ދެ ޤައުމަކަށް ސަފީރުން ޢައްޔަން ކުރެއްވުމުގެ މައްސަލަ ރައްޔިތުންގެ މަޖިލީހުގެ ދާއިމީ ކޮމިޓީއަށް ފޮނުއްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބޭރު ޤައުމުތަކަށް ރާއްޖެއިން ސަފީރުން ކަނޑައެޅުމަށްޓަކައި، ރިޕަބްލިކް އޮފް ސިންގަޕޫރަށް ދިވެހިރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް ޢައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވަނީ، ހ. މީނާޒް، ޙަމްދޫން ޢަބްދުﷲ ޙަމީދުގެ ނަންފުޅެވެ.
އަދި، ކިންގްޑަމް އޮފް ތައިލެންޑަށް ދިވެހިރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް ޢައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވަނީ، މއ.ރެސްޓިންގ ހައުސް، ފާޠިމަތު ޢިނާޔާގެ ނަންފުޅެވެ.
މި ނަންފުޅުތައް ދިރާސާކުރައްވާ ގޮތެއް ނިންމެވުމަށް ވަނީ ޤައުމީ ސަލާމަތުގެ ކޮމިޓީއަށް ފޮނުއްވާފައެވެ. އެއަށްފަހު މިއަދުގެ ޖަލްސާގައި ވަނީ 2 ބިލެއްގެ ފުރަތަމަ ކިއުން އިއްވަވާފައެވެ. މިބިލު ތަކަކީ، ކާށިދޫ ދާއިރާގެ މެމްބަރު ފައިޞަލް ނަޞީމް ހުށައަޅުއްވާފައި، ވަޒީފާއާބެހޭ ޤާނޫނަށް އިޞްލާޙު ގެނައުމުގެ ބިލާއި، ދިވެހިރާއްޖޭގެ ޓޫރިޒަމާބެހޭ ޤާނޫނަށް އިޞްލާޙު ގެނައުމުގެ ބިލެވެ.
މިއަދުގެ ޖަލްސާ ކުރިއަށް ގެންގޮސްފައިވަނީ ދިހަވަރަކަށް މިނެޓަށެވެ.