މާދަމާ ބޭއްވުމަށް ހަމަޖެހިފައިވާ ޑިސްއެބިލިޓީ އެވޯޑް ދިނުމުގެ ރަސްމިއްޔާތުގައި، 9 ދާއިރާއަކުން 14 ފަރާތަކަށް އެވޯޑް ދެއްވުމަށް ހަމަޖައްސަވާފައިވާ ކަމަށް ޖެންޑަރ މިނިސްޓަރ ވިދާޅުވެއްޖެއެވެ.
ނުކުޅެދުންތެރިކަން ހުންނަ ފަރާތްތަކުގެ ލާބަޔަށް މަސައްކަތްކުރާ ފަރާތްތަކަށް ހިތްވަރުދެއްވުމުގެ ގޮތުން ޖެންޑަރ މިނިސްޓްރީއާއި، ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ޙިމާޔަތްކުރުމަށް މަސައްކަތްކުރާ ކައުންސިލްގެ ފަރާތުން ދެއްވަމުން އަންނަ ޑިސްއެބިލިޓީ އެވޯޑަށް ނަން ހުށައެޅުމަށް ހުޅުއްވާލެއްވި ފުރުޞަތުގައި، 41 ފަރާތަކުން އެވޯޑަށް ކުރިމަތިލާފައިވާކަމަށް، މިނިސްޓްރީ އޮފް ޖެންޑަރ އެންޑް ފެމިލީން ވިދާޅުވެއެވެ.
ޖުމްލަ 9 ދާއިރާއަކުން އެވޯޑަށް ނަން ހުށައެޅުމުގެ ފުރުޞަތު ހުޅުވާލާފައިވާއިރު މީގެ ތެރޭގައި، ނުކުޅެދުންތެރިކަން ހުންނަ ފަރާތްތަކަށް ޢާމާޒުކޮށް އެވޯޑް ކުރެވޭ 2 ކެޓަގަރީއެއް އޮވެއެވެ. އެއީ ނުކުޅެދުންތެރިކަން ހުންނަ ފަރާތްތަކުގެ ތެރެއިން ފާހަގަކޮށްލެވޭ ފަރާތްތަކާއި، ރާއްޖެއަށް އެކިގޮތްގޮތުން ރީތި ނަން ހޯދައިދޭ ނުކުޅެދުންތެރިކަން ހުންނަ ފަރާތްތަކަށް ދެއްވާ އެވޯޑެކެވެ.
ނުކުޅެދުންތެރިކަން ހުންނަ ފަރާތްތަކުގެ ލާބަޔަށް މަސައްކަތްކުރާ ފާރަތްތަކަށް ޚާއްޞަ ކެޓެގަރީތަކުގެ ތެރޭގައި، ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތު ހޯދައިދޭ ފަރާތްތައް، ފަރުދީ ގޮތުން ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށްދޭ ފަރާތްތައް، ނުކުޅެދުންތެރިކަން ހުންނަ މީހުންނަށް ޚިދުމަތް ދިނުމަށް މަސައްކަތްކުރާ އަމިއްލަ ޖަމްޢިއްޔާތަކާއި، ނުކުޅެދުންތެރިކަމުގެ ޙާލަތުތައް ރަނގަޅުކުރުމަށް ފަންނީ ގޮތުން މަސައްކަތްކުރާ ފަރާތްތަކާއި، ނުކުޅެދުންތެރިކަން ހުންނަ ފަރާތްތަކަށް ތަކެތި އަދި މާލީގޮތުން އެހީތެރިކަން ފޯރުކޮށްދޭ ފަރާތްތަކަށް ދެއްވާ އެވޯޑް ހިމެނެއެވެ.
މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ވިދާޅުވީ އެކި ދާއިރާތަކުން 14 ބޭފުޅުންނަށް އެވޯޑް ދިނުމަށް ހަމަޖެހިފައިވާކަމަށެވެ.
ޖެންޑަރ މިނިސްޓަރ ވިދާޅުވީ، އެވޯޑަށް ހުށަހެޅި ފަރާތްތައް ހޮވާފައިވަނީ، އެ މިނިސްޓްރީއާއި ނުކުޅެދުންތެރިކަން ހުންނަ މީހުންގެ ޙައްޤުތައް ޙިމާޔަތްކުރާ ކައުންސިލުން އެވޯޑަށް ޚާއްޞަކޮށް، އެކުލަވައިލައްވާފައިވާ ޚާއްޞަ ކޮމެޓީއަކުން ކަމަށާއި، އިވެލުއޭޓް ކުރެއްވުމުގެ ކަންކަން ކުރިޔަށްދިޔައީ ވަރަށް އިންސާފުވެރިގޮތެއްގައިކަމަށެވެ.
އެންމެ ފަހުން ޑިސްއެބިލިޓީ އެވޯޑު ދެއްވާފައިވަނީ 2014 ވަނަ އަހަރު އަހަރުއެވެ. އެ އަހަރު 15 ފަރާތަކަށް އެވޯޑް ދެއްވާފައިވެއެވެ.