ބާޒާރު: ފުރަތަމަ 15 ނިމުނުއިރު އަގުތައް ހިފެހެއްޓިފައި

ރަމަޟާންމަހާ ދިމާކޮށް ކޮންމެ އަހަރަކުވެސް ދަނޑުވެރިކަންކުރާ ގިނަ ރަށްރަށުން ބާޒާރަށް އެކި ބާވަތްތަކުގެ މޭވާއާއި ތަރުކާރީ ގެނެއެވެ. މިއަހަރުގެ ރަމަޟާންމަހަށްވެސް ޚާއްސަކޮށްގެން ރާއްޖޭގެ އެކި ހިސާބުތަކުގައި ހައްދާ މޭވާއާއި ތަރުކާރީގެ ބާވަތްތަކުން ބާޒާރުމަތި ފެންނަނީ ވަރަށް ތިޔާގިކޮށެވެ.

ބާޒާރުގައި މިއަދު އެންމެ ގިނައީ ފެންނަނީ ކަނޑުދޫ މިރުހެވެ. ބާޒާރުގެ ގިނަ ގޮޅިތަކުން ކަނޑޫދޫ މިރުސް ލިބެން އެބަހުއްޓެވެ. ކަނޑޫދޫ މިރުހުގައި ހުންނަ ކުޅިކަމުގެ ސަބަބުން އެ މިރުސް ގަންނަ މީހުންގެ އަދަދު އިތުރެވެ. ބާޒާރުގައި 100ގ މިރުސް ލިބެން ހުރީ، 20 ރުފިޔާއަށެވެ.

އަނބަކީ ދިވެހިންގެ ކެއުމުގައި އާންމުކޮށް ބޭނުންކުރާ ބާވަތެކެވެ. ޚާއްސަކޮށް ރަމަޟާންމަހާ ދިމާކޮށް ފަނި ގިރުމަށް ގިނަ ގޭގޭގައި އަނބު ބޭނުންކުރެއެވެ. މިއަހަރު ބާޒާރުގައި ފުވައްމުލައް އަނބު ވަރަށް ތިޔާގިކަން ފާހަގަކޮށްލެވެއެވެ. އަނބު ކިލޯއެއް ބާޒާރުގައި މިއަދު ލިބެންހުރީ ކިލޯއެއް 70 ރުފިޔާއަށެވެ.

މީގެއިތުރުން އާންމުކޮށް ރަމަޟާންމަހު ފަނިގިރުމަށް ބޭނުންކުރާ ކަރާ، ފެޝަންފްރުޓް، އަދި ފޭރުގެ އަގުތައްވެސް އެއްވަރެއްގައި ހިފެހެއްޓިފައި ހުރިކަން ފާހަގަކޮށްލެވެއެވެ. އެގޮތުން ރަމަޟާންމަސް ފެށުނުއިރުވެސް ދަތުރުވެރިންގެ މާރުކޭޓުން ކަރާ ކިލޯއެއް ލިބެންހުރީ 25ރ އަށް، ފެޝަންފުރުޓް ކިލޯއެއް 120ރ އަށެވެ. އަދި މިއަދުވެސް އެ މާރރުކޭޓުން މި ބާވަތްތައް ލިބެންހުރީ އެ އަގުތަކަށެވެ.

ޕީއެސްއެމް ނިއުސްއާ ވާހަކަދައްކަމުން ބާޒާރުގައި ތަކެތި ވިއްކާ ފަރާތަކުން ބުނީ، މުޅި ބާޒާރުގައިވެސް ޖުމްލަގޮތެއްގައި ގިނައީ ކާށިދޫއާއި ތޮއްޑޫއިން ގެންނަ ބާވަތްތައްކަމަށެވެ.

ކޮންމެ އަހަރެއްގެވެސް ރަމަޟާންމަހާ ދިމާކޮށް ރާއްޖޭގެ ދަނޑުވެރިކަން ކުރާ ގިނަ ރަށްރަށުން ބާޒާރަށް މޭވާއާއި ތަރުކާރީގެ ބާވަތްތައް ގެނެއެވެ. މި ރަމަޟާންމަހުގެ މިހާތަނަށް ބާޒާރުގައި ކެއްކުމަށް ބޭނުންކުރާ ހުރިހާ ބާވަތްތަކެއްވެސް ވަރަށް ތިޔާގިކަން ފާހަގަކޮށްލެވެއެވެ.