މުޖުތަމަޢުގައި ތިބި ޚާއްޞަ އެހީއަށް ބޭނުންވާ މީހުންނަށް އެހީތެރިކަން ފޯރުކޮށްދިނުމަށް ބޭނުންވާ ފައިސާ ހޯދުމަށްޓަކައި ޞަދަޤާތު ފައުންޑޭޝަނުން ރަސްފަންނުގައި ޚާއްޞަ ޙަރަކާތެއް ހިންގައިފިއެވެ.
"ފުޑް ފިއެސްޓާ 2016" ގެ ނަމުގައި ހިންގި މި ޙަރަކާތައް ޢާންމުންގެ ބޮޑު ތަރުޙީބެއް ލިބިފައިވާ ކަމަށް ޞަދަޤާތު ފައުންޑޭޝަނުން ބުނެއެވެ.
ޞަދަޤާތު ފައުންޑޭޝަންގެ ފުޑް ފިއެސްޓާ 2016 ގެ ނަމުގައި ހިންގާ މި ޙަރަކާތަކީ ވަރަށް މާތް މަޤްޞަދެއްގައި ހިންގާ ޙަރަކާތެކެވެ. މި ޙަރަކާތުން ލިބޭ ފައިސާ ޚަރަދުކުރުމަށް ހަމަޖެހިފައިވަނީ މުޖުތަމަޢުގައި ތިބި ޚާއްޞަ އެހީތެރިކަން ބޭނުންވާ މީހުންނަށް މާލީ އެހީތެރިކަން ފޯރުކޮށްދިނުމަށެވެ.
ރަސްފަންނު ސަރަޙައްދުގައި ކުރިއަށް ގެންދިޔަ މި ޙަރަކާތުގައި 50 އަށްވުރެ ގިނަ ސްޓޯލް ބައިވެރިކޮށްފައިވެއެވެ. މީގެތެރޭގައި ސަރުކާރުގެ ކުންފުނިތަކާއި، އިދާރާތަކާއި އަދި އަމިއްލަ ޖަމިޢިއްޔާތަކާއި، ބައެއް ކޮލެޖުތަކުގެ ސްޓޯލްތައްވެސް ހިމެނެއެވެ.
ޞަދަޤާތު ފައުންޑޭޝަންގެ ފަރާތުން މިޙަރަކާތް އިންތިޒާމުކުރުގައި ބައިވެރި މެންބަރެއް ކަމަށްވާ އިސްމާޢީލް ޢާސިފް ވިދާޅުވީ، މިއީ ވަރަށް ކާމިޔާބު ޙަރަކާތެއް ކަމަށާއި ޢާންމުންގެ ބޮޑު ތަރުޙީބެއް ލިބިގެންދިޔަ ކަމަށެވެ.
ފުޑް ފިއެސްޓާގައި މައިގަނޑު ގޮތެއްގައި ކެއިން ބުއިމަށް ބޭނުންކުރާ އެކި ކަހަލަ ބާވަތްތައް ލިބެން ހުއްޓެވެ. އަދި ކުޑަކުދިންނަށް ޚާއްޞަ އައިޓަމްތައްވެސް ލިބެން ހުއްޓެވެ.
ޞަދަޤާތު ފައުންޑޭޝަނުން ބުނީ، މި ޙަރަކާތަށް ލިބޭ ތަރުޙީބަށް ބަލައި ކުރިއަށް އޮތް ހަފްތާގައިވެސް މިޙަރަކާތް ހިންގަން ނިންމާފައިވާ ކަމަށެވެ.