޓީއަށް ކިޔަވަން ޝައުގުވެރިކަން ހުންނަ ފަރާތްތަކަށް ފޯރުކޮށްދޭނެކަމަށެވެ. ޚަލީލު ވިދާޅުވީ ޕީއެސްއެމުން ފްރެންޗައިޒް ޝޯތައް ގެނެސްދޭން ފަށާފައިވާއިރު، މިފަދަ ޝޯތަކުގައި އޮފިޝަލް ޕާޓްނަރެއްގެ ގޮތުގައި އެފްއެޗްޓީއެސް ވެގެންދާނެކަމަށެވެ.
މި އެއްބަސްވުމުގެ ދަށުން ދެފަރާތް ގުޅިގެން ހޮސްޕިޓާލިޓީ އަދި ޓޫރިޒަމް ދާއިރާގެ ޕްރޮގްރާމްތައް އުފައްދާ ތައްޔާރުކުރުމާއި، ވަކިވަކި ޚާއްޞަ ޕްރޮޖެކްޓްތަކަށް ބަޖެޓް ހަދާ އެއަށްދާނެ ޚަރަދު އަދި ކުރާނެ ގޮތް އެނގޭނެގޮތަށް އެގްރީމެންޓެއްގެ ދަށުން ދެފަރާތްގުޅިގެން ކުރިއަށްގެންދިއުން ހިމެނެއެވެ. މި އެއްބަސްވުމަކީ އެއްއަހަރު ދުވަހުގެ މުއްދަތަކަށް ދެފަރާތުގެ ދެމެދުގައި ވެވުނު އެއްބަސްވުމެކެވެ.