ނަފްސާނީ ދުޅަހެޔޮކަމަށް ހޭލުންތެރި ކުރުވުމުގެ ގޮތުން އިންސްޓިޓިއުޓް އޮފް ކައުންސެލިންގް އެންޑް ސައިކޯތެރަޕީ އިން ޚާއްޞަ ޙަރަކާތްތަކެއް ފަށައިފިއެވެ.
ބައިނަލްއަޤްވާމީ ފެންވަރެއްގައި މިއަދު ފާހަގަކުރަމުންދާ މި ދުވަހާގުޅިގެން ކުރިއަށްގެންދާ ޕްރޮގްރާމްތަކުގެ ތެރޭގައި ގޮތުގައި މިއަދު ހެދުނު ދިހައަކުން ފެށިގެން ހަވީރު ހައެއްގެ ނިޔަލަށް ނަފްސާނީ ބަލިތަކުގެ ޑޮކްޓަރުންނަށް ދެއްލުމާއި ކައުންސެލިންގެ ޚިދްމަތް ބޭނުންވާ ފަރާތްތަކަށް ހިލޭ މި ޚިދްމަތްތައް ދިނުމަށް ހަމަޖެހިފައިވާކަމަށް އައި.ސީ.ޕީން މައުލޫމާތުދެއެވެ. އަދި މިއަންނަ ހޮނިހިރު ދުވަހު ނަފްސާނީ ދުޅަހެޔޮކަމަށް ހޭލުންތެރި ކުރުވުމުގެ ގޮތުން ޚާއްޞަ ފެއަރއެއް ބޭއްވުމަށް ހަމަޖެހިފައިވާކަމަށްވެސް އައި.ސީ.ޕީއިން ބުނެއެވެ.
ނަފްސާނީ ދުޅަހެޔޮކަމަށް ހޭލުންތެރި ކުރުވުމުގެ ގޮތުން މިއަދު ފުރަތަމަ ޙަރަކާތްތަކެއްގެ ގޮތުގައި އައި.ސީ.ޕީން ބާއްވާފައިވަނީ ޚާއްޞަ ނާސްތާއެކެވެ. މި ނާސްތާގެ ތެރެއިން، ނަފްސާނީ ދުޅަހެޔޮކަމާއި ބެހޭ ޚާއްޞަ މަޢުލޫމާތުތަކެއް ޙިއްސާކޮށްފައިވެއެވެ.
މި ނާސްތާގައި ވާހަހަފުޅު ދައްކަވަމުން ކުރީގެ ހެލްތު މިނިސްޓަރ މަރިޔަމް ޝަކީލާ ވިދާޅުވީ، ސިޔާސީ ގޮތުންނާއި އިޖްތިމާޢީ ގޮތުން އަންނަ ބަދަލުތަކުގެ ސަބަބުން އާއިލީ މައްސަލަތައް ގިނަވެ، ގިނަ ބަޔަކު ނަފްސާނީ މައްސަލަތައް ތަޙައްމަލު ކުރަމުންދާކަމަށެވެ. އެހެންކަމުން މިފަދަ މީހުންނަށް އެހީތެރިވެ، ދުޅަހެޔޮ ދިރިއުޅުމަކަށް ވާޞިލްވުމަށް އެހީތެރިވާން ޖެހޭކަމަށެވެ. އަދި ނަފްސާނީ ބަލިތަކަށްދޭ ޚިދްމަތްތައް މިހާރަށް ވުރެ ލުއިފަސޭހަ ގޮތެއްގައި ލިބޭނޭ މަގު ހަމަޖެހިގެން ދިއުމަކީ، ވަރަށް މުހިންމުކަމެއްގެ ގޮތުގައި ޝަކީލާ ފާހަގަކުރެއްވިއެވެ.