ވައިގެމަގުން އެތެރެކުރި 6.7 ކިލޯގެ މަސްތުވާތަކެތި އަތުލައިގެންފި

ވައިގެމަގުން ރާއްޖެއަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސްއިން އަތުލައިގެންފިއެވެ.

ކަސްޓަމްސްއިން ހާމަކޮށްފައިވާ ގޮތުގައި، މި މަސްތުވާތަކެތި އަތުލައިގެންފައިވަނީ މިމަހުގެ 3 ވަނަ ދުވަހުގައެވެ. ވެލާނާ އިންޓަރނޭޝަނަލް އެއަރޕޯޓުން ބަލައިފާސްކުރި ފަސިންޖަރެއްގެ އަތުން ފެނުނު މި ތަކެތި ތަހުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ޙަޝިޝް އޮއިލްއަށް ވަނީ ޕޮޒިޓިވްވެފައެވެ،
މި މައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި 6.7 ކިލޯ ހުއްޓެވެ. މި ތަކެތީގެ މަގުމަތީ އަގު5.4 މިލިޔަން ރުފިޔާއަށް ވުރެ މަތިކަމަަށް ކަސްޓަމްސްއިން ވިދާޅުވިއެވެ.

ވޭތުވެ ދިޔަ ދޮޅު މަސް ދުވަހުގެ ތެރޭގައި ފުލުހުންނާއި ކަސްޓަމްސް ގުޅިގެން ހިންގި އެކި އޮޕަރޭޝަންތަކުގައި ޖުމްލަ 83.45 ކިލޯގެ މަސްތުވާތަކެތި ވަނީ އަތުލައިގަނެފައެވެ. މިތަކެތީގެ މަގުމަތީ އަގު 72.2 މިލިޔަން ރުފިޔާއަށް އަރައެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ރާއްޖޭގެ ބޯޑަރު ހުރަސްކޮށް އެތެރެކުރަން މަސައްކަތް ކުރަނިކޮށް ކަސްޓަމްސްއިން އަތުލައިގެންފައިވާ މަސްތުވާތަކެއްޗެވެ.

ކަސްޓަމްސްގެ މަސައްކަތް ހަރުދަނާކޮށް ވައިގެ މަގުންނާއި ކަނޑުމަގުން ރާއްޖެ އެތެރެކުރަން އުޅެނިކޮށް އަތުލައިގަނެފައިވާ މަސްތުވާތަކެތީގެ އަދަދު އިތުރުވެފައިވާއިރު، ބޭރުގައި ތިބެގެން ރާއްޖެއަށް މަސްތުވާތަކެތި އެތެރެކުރާ ފަރާތްތައް ހުއްޓުވުމުގެ މަސައްކަތް މެދުކެނޑުމެއް ނެތި އަންނަނި ކުރަމުންނެވެ.