ގްލޯބަލް ގަވަރމަންޓް ސަމިޓް އޮން ސޯޝަލް އިނޮވޭޝަން ކޮންފަރެންސް މެއިމަހު

ގްލޯބަލް ގަވަރމަންޓް ސަމިޓް އޮން ސޯޝަލް އިނޮވޭޝަން ކޮންފަރެންސްގެ ނަމުގައި ކޮންފަރެންސެއް ބޭއްވުމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމަށް ބެހޭ ވުޒާރާއިން ނިންމަވައިފިއެވެ.

މި ކޮންފަރެންސް ބޭއްވުމަށް ހަމަޖެހިފައިވަނީ މިއަހަހަރުގެ މެއި މަހުގެ 19 ވަނަ ދުވަހުން ފެށިގެން 22 ވަނަ ދުވަހާ ހަމައަށް ބަނޑޮހުގައެވެ. މި ކޮންފަރެންސް ބޭއްވުމަށް މިހާރު ވަނީ ތައްޔާރުވާން ފަށާފައެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މަތީ ތަޢުލީމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވީ މި ކޮންފަރެންސްގައި ދުނިޔޭގެ 100 އަށްވުރެ ގިނަ ޤައުމެއްގެ ލޭބަރ މިނިސްޓަރުންނާއި ބައިނަލްއަޤްވާމީ ޖަމްޢިއްޔާތަކުގެ އޮފިޝަލުން ބައިވެރިވެ ވަޑައިގަންނަވާނެކަމަށެވެ. މީގެ އިތުރުން މަސައްކަތްތެރިންނާއި ވަޒީފާދޭ ފަރާތްތަކުގެ އަގު ޤައުމީ ފެންވަރުގައި ވަޒަން ކުރުމުގެގޮތުން ނޭޝަނަލް ލޭބަރ އެވޯޑެއް ތަޢާރަފުކޮށް މިއަހަރުގެ ޖުލައި މަހުގެ ކުރީކޮޅު މި އެވޯޑް ހަފްލާ ބޭއްވުމުގެ މަސައްކަތް ކުރަމުންދާކަމަށް ވިދާޅުވިއެވެ.

"މަސައްކަތް ތެރިންނާއި ވަޒީފާދޭ ފަރާތްތަކާއި ސަރުކާރާއެކު މިދިޔަ އަހަރު ބާއްވަން ފެއްޓެވި ސޯޝަލް ޑައިލޮގް ކޮންފަރެންސް މިއަހަރު ވެސް ސެޕްޓެންބަރ މަހުގެ ކުރީކޮޅު ބޭއްވުމުގެ މަސައްކަތް މިދަނީ ކުރަމުން. ވަޒީފާއާއި ހުނަރާއި އުފެއްދުންތެރިކަމަށް އަމާޒުކޮށް ރާއްޖޭގައި ބޭއްވޭ އެންމެ ބޮޑު އެއްވުން، "ވަރަ އެކްސްޕޯ" މިއަހަރު ވެސް ބާއްވަން މަސައްކަތް ކުރަމުން އެބަ ގެންދަން. މި އަހަރު ވަރަ އެކްސްޕޯ ބާއްވަން ނިންމާފައިވަނީ ސެޕްޓެންބަރ މަހުގެ ފަހުކޮޅު." މަތީ ތަޢުލީމާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވިއެވެ.

ވަޒީރު ވިދާޅުވީ ކުރިއަށް އޮތް ފަސް އަހަރު ދުވަހުގެ ތެރޭގައި ރާއްޖޭގައި ވަޒީފާ ބޭނުންވެ، ވަޒީފާއެއް ނުލިބިފައިވާ ފަރާތްތައް އެއްކޮށް ނައްތާލުމުގެ އިސްތިރާޖީ އަމާޒުގެ ދަށުން، ވަޒީފާ ހޯދާ ފަރާތްތަކަށް އެމީހެއްގެ ތަޢުލީމާއި، ތަޖުރިބާ އަދި ހުނަރާ ގުޅޭ ފެންވަރު ރަނގަޅު ވަޒީފާގެ ފުރުޞަތުތައް ލިބޭނެ ވަރުގަދަ ލޭބަރ މާކެޓެއް ޤާއިމުކުރުމަށް ސަރުކާރުން އިސްކަން ދީފައިވާކަމަށެވެ. އަދި މިކަން ޙާޞިލުކުރުމަށްޓަކައި، "ޖޮބް ޕޯޓަލް" މެދުވެރިކޮށް "ނޭޝަނަލް ކެރިއަރ ސަރވިސަސް" ގައި ރަޖިސްޓްރީވާ ވަޒީފާ ހޯދާ ފަރާތްތަކުގެ އަދަދު އިތުރުކުރުމަށް ކުރަމުންދާ މަސައްކަތްތައް އިތުރަށް ހަރުދަނާކޮށްފައިވާކަމަށް ވަޒީރު ވިދާޅުވިއެވެ.

ޖޮބް ޕޯޓަލްއިން މިހާތަނަށް ވަނީ 60,791ވަޒީފާ ހޯދާ ފަރާތްތައް ރަޖިސްޓްރީވެފައެވެ. އަދި މި އަހަރު އެކަނިވެސް 539 ވަޒީފާ އިޢުލާންކޮށްފައިވާއިރު ޕޯޓަލްގައި ރަޖިސްޓްރީވި ފަރާތްތަކުގެ ތެރެއިން 5,875 މީހުންނަށް ވަޒީފާ ހޯދައިދެވިފައިވެއެވެ. މީގެ ތެރޭގައި %58.6 އަކީ އަންހެނުންނެވެ.