އީރާނުން އިސްވެ އެމެރިކާއަށް ޙަމަލާދޭން ރޭވިކަމުގެ މަޢުލޫމާތެއް ޖާސޫސީ އިދާރާތަކަށް ލިބިފައިނުވާ ކަމަށް އެމެރިކާގެ ދިފާޢީ ވުޒާރާއިން ޤާނޫނު ހަދާ މަޖިލިސް، ކޮންގްރެސްގައި އެއްބަސްވެފައިވާކަމަށް ބައެއް މަސްދަރުތަކާ ޙަވަލާދީ ރޮއިޓަރސް ނޫހުން ބުނެފިއެވެ.
އެ މަޢުލޫމާތު ޙިއްޞާކޮށްފައިވަނީ ކޮންގްރެސް އާއެކު ބޭއްވި ބައްދަވުންތަކުގައި ކަމަށް އެ ނޫހުން ރިޕޯޓުކޮށްފައިވެއެވެ.
އީރާނުގެ ފަރާތުން އެމެރިކާއަށް ނުރައްކަލެއް ނެތް ކަމަށް އެނގިތިބެމެ، ޔަހޫދީންގެ ނިރުބަވެރި ދަޢުލަތާ ގުޅިގެން އެމެރިކާގެ އަސްކަރިއްޔާއިން ދަނީ ފެބްރުއަރީ 28އިން ފެށިގެން އީރާނުގެ އެކި ހިސާބުތަކަށް ބޮން އަޅަމުންނެވެ. އެ ޙަމަލާތަކުގައި އީރާންގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަނާޢީ ވަނީ ޝަހީދު ކޮށްލާފައެވެ. އަދި، އެ މަނިކުފާނުގެ ޢާއިލާގެ ގިނަ މެންބަރުންތަކެއްގެ އިތުރުން އީރާންގެ ދިފާޢީ އިދާރާތަކާއި އަސްކަރިއްޔާގެ އިސްވާރުންގެ ތެރެއިން ބަޔަކު ޝަހީދު ކޮށްލާފައެވެ. އެމެރިކާއާއި ޔަހޫދީންގެ ޙަމަލާތަކުގައި އީރާންގެ ޢާންމުންގެ ގިނަ އަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.
މިގޮތުން، ފާއިތުވި ތިން ދުވަހުގެ ތެރޭގައި، އެމެރިކާ އާއި ޔަހޫދީން ވަނީ އީރާނުގެ 1،000އަށް ވުރެ ގިނަ ޢަމާޒަކަށް ޙަމަލާތައް ދީފައެވެ.
ކޮންގްރެސްއަށް ދީފައިވާ މަޢުލޫމާތުން، އެމެރިކާއިން އީރާނަށް ޙަމަލާ ދިނުމުގައި ރައީސް ޑޮނަލްޑް ޓްރަމްޕް މީގެކުރިން ދެއްކެވި ބަހަނާ އާ ފުށުއެރުންތަކެއް ހުރިކަން މިވަނީ ހާމަވެފައެވެ. މިގޮތުން، ޓްރަމްޕް އޭރު ވިދާޅުވެފައިވާ ގޮތުގައި، މެދުއިރުމަތީގައި އެމެރިކާގެ އަސްކަރީ މަރުކަޒުތަކަށް ޙަމަލާދިނުމުގެ ކުރިން، އީރާނު ހުއްޓުވަންޖެހެއެވެ.
ވައިޓް ހައުސްގެ ތަރުޖަމާނު ޑިލަން ޖޯންސަން މީގެ ކުރިން ވިދާޅުވެފައި ވަނީ، ސެނެޓާއި ހައުސް އޮފް ރެޕްރެޒެންޓޭޓިވްސްގެ ޤައުމީ ސަލާމަތާބެހޭ ކޮމިޓީތަކުގެ ޑިމޮކްރެޓިކް އަދި ރިޕަބްލިކަން ޕާޓީގެ މެމްބަރުންނަށް، 90 މިނެޓަށް ވުރެ ގިނައިރު ޕެންޓަގަންގެ އޮފިޝަލުން ވަނީ އީރާނަށް ދިން ޙަމަލާއާ ބެހޭ މަޢުލޫމާތު ޙިއްޞާކޮށްފައެވެ.
މި ބައްދަލުވުންތަކާއި ދިފާޢީ ވުޒާރާގެ އޮފިޝަލުން ވަނީ، ތެހެރާނުން އިސްވެ، އެމެރިކާ ސިފައިންނަށް ޙަމަލާދީފާނެކަމުގެ އެއްވެސް ޖާސޫސީ މަޢުލޫމާތެއް ލިބިފައިނެތް ކަމަށް އެއްބަސްވެފައެވެ.
ޓްރަމްޕް ވިދާޅުވެފައިވާ ގޮތުގައި، އީރާނަށް ޙަމަލާދިނުމުގެ މައިގަނޑު މަޤްޞަދަކީ، ނިއުކްލިއަރ ހަތިޔާރެއް އުފެއްދުމުގެ ޤާބިލުކަން ނައްތާލައި، އެ ޤައުމުގެ ބެލިސްޓިކް މިސައިލް ޕްރޮގްރާމް ހުއްޓުމަކަށް ގެނައުމެވެ.
މިގޮތުން، އެމެރިކާއަށް ޙަމަލާ ދެވޭ ފަދަ މިންވަރަށް އީރާނުން ބެލިސްޓިކް މިސައިލެއް ވަރަށް އަވަހަށް ތަރައްޤީކުރާނެކަމަށް ޓްރަމްޕް ވިދާޅުވެފައިވީނަމަވެސް، އެކަމަށް ބާރުލިބޭފަދަ ޖާސޫސީ މަޢުލޫމާތެއް ލިބިފައިނެތް ކަމަށް ރޮއިޓަރސް ނޫހާ ވާހަކަ ދެއްކި މަސްދަރުތަކުން ވަނީ ބުނެފައެވެ.
އެމެރިކާއިން އީރާނަށް ދެމުންދާ ޙަމަލާތަކުގެ ބޭނުމާމެދު ސުވާލު އުފައްދަން ފަށާފައިމިވަނީ، ރައްދުގައި އީރާނުން މިހާރު ދެމުންދާ ޙަމަލާތަކުގައި އެމެރިކާގެ ސިފައިންގެ ބަޔަކު މަރުވުމާ ގުޅިގެންނެވެ. އެމެރިކާގެ އަސްކަރިއްޔާއިން ބުނީ، އީރާނުން ދެމުންދާ ރައްދު ޙަމަލާތަކުގައި، މިހާތަނަށް އެމެރިކާ ސިފައިންގެ ތިން މީހުން މަރުވެ، އިތުރު ފަސް މީހުންނަށް ސީރިއަސް އަނިޔާތަކެއް ލިބިފައިވާ ކަމަށެވެ.