ސްރީ ލަންކާގެ ކަނޑުގެ ސަރަޙައްދުގެ ބޭރުގައި އޮތް އީރާނުގެ އަސްކަރީ މަނަވަރަކަށް އެމެރިކާއިން ޙަމަލާދީ ފައްތައިލި ދުވަހު، އިންޑިއާ ކަނޑުގައި އޮތް އެހެން މަނަވަރަކަށް ހިމާޔަތްދީ، އިންޑިއާގައި ބަނދަރުކުރުމުގެ ފުރުޞަތު ދިން ކަމަށް އިންޑިއާގެ ޚާރިޖީ ވަޒީރު ސުބްރަމަނިޔަމް ޖަޔަޝަންކަރު ވިދާޅުވެއްޖެއެވެ.
މާރިޗު މަހުގެ 4ވަނަ ދުވަހުގެ ވަގުތެއްގައި ލަންކާގެ ކަނޑުގެ ސަރަޙައްދުގެ ބޭރުން ދަތުރު ކުރި އައިރިސް ޑެނާ ނަމަކަށް ކިޔާ އަސްކަރީ މަނަވަރަކަށް އެމެރިކާގެ ކަނޑުގެ ސިފައިން ވަނީ ޓޯޕީޑޯ ޙަމަލާއެއްދީ އެ އުޅަނދު ފައްތާލައިފައެވެ. ފެބްރުއަރީ މަހުގެ 28ވަނަ ދުވަހުން ފެށިގެން އެމެރިކާއިން އީރާނަށް ދެމުންދާ ޙަމަލާތަކުގެ ބައެއްގެ ގޮތުގައި ދީފައިވާ އެ ޙަމަލާގައި 87 މީހުން ވަނީ ޝަހީދުވެފައެވެ.
ޑެނާ ފައްތައިލި ދުވަހު، އައިރިސް ލެވަން ނަމަކަށް ކިޔާ އީރާނުގެ އަސްކަރީ މަނަވަރަކަށް ކޯޗީ ބަނދަރަށް ވަނުމަށް ހުއްދަ ދިނީ، އިންސާނިއްޔަތަށްޓަކައި ކަމަށް ޖަޔަޝަންކަރު ވިދާޅުވިއެވެ. އަދި ކޮންމެ ފަދަ ޙާލަތެއްގައި ނަމަވެސް، އެއީ ރަނގަޅު ނިންމުމެއް ކަމަށް އިންޑިއާ ސަރުކާރުން ޤަބޫލުކުރާކަމަށް ވެސް އޭނާ ވިދާޅުވިއެވެ.
އެ މަނަވަރުގައި ތިބި 183 ފަޅުވެރިން މިހާރު ތިބީ، ކޯޗީގައި ހުންނަ އިންޑިއާގެ ކަނޑުގެ ސިފައިންގެ މަރުކަޒެއްގައި ކަމަށް އިންޑިއާ ސަރުކާރުން މަޢުލޫމާތު ދީފައިވެއެވެ.
ސްރީ ލަންކާގެ 19 މޭލު ބޭރުން އެމެރިކާއިން ޙަމަލާދީ ފައްތައިލި މަނަވަރު ދަތުރުކުރަމުންދިޔައީ، އިންޑިއާ އާއެކު ކުރިއަށްދިޔަ އަސްކަރީ ތަމްރީން ޙަރަކާތަކަށްފަހު ކަމަށް އެނގިފައިވެއެވެ.
އެ ދެ މަނަވަރުގެ އިތުރުން، ސްރީ ލަންކާއިން އިއްޔެ ވަނީ އައިރިސް ބޫޝެހްރުގެ ނަން ދީފައިވާ އީރާނުގެ މަނަވަރުގެ އިންޖީނުގެ މައްސަލަތަކެއް ދިމާވެ، އެހީ ފޯރުކޮށްދީފައެވެ.
މިގޮތުން، އެ މަނަވަރަށް ވެސް ޙަމަލާއެއް އަމާޒުވެދާނެތީ، އެ އުޅަނދުގައި ތިބި ފަޅުވެރިންގެ ފުރާނަ ރައްކާތެރިކުރުމަށްޓަކައި އެ އުޅަނދު ބަނދަރާ ހަމައަށް ގެންގޮސް، އޭގައި ތިބި 208 ފަޅުވެރިން އަސްކަރީ ކޭމްޕަކަށް ގެންގޮސްފައިވާކަމަށް ސްރީ ލަންކާ ސަރުކާރުން ވަނީ ބުނެފައެވެ.
ސްރީ ލަންކާގެ ރައީސް، އަނޫރާ ކުމާރާ ދިސަނަޔަކެ ވިދާޅުވީ އެ އުޅަނދުގައި ތިބި ފަޅުވެރިންނާ ޙަވާލުވެ އެހީތެރިކަން ފޯރުކޮށްދިނުމަކީ އިންސާނީ ޒިންމާއެއް ކަމަށެވެ.
އެ އުޅަނދުން ދަތުރުކުރި ގިނަ ފަޅުވެރިން މިހާރު ވަނީ ކޮލޮމްބޯއަށް ގެނެސް ޞިއްޙީ ޗެކްއަޕްތައް ހެދުމަށް ފަހު ވެލިސަރާގައި ހުންނަ ކަނޑުމަތީގެ ސިފައިންގެ ކޭމްޕަކަށް ގެންގޮސްފައެވެ. އެ މީހުން ދަތުރުކުރި މަނަވަރު ގެންގޮސްފައި ވަނީ ޓްރިންކޮމަލީ ހާބަރަށެވެ. އެ އުޅަނދުގައި 15 ފަޅުވެރިން އަދިވެސް އެބަ ތިއްބެވެ.