ވަޒީރުގެ އިލްތިމާސް: ކަންކަން ބޮއްސުންލައިގެން ނުދަނީސް ރިޕޯޓުކުރޭ

ކުޅިވަރު އެސޯސިއޭޝަންގައި ހިނގާ ކޮރަޕްޝަނާއި އެހެނިހެން ނުހައްގު މަންފާތަކާއި ޖިނާއީ ކުށްތަކުގެ ވާހަކަތައް، އެ ކަންކަން ބޮއްސުންލައިގެން ނުދަނީސް ކަމާ ގުޅުންހުރި އިދާރާތަކާއި މުއައްސަސާތަކަށް ރިޕޯޓުކުރުމަށް، ކުޅިވަރު އެސޯސިއޭޝަންތަކުގެ ހިންގާ ކޮމިޓީތަކަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު އިލްތިމާސްކުރައްވައިފިއެވެ.

މި ދުވަސްވަރަކީ ރާއްޖޭގެ ބައެއް ކުޅިވަރު އެސޯސިއޭޝަންތަކުގައި ހިނގައިގެން އުޅޭ ހިޔާނާތުގެ މަައްސަލަތަކުގެ ވާހަކަތަކެއް ދެކެވެމުން އަންނަ ދުވަސްވަރެކެވެ.

އެގޮތުން، ފުޓްބޯލް އެސޯސިއޭޝަން އޮފް މޯލްޑިވްސްގެ ފައިސާއަށް ޚިޔާނާތްތެރިވި މައްސަލާގައި އަމީން ކޮންސްޓްރަކްޝަން ޕްރައިވްޓް ލިމިޓެޑްގެ މައްޗަށް ކްރިމިނަލް ކޯޓަށް ހުށަހެޅި މަނީ ލޯންޑަރކުރުމަށް އެހީތެރިވުމުގެ ކުށުގެ ދަޢުވާ ސާބިތުނުވާކަމަށް ކްރިމިނަލް ކޯޓުން ކޮށްފައިވާ ޙުކުމް އިސްތިއުނާފުކުރުމަށް ޕީޖީ އޮފީހުން ވަނީ ފޮނުވާފައެވެ.

މީގެއިތުރުން، ރާއްޖޭގެ ޗެސް އެސޯސިއޭޝަންގެ ރައީސް ނޫޙް އަލީ، އެ އެސޯސިއޭޝަނަށް ސަރުކާރުން ދޭ ފައިސާއަށް ހިޔާނާތްތެރިވިކަމަށް ބުނެ ކުރެވޭ ތުހުމަތުތަކަކާ ގުޅިގެން ކޮމިޝަނަރ އޮފް ސްޕޯޓްސްގެ އޮފީހުން އެ މައްސަލަ ބަލަމުން އަންނަކަން، "ޕީއެސްއެމް ނިއުސް" އަށް ކޮމިޝަނަރ އޮފް ސްޕޯޓްސް ވަނީ ކަށަވަރުކޮށްދެއްވާފައެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި "ޕީއެސްއެމް ނިއުސް" އިން ކުރި ސުވާލަކަށް ޖަވާބުދެއްވަމުން ވަޒީރު އަބްދުﷲ ރާފިއު ވެސް ވަނީ މި މައްސަލަ ތަހުގީގުކުރަމުންދާކަން ހާމަކުރައްވާފައެވެ. ވަޒީރު ވިދާޅުވީ، މިހާރު ކުރަމުންދަނީ ޓްރާންސެކްޝަންތައް ކުރިއަށް ގޮސްފައިވާ ގޮތާއި އެ ނޫންވެސް އެ މައްސަލައާ ގުޅުންހުރި ކަންކަން ބެލުމުގެ މަސައްކަތް ކަމަށެވެ.

މިފަދަ ކަންކަން މަދުކުރުމަށް ނުވަތަ އެ ފުރުސަތު ހަނިކުރުމަށް ކުރެވެން ހުރި ކަންކަން ސަރުކާރުން މިހާރު ވެސް ކުރަމުންދާ ކަމަށް ވަޒީރު ވިދާޅުވިއެވެ. އޭގެ ތެރޭގައި، އޮޑިޓް ފާމަކުން ކޮންމެ އަހަރަކުވެސް ކުޅިވަރު އެސޯސިއޭޝަންތައް އޮޑިޓްކުރުން އެއީ މިފަދަ މައްސަލަތައް މަދުކުރެވޭނެ ކަމެއްކަމަށް ވަޒީރު ވިދާޅުވިއެވެ.

މީގެއިތުރުން މާލީ ކަންތައްތަކާއި އޮޑިޓްކުރުމުގެ ދާއިރާއިން އެސޯސިއޭޝަންތަކުގެ އިދާރީ މުވައްޒަފުން ތަމްރީނުކުރުމުގެ މަސައްކަތް ކޮށްފައިވާނެކަމާއި ކުރިއަށް އޮތް ތަނުގައި ވެސް އެފަދަ ތަމްރީނު ޕްރޮގްރާމުތައް ހިންގާނެކަމަށް ވަޒީރު ވިދާޅުވިއެވެ.

މިހާތަނަށް މިކަމުގައި ހޯދުނު އެންމެ ބޮޑު ކުރިއެރުމަކީ، އެސޯސިއޭޝަންތަކުގެ ޖެނެރަލް ސެކްރެޓަރީންގެ މުސާރަ ބޮޑުކޮށް، އެ ފަރާތްތަކަކީ ފުލްޓައިމްކޮށް އެސޯސިއޭޝަންގައި މަސައްކަތްކުރެވޭނެ ބަޔަކަށް ހެދުމާއި ކޮންމެ އެސޯސިއޭޝަނަކަށް ވެސް ދެ އިދާރީ މުވައްޒަފުން ގެންގުޅެވޭނެ ފަދަ މާލީ އެހީތެރިކަން ފޯރުކޮށްދިނުންކަމަށް ވަޒީރު ވިދާޅުވިއެވެ.

ސަރުކާރުން ކުރި މަސައްކަތްތަކުގެ އިތުރުން އަދިވެސް އެހެން މުހިންމު ކަންތައްތައް ކުރާނެ ކަމަށާއި، މި މަސައްކަތުގައި އެސޯސިއޭޝަންތަކުގެ އެކްސްކޯ މެމްބަރުންގެ އެހީތެރިކަން ބޭނުންވާކަން ފާހަގަކުރައްވައި، މުހިންމު އިލްތިމާސެއް ވަޒީރު ކުރެއްވިއެވެ.

"

އެކްސްކޯ މެމްބަރުންނަށް ވެސް އަޅުގަނޑު ދަންނަވާލަން އޮތް އެއްޗަކީ، މާ ބޮޑަށް ގޯސްވަންދެން ނުތިއްބަވާށޭ. ރެގިއުލާކޮށް ޖަލްސާތައް ބާއްވާ، ވާނުވާ ބެއްލެވުން އެއީ ވަރަށް މުހިންމު ކަމެކޭ އެހެން ދިމާވާ އެސޯސިއޭޝަންތަކުގައި. ޙާއްސަކޮށް އެކަހަލަ ކަމެއް އުޅޭކަން ފާޙަގަކުރެވެންޏާ. ގިނަފަހަރަށް މި އޮންނަނީ މާ ފަހުން އަޅުގަނޑުމެންނަށް އެނގިފައި. އެހެންވީމަ އެ އެކްސްކޯ މެމްބަރުން ވެސް އެ ބޭފުޅުންގެ ރެސްޕޮންސިބިލިޓީ ނަންގަވައި އެކަންކަން ކުރާކަމަށް ވެއްޖެއްޔާ، އޭގެ ތެރޭގައި ތިބޭ ބައެއް މެމްބަރުންނަށް މިހެން ކަތިމަގަކުން ދިއުމުގެ ޗާންސް ވަރަށް ބޮޑަށް ކުޑަވެގެންދާނެ

ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު

ފާހަގަކޮށްލަން ޖެހޭ ގޮތުގައި ރާއްޖޭގެ ބައެއް ކުޅިވަރު އެސޯސިއޭޝަންތަކުގެ އިސް މަގާމުތަކަށް އަންނަ ފަރާތްތަކުން، މަގާމާ ހަވާލުވާތާ ކުޑަ ދުވަސްކޮޅެއްގެ ތެރޭގައި މުސާރައާ ނުބައްދަލު މުއްސަނދިކަމަކާއި އެތައް ކުރިއެރުމެއް ހޯދާތަން ފެނިފައި އެބަހުއްޓެވެ.

މިފަދަ ކަންކަމާ ގުޅިގެން ގިނަބަޔަކު ކަންބޮޑުވުން ފާޅުކުރާއިރު، މި ސަރުކާރުން ވެރިކަމާ ހަވާޅުވިފަހުން މިފަދަ ކަންކަން ކުޅިވަރު އެސޯސިއޭޝަންތަކުގެ ތެރެއިން ކުރެވޭނެ މަގު ހަނިކުރުމަށް މުހިންމު މަސައްކަތްތަކެއް އަންނަނީ ކުރަމުންނެވެ.