ސިފައިންގެ 72 ވަނަ އަސާސީ ތަމްރީނު ކޯސް އިފްތިތާޙްކޮށްފި

ދިވެހި ސިފައިންގެއާއި އަލަށް ގުޅޭ ކުދިންގެ 72 ވަނަ އަސާސީ ތަމްރީނު ކޯސް އިފްތިތާޙު ކުރައްވައިފިއެވެ.

އެމްއެންޑީއެފުން ޕީއެސްއެމް ނިއުސްއަށް މައުލޫމާތުދެއްވަމުން ވިދާޅުވީ މިފަހަރުގެ ކޯހުގައި ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ނޭޝަނަލް ސާރވިސްގެ ފުރަތަމަ ބުރުން ދަސްވެނިވެ ސިފައިންގެއަށް ވަނުމަށް ޝައުޤުވެރިކަން ފާޅުކުރި ކުދިން ހިމަނާފައިވާނެ ކަމަށެވެ.

ސިފައިންގެ 72 ވަނަ އަސާސީ ތަމްރީނު ކޯސް ފެށުމަށް ބޭއްވި ޚާއްޞަ ރަސްމިއްޔާތު މިއަދު އެމްއެންޑީއެފް ސަދަން އޭރިއާ ކޮމާންޑުގައި ކުރިއަށް ގެންގޮސްފައިވާއިރު، މި ރަސްމިއްޔާތު ޝަރަފުވެރި ކޮށްދެއްވީ، ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ޢަބްދުﷲ އިބްރާހީމްއެވެ.

މި ބައްދަލުވުމުގައި ބްރިގޭޑިއަރ ޖެނެރަލް ޢަބްދުﷲ އިބްރާހީމް ވަނީ، ކޯހުގެ ބައިވެރިންނާއި އިންސްޓްރަކްޓަރުންނާ ބައްދަލުކުރައްވައި ނަސޭހަތްތެރިވެ ވަޑައިގެންފައެވެ. އެމަނިކުފާނުގެ ވާހަކަފުޅުގައި، އަޚުލާޤު ރަނގަޅު ސިފަވަންތަ ބަޔަކަށް ވުމަށާއި، ކޯސް ކާމިޔާބުކަމާއެކު ނިންމުމަށް ހިތްވަރާއެކު މަސައްކަތް ކުރުމަށް ދަރިވަރުންނަށް ބާރުއެޅުއްވިއެވެ. ހަމައެއާއެކު، ތަމްރީނުތައް ކުރިއަށްގެންދާއިރު ދަރިވަރުންގެ ރައްކާތެރިކަމަށް ޚާއްޞަ ސަމާލުކަމެއް ދިނުމަށް މުދައްރިބުންގެ ކިބައިން އެދިވަޑައިގެންނެވިއެވެ.

މި ރަސްމިއްޔާތުގެ ތެރެއިން ދަރިވަރުންނަށް އިޤުރާރު ލައިދިނުމާއި، މުދައްރިބުންގެ ވަޢުދު ކިޔައިދިނުން ކުރިއަށް ދިޔައެވެ. މިފަހަރުގެ ކޯހުގައި ޖުމްލަ 146 ދަރިވަރުން ބައިވެރިވިއިރު، އޭގެ ތެރޭގައި 22 އަންހެން ސިފައިން ހިމެނެއެވެ.

މި ރަސްމިއްޔާތުގައި ސަދަން އޭރިއާ ކޮމާންޑުގެ ކޮމާންޑަރ ކާނަލް މުޙައްމަދު ޖަމްޝާދާއި، ޑެޕިއުޓީ ކޮމާންޑަރ ލެފްޓިނެންޓް ކާނަލް މުޙައްމަދު ނިލާމްގެ އިތުރުން ކޮމާންޑް ސާޖަންޓް މޭޖަރ ނާޡިމް މުޙައްމަދާއި އެކި ރޭންކުތަކުގެ އޮފިސަރުން ބައިވެރިވެ ވަޑައިގެންނެވިއެވެ.

ސިފައިންގެ އަސާސީ ތަމްރީނު ކޯހަކީ، ސިފައިންގެއަށް ޝަރުތު ހަމަވާ ކުޅަދާނަ ޤައުމު ދެކެ ލޯބިވާ މީހަކު އުފެއްދުމަށް ސިފައިންގެއަށް އަލަށް ވަންނަ ކޮންމެ ކުއްޖަކު ފުރިހަމަ ކުރުން މަޖުބޫރު ކޯހެކެވެ.