އެމެރިކާއާ ގުޅިގެން ޔަހޫދީން އީރާނަށް ދެމުންދާ ޙަމަލާތަކާ ގުޅިގެން، މެދުއިރުމަތީގައި ހިންގަމުންދާ ވަރުގަދަ އަސްކަރީ ކުރިމަތިލުންތަކުގެ ސަބަބުން އެ ސަރަޙައްދުގައި ތެލާއި ގޭސް އުފެއްދުމަށް ބޮޑެތި ހުރަސްތައް ކުރިމަތިވާން ފަށައިފިއެވެ.
ފެބްރުއަރީ 28އިން ފެށިގެން ދެމުންދާ ޙަމަލާތަކުގެ ރައްދުގައި އީރާނުން ވެސް ދަނީ ޔަހޫދީންގެ ނިރުބަވެރި ދަޢުލަތުގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ބައިތިއްބާފައިތިބި އަސްކަރީ މަރުކަޒުތަކަށް ޢަމާޒުކޮށް ވަރުގަދަ ޙަމަލާތަކެއް ދެމުންނެވެ.
މި ކުރިމަތިލުންތަކާ ގުޅިގެން، ޤަތަރުން ގޭސް އުފެއްދުން މިއަދު މަޑުޖައްސާލާފައިވާއިރު، އީރާނުގެ ޙަމަލާއެއް އަމާޒުވެ، ސަޢުދީ ޢަރަބިއްޔާއިން ވަނީ އެ ޤައުމުގައި ހުރި އެންމެ ބޮޑު އެއް ސާފުކުރާ ތެޔޮ އުފައްދާ ކާރުޚާނާ ވަގުތީ ގޮތުން ބަންދުކޮށްފައެވެ. އިރާޤުން ވެސް ތެޔޮ އުފެއްދުން މެދުކަނޑާލުމާ ގުޅިގެން، ދުނިޔޭގެ ތެލާއި ގޭހުގެ ބާޒާރަށް އެކަމުގެ އަޞަރުތައް މިހާރު ވަނީ ކުރަން ފަށައިފައެވެ.
ދުނިޔެއަށް ބޭނުންވާ ހަކަތައިގެ ބޮޑު ބައެއް މެދުއިރުމަތިން ފޯރުކޮށްދެމުންދާއިރު، ގަތަރުގެ ނިންމުން އިޢުލާންކުރުމުގެ ކުރިން ބާޒާރުގައި އެންމެ ބޮޑު ނުތަނަވަސްކަމެއް އުފެދިފައި އޮތީ ކަނޑުމަގުން ތެލާއި ގޭސް އުފުލުމަށް ކުރިމަތިވެދާނެ ހުރަސްތަކާ މެދުގައެވެ.
ޤަތަރުން ގޭސް އުފެއްދުން މިއަދު މަޑުޖައްސާލާުމުން، ނެދަލޭންޑްސްގެ ޓީ.ޓީ.އެފް ހަބްގައި މުއާމަލާތްކުރާ ޔޫރަޕުގެ ގޭހުގެ އަގުތައް މިއަދު މެންދުރުފަހުގެ ވަގުތެއްގައި 45 އިންސައްތައަށް އުފުލި، މެގަވޮޓް ގަޑީރަކަށް ގާތްގަނޑަކަށް 46 ޔޫރޯއަށް އަރައިފިއެވެ. ޔޫރަޕުގެ ބާޒާރުތަކުގެ އަގުތަކާ އެއްހަމައެއްގައި އިނގިރޭސިވިލާތުގެ ގުދުރަތީ ގޭހުގެ އަގުތައް ވެސް ވަނީ ބާރުމިނެއްގައި މައްޗަށް ގޮސްފައެވެ. އެގޮތުން، އެ ގައުމުގެ އެން.ބީ.ޕީ މިންގަނޑުން ބަލާއިރު ގޭހުގެ އަގުތަކަށް ވަނީ ބޮޑު ބަދަލެއް އައިސްފައެވެ.
މީގެއިތުރުން، ހޮރްމުޒް ކަނޑުއޮޅި ހުރަސްކޮށް، ގޭހާއި ތެޔޮ އުފުލާ އުޅަނދުތަކަށް ކުރިމަތިވެފައިވާ ހުރަސްތަކާއެކު، ދުނިޔޭގެ ބާޒާރުގައި ތެޔޮ ފީފާއެއްގެ އަގު ވަނީ 13 އިންސައްތަ އުފުލި، 82 އެމެރިކާ ޑޮލަރަށް އުފުލިފައެވެ. މިއީ މިދިޔަ އަހަރުގެ ޖެނުއަރީ މަހުން ފެށިގެން ތެލުގެ އަގު މިވަރަށް މަތިވި ފުރަތަމަ ފަހަރެވެ.
ޔަހޫދީންގެ ޙަމަލާތަކުގައި އީރާނުގެ ސާފުނުކުރާ ތެލުގެ 90 އިންސައްތަ އުފައްދާ ތެޔޮ ކާރުޚާނާއަކަށް އަމާޒުވެފައިވާކަމަށް ރިޕޯޓުތައް ބުނެފައިވެއެވެ. ނަމަވެސް، އެތަނަށް ލިބުނު ގެއްލުމުގެ ތަފްޞީލެއް އަދި ހާމަކޮށްފައެއް ނުވެއެވެ.
އޯޕެކް ޤައުމުތަކުގެ ތެރެއިން އީރާނަކީ ތިންވަނަ އަށް އެންމެ ގިނައިން ތެޔޮ އުފައްދާ ޤައުމެވެ. މިގޮތުން، ދުނިޔޭގެ ތެލުގެ ސަޕްލައީގެ 4.5 އިންސައްތަ ޙިއްޞާކުރަނީ އީރާނުންނެވެ. އީރާނުން ދުވާލަކު 3.3 މިލިއަން ފީފާ ސާފު ނުކުރާ ތެޔޮ ޢާންމުކޮށް އުފައްދައެވެ.
ޤަތަރުގެ ހަކަތަ އުފައްދާ ކާރުޚާނާއަކަށް އީރާނުގެ ޑްރޯން ޙަމަލާއެއް އަމާޒުވެ، ލިބުނު ގެއްލުންތައް ބަލަމުން އަންނަ ކަމަށް އެ ޤައުމުން ވެސް ބުނެފައިވެއެވެ.