ފާއިތުވި ހަ ދުވަހުގެ ތެރޭގައި އީރާނުން ޔަހޫދީ ދައުލަތުގެ ރަށްތަކަށް އަމާޒުކޮށް ދީފައިވާ ވަރުގަދަ ޙަމަލާތަކުގައި ލިބިފައިވާ ގެއްލުމުގެ އަގު 2 ބިލިޔަން އެމެރިކާ ޑޮލަރަށް އަރާފައިވާ ކަމަށް އަންދާޒާ ކޮށްފިއެވެ. މިއީ، މެދުއިރުމަތީގެ ހަނގުރާމަށް ޔަހޫދީން ކުރަމުންދާ އަސްކަރީ ޚަރަދުތައް ނުހިމަނައި، އީރާނުން ބޭނުން ކޮށްފައިވާ ބާރުގަދަ ކްރޫޒް އަދި ބެލިސްޓިކް މިސައިލާއި އަސްކަރީ ޑްރޯންތަކުގެ ސަބަބުން ބިނާރާއި އުމްރާނީ ވަސީލަތްތަކަށް ލިބިފައިވާ ގެއްލުމުގެ އަގެވެ.
އީރާނުން ޔަހޫދީ ދައުލަތަށް އަމާޒުކޮށް ވަރުގަދަ ޙަމަލާތަކެއް ދެމުން މި ދަނީ، ޔަހޫދީންނާއި އެމެރިކާ ގުޅިގެން އީރާންގެ އިސްތިޤުލާލަށް އަރައިގަތުމާ ގުޅިގެންނެވެ. ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫއާއި އޭނާގެ އެންމެ ބޮޑު މަދަދުގާރު، އެމެރިކާގެ ރައީސް ޑޮނަލްޑް ޓްރަމްޕް ގުޅިގެން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. އެ ހަނގުރާމައިގައި އީރާންގައި ޝަހީދު ކޮށްލާފައިވާ މީހުންގެ އަދަދު ވަނީ 1,045އަށް އުފުލިފައެވެ. އީރާނުން ވެސް ވަނީ ޔަހޫދީންގެ 11 މީހުންނާއި އެމެރިކާ ސިފައިންގެ ހަ މީހުން މަރައިލާފައެވެ. އަދި، ޔަހޫދީންގެ އެތަކެއް ސަތޭކަ ބަޔަކު ޒަޚަމު ކޮށްލާފައެވެ.
އެމެރިކާއާއި ޔަހޫދީން ގުޅިގެން އަދިވެސް ދަނީ އީރާންގެ ވެރިރަށް ތަހްރާނާއި ޢާންމުން ދިރިއުޅޭ ބޮޑެތި ރަށްތަކަށް ޙަމަލާ ދެމުންނެވެ. އަދި، ބަދަލުގައި އީރާނުން ވަނީ ޔަހޫދީންގެ ރަށްތަކަށް ޙަމަލާ ދިނުމަށް ބޮޑެތި، ބާރުގަދަ އަދި ފެންވަރު މަތި މިސައިލްތައް ބޭނުން ކުރަން ފަށާފައެވެ. ޔަހޫދީ ފައުޖުން ދަނީ ވައިގެ ދިފާޢީ ނިޒާމު ބޭނުން ކޮށްގެން އީރާންގެ ގިނަ ޙަމަލާތައް ދިފާޢު ކުރަމުންނެވެ.
ނަމަވެސް، މިސައިލްތަކުގެ ބައިތައް ވެއްޓި، ޔަހޫދީންގެ ބިނާރުތަކަށް ދަނީ ބޮޑެތި ގެއްލުންތަކެއް ލިބެމުންނެވެ. މިއީ، ޔަހޫދީ ފައުޖުގެ ޤާބިލުކަމާއި ޔަހޫދީ ޢާންމުންގެ ކެތްތެރިކަމަށް އޮތް ބޮޑު ގޮންޖެހުމެކެވެ. އީރާންގެ ނުރައްކާތެރި ޙަމަލާތަކުގައި ޔަހޫދީ ދައުލަތަށް ލިބެމުންދާ އިޤުތިޞާދީ ގެއްލުންތައް ކުޑަކުރުމަށް ޓަކައި، ވިޔަފާރީގެ ބައެއް މަސައްކަތްތައް އަލުން ފެށުމަށް ޔަހޫދީ ސަރުކާރުން މަސައްކަތް ފަށާފައިވާ ކަމުގައި ރިޕޯޓުތައް ބުނެއެވެ. އަދި، ޢާންމު ޙާލަތަކަށް ރުޖޫޢަވުމަށް ޔަހޫދީ ސަރުކާރުން ޢާންމުންނަށް ބާރުއަޅަމުން ދިޔަ ނަމަވެސް އީރާނުން މިސައިލެއް އުދުއްސައިލާ ކޮންމެ ފަހަރަކު އެތަކެއް މިލިޔަން ޔަހޫދީންނެއް ދަނީ ބިންގަރާސްތަކަށް ވަދެ ފިލަމުންނެވެ.
އެމެރިކާއާއި ޔަހޫދީންގެ ޙަމަލާތަކުގައި އީރާންގެ ބިނާރުތަކާއި އުމްރާނީ ވަސީލަތްތަކަށް ވެސް ދަނީ ބޮޑެތި ގެއްލުންތަކެއް ލިބެމުންނެވެ. އީރާންގެ ހަކަތައާ ބެހޭ ވަޒީރު ޢައްބާސް ޢަލީއާބާދީ ވިދާޅުވީ، ޔަހޫދީންގެ ޙަމަލާތަކެއްގައި އެ ޤައުމުގެ ފެނާއި ކަރަންޓުގެ ޚިދުމަތްދޭ މައި މަރުކަޒުތަކަށް ބޮޑެތި ގެއްލުންތަކެއް ލިބިފައިވާ ކަމުގައެވެ. އެ ގެއްލުންތައް މަރާމާތުކޮށް، ޚިދުމަތްތައް އަލުން ގުޅައިދިނުމަށް މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ.