އަޒަރުބައިޖާނާއެކު އޮތް ވިޔަފާރީގެ ގުޅުންވަނީ އިތުރަށް ބަދަހިވެފައި: ރައީސް

ވޭތުވެދިޔަ ކައިރި މާޒީއަށް ބަލާއިރު ރާއްޖެއާއި، އަޒަރުބައިޖާނާ ދެމެދު އޮތް ވިޔަފާރީގެ ގުޅުމާއި ދެޤައުމުގެ ރައްޔިތުންގެ ދޭދޭ ގުޅުންތައް އިތުރަށް ބަދަހިވެގެން ގޮސްފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

އަޒަރުބައިޖާންގެ މިނިވަން ދުވަހާއި ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ އެޤައުމުގެ ރައީސް އިލްހާމް ހައިދަރް އޮގްލޫ އަލިޔެވްއަށާއި ބޮޑު ވަޒީރު، އަލީ ހިދާޔަތު އޮގްލޫ އަސަދޯވްއަށާއި އެޤައުމުގެ ސަރުކާރާއި ރައްޔިތުންނަށް ދުވަހުގެ ހެޔޮ އެދުމާއި ތަހުނިޔާ ވިދާޅުވެފައެވެ.

On the joyous occasion of Azerbaijan’s Independence Day, I wish to extend my heartfelt felicitations to His Excellency President Ilham Heydar oglu Aliyev @presidentaz, His Excellency Prime Minister Ali Hidayat oglu Asadov, the Government, and the people of Azerbaijan. Azerbaijan… pic.twitter.com/BjxSsoXGEq

— Dr Mohamed Muizzu (@MMuizzu) May 28, 2026

ރައީސްގެ މެސެޖުގައިވަނީ މިނިވަންކަން ލިބުނުފަހުން މިވީ މުއްދަތުގެ ތެރޭގައި އަޒަރުބައިޖާނުން މުހިއްމު އެތައް ކާމިޔާބީއެއް ޙާސިލުކޮށްފައިވާކަން ފާހަގަކުރައްވާފައެވެ. އަދި އެޤައުމަށް ފާހަގަތި ދުވަސްވަތަކަށް އެދިވަޑައިގަންނަވާކަމަށް ވިދާޅުވިއެވެ.

ރައީސް ވިދާޅުވީ ރާއްޖެއާއި އަޒަރުބައިޖާންގެ ގުޅުމަށް ބަލާއިރު ވޭތުވެދިޔަ ކައިރި މާޒީގައި ދެޤައުމުގެ ދެމެދު އޮތް ވިޔަފާރީގެ ގުޅުމާއި ދެޤައުމުގެ ރައްޔިތުންގެ ދެމެދު އޮތް ދޭދޭ ގުޅުން ވަރަށް ބޮޑަށް ބަދަހިވެގެން ގޮސްފައިވާކަމަށެވެ. އަދި މިގުޅުން ބަދަހިކުރުމަށް އެކި ދާއިރާތަކުން ކުރެވުނު މަސައްކަތާމެދު ހިތްހަމަޖެހިވަޑައިގަންނަވާކަމަށް ވިދާޅުވިއެވެ.

އަޒަރުބައިޖާން މިނިވަންވެފައިވަނީ 28 މެއި 1918 ވަނަ އަހަރުއެވެ. ރާއްޖެއާއި އަޒަރުބައިޖާންއާއި ދެމެދު ސިޔާސީ ގުޅުން ޤާއިމުކުރެވުނީ 15 ޖޫން 2006 ވަނަ އަހަރުއެވެ.