ބޮސްނިއާ ހެޒްގޮވިނާގެ އެސެމްބްލީ އިންތިޚާބު އޮބްޒާރވްކުރުމުގައި ރާއްޖޭގެ އިލެކްޝަންސް ކޮމިޝަނުން ބައިވެރިވެވަޑައިގެންފިއެވެ.
މި އިންތިޚާބު އޮބްޒާވްކުރުމުގައި އިލެކްޝަންސް ކޮމިޝަނުން ބައިވެރިވެވަޑައިގެންނެވީ، އެސޯސިއޭޝަން އޮފް ވޯރލްޑް އިލެކްޝަން ބޮޑީސް "އޭ.ވެބް" އިން އިންތިޒާމުކޮށްގެން ބޮސްނިއާ ހެޒްގޮވިނާގައި ކުރިއަށްގެންދާ "އިލްކެޝަން ވިޒިޓަރ" ޕްރޮގްރާމެއްގެ ތެރެއިންނެވެ. މިއީ ތަފާތު އިލެކްޝަން ސިސްޓަމްތައް ދެނެގަތުމާއި، އެކި ޤައުމުތަކުގައި އިންތިޚާބު ބާއްވާ ގޮތްތަކުގެ މަޢުލޫމާތާއި ތަޖުރިބާ ބައިވެރިންގެ މެދުގައި ޙިއްޞާކޮށް، އިންތިޚާބުތަކުގެ ޓްރާންސްޕޭރެންސީ އިތުރުކުރެއްވުމުގެ މަޤުޞަދުގައި ހިންގަވާ ޕްރޮގްރާމެކެވެ.
އޭ.ވެބުގެ ޕްރޮގްރާމްގައި އިލެކްޝަންސް ކޮމިޝަންގެ ފަރާތުން ބައިވެރިވެވަޑައިގަންނަވަނީ ނާއިބް ރައީސް އަމްޖަދު މުޞްޠަފާއާއި ސެކްރެޓަރީ ޖެނެރަލް އަޙްމަދު ޢަލީއެވެ. 7 ދުވަހުގެ މި ޕްރޮގްރާމްގައި ބޮސްނިއާގެ އިންތިޚާބު ކުރިއަށްދާ ގޮތާއި، އެހެން ޤައުމުތަކުގައި މިފަދަ އިންތިޚާބުތައް ކުރިއަށްދާ ގޮތުގެ މަޢުލޫމާތު ލިބުމުގެ އިތުރުން ދިވެހިރާއްޖޭގައި އިންތިޚާބު އޮންނަ ގޮތް މި ޤައުމުތަކަށް އޮޅުންފިލުވަދީ، މަޢުލޫމާތު ބަދަލުކުރެވިގެންދާނެ ކަމަށް އިލެކްޝަންސް ކޮމިޝަނުން ވިދާޅުވެއެވެ. މި ޕްރޮގްރާމުގައި ރާއްޖޭގެ އިލެކްޝަންސް ކޮމިޝަނުގެ ދެބޭފުޅުންގެ އިތުރުން 17 ޤައުމެއްގެ 32 އޮފިޝަލުންނާއި އޭ.ވެބް ގެ 13 ބޭފުޅުން އިންތިޚާބު އޮބްޒާރވް ކުރުމުގައި ބައިވެރިވެވަޑައިގެންނެވިއެވެ.