އެތްލެޓިކް ކުލަބު އަތުން ރޭ ބާސެލޯނާ 1-0އިން މޮޅުވި މެޗުގައި ލަމީން ޔަމާލް ގޯލު ޖެހި ނަމަވެސް މެޗުގެ ނަތިޖާ އަނބުރާލި ކުޅުންތެރިއަކީ މިޑްފީލްޑަރު ޕެޑްރީ ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ.
މި ނަތީޖާއާއެކު ސްޕެނިޝް ލީގުގައި ބާސެލޯނާ އެއްވަނާގައިވަނީ ދެ ވަނާގައިވާ ރެއާލް މެޑްރިޑަށް ވުރެ ހަތަރު ޕޮއިންޓް ކުރިންނެވެ. މެޗަށް ފަހު ކޯޗު ފްލިކް ވަނީ ފަހު ހާފުގައި ކެޕްޓަން ބޭންޑާއެކު ކުޅެން ނުކުތް ޕެޑްރީ އަށް ތައުރީފް ކޮށްފަ އެވެ.
"މެޗު ބަދަލު ކޮށްލީ އޭނާ. އޭނާ ކޮންމެ ކުޅުންތެރިއަކާއެކު ވެސް ވަރަށް ވަރުގަދަ އަށް ޕްރެސް ކުރި. އަދި ގިނަ ބޯޅަތަކެއް ހޯދައި ޓީމު ލައްވައި ކުޅުވި. މިއީ އޭނާގެ ތަފާތަކީ. އަހަރެން މިހުރީ އޭނާ ދެއްކި ކުޅުމާމެދު ވަރަށް އުފަލުން،" ފްލިކް ބުންޏެވެ.
މި މެޗު ބާސެލޯނާއިން ފެށީ ޒުވާން މިޑްފީލްޑަރު މާލް ބާނަލް ގޮވައިގެންނެވެ. ނަމަވެސް ފްލިކް ބުނީ ކުޅުންތެރިޔާ ބަދަލު ކުރީ އޭނާ އަށް ހާނިއްކަވެ މެޗު ފުރިހަމަ ކުރަން އުނދަގޫ ވުމުން ކަމަށެވެ.
މެޗުގައި ޔަމާލް ގޯލު ޖެހި ނަމަވެސް ނަތީޖާ ބަދަލު ކުރަން އެންމެ ހުސް ފުރުސަތުތައް ލިބުނީ ބާސެލޯނާގެ ފޯވަޑް ފެރަން ޓޮރޭޒަށެވެ. މި ފުރުސަތުތައް ބޭނުން ނުކުރެވުމުން 62 ވަނަ މިނިޓްގައި ކުޅެން ނެރުނީ ތަޖުރިބާކާރު ފޯވަޑް ރޮބަޓް ލެވޮންޑޯސްކީ އެވެ.
"ޓޮރޭޒަކީ މޮޅު ކުޅުންތެރިއެއް. އެކަމަކު މިހާރު އޭނާ އެ ހުރީ ފޯމު ކަޓާފައި. އޭނާގެ އިތުބާރުގެ މައްސަލަ އެބައުޅޭ. މިހެންވެ އޭނަ އަށް ލިބުނު ގިނަ ފުރުސަތުތައް ބޭނުން ނުކުރެވުނީ. އަހަރުމެން ޖެހެނީ އޭނާގެ ކުރީގެ އިތުބާރު އަލުން ގެނައުމަށް އޭނާ އަށް އެހީވާން. ލެވޮންޑޯސްކީ ވެސް އެ ހުރީ މުޅިން ފިޓްކޮށެއް ނޫން،" ފްލިކް ބުންޏެވެ.
މި މެޗަށް ފަހު ބާސެލޯނާއިން ދެން ތައްޔާރުވާނީ ޔޫރަޕިއަން ޗެމްޕިއަންސް ލީގުގެ ގަދަ 16ގައި ނިއުކާސަލްއާ ދެކޮޅަށް ކުޅެން ޖެހޭ މެޗަށެވެ.