މޯލްޑިވްސް ޙައްޖު ކޯޕަރޭޝަނުން ތަޢާރަފްކުރައްވާފައިވާ މުވައްޒަފުންގެ ޙައްޖު ސްކީމްގައި ލޯކަލް ގަވަމަންޓް އޮތޯރިޓީ، އެލް.ޖީ.އޭއިން ބައިވެރިވެއްޖެއެވެ.
ޙައްޖު ސްކީމްގައި އެލް.ޖީއެއިން ބައިވެރިވިކަމުގެ އެއްބަސްވުމުގައި މިއަދު ވަނީ ސޮއިކުރައްވާފައެވެ. މިއެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ލޯކަލް ގަވަރމަންޓް އޮތޯރީޓީގެ ނައިބު ރައީސް މޫސާ ނަޞީރު ވިދާޅުވީ، މިފަދަ ސްކީމެއްގައި އެއޮތޯރިޓީގެ މުވައްޒަފުން ބައިވެރިކުރެވުމަކީ މުހިއްމުކަމެއްގެ ގޮތުގައި ދެކެވަޑައިގަންނަވާކަމަށެވެ. އަދި މީގެ ސަބަބުން ޙައްޖުގެ މަތިވެރިއަޅުކަން އަދާކުރައްވަން ބޭނުންފުޅުވާ އެއޮފީހުގެ މުވައްޒަފުނަނަށް ލުއިގޮތްތަކެއް ހަމަޖެހިގެން ދިއުން އެއީ ލިބިގެންދިޔަ ވަރަށްބޮޑު ލުޔެއް ކަމުގައި ވިދާޅުވިއެވެ.
މިސްކީމްގައި، އެެލް.ޖީ.އޭއިން ބައިވެރިވުމަކީ މިފަދަ ކައުންސިލްތަކުން ސްކީމްގައި ބައިވެރިވުމަށް މަގުފައި ވެގެންދިޔަ ކަމެއްގެ ގޮތުގައި ޙައްޖުކޯޕަރޭޝަނުން ދެކޭކަމަށް އެކޯޕަރޭޝަނުގެ މެނޭޖިންގ ޑިރެކްޓަރ ޔާމީން އިދުރީސް ފާހަގަކުރެވިއެވެ. އެލް.ޖީ.އޭ އަކީ، ޙައްޖު ކޯޕަރޭޝަނުން ތަޢާރަފްކުރައްވާފައިވާ މި ސްކީމުގައި ބައިވެރިވި 32 ވަނަ މުއައްސަސާއެވެ.