މެދުއިރުމަތީގައި މިހާރު ހިނގަމުންދާ ވަރުގަދަ ކުރިމަތިލުންތަކުގައި، އީރާނުން ދިން ޙަމަލާތަކެއްގައި އެމެރިކާގެ ހަނގުރާމަމަތީ މަތިންދާބޯޓުތަކެއް ވައްޓާލާފައިވާކަމަށް ބުނެފިއެވެ.
ކުވެއިތުގައި ހުންނަ އެމެރިކާގެ އަސްކަރީ ވައިގެ ބަނދަރު ކައިރިން އެ މަތިންދާބޯޓުތައް ވައްޓާލާފައިވާކަމަށް، ކުވެއިތުގެ ދިފާޢީ ވުޒާރާއިން ބުންޏެވެ.
ނަމަވެސް، އެކަމާ ގުޅޭގޮތުން އެމެރިކާގެ ސަރުކާރުން އަދި ރަސްމީކޮށް އެއްޗެއް ބުނެފައެއް ނުވެއެވެ.
ފެބުރުވަރީ 28ވަނަ ދުވަހު ފެށި ހަނގުރާމައިގައި ތެރެއިން އެމެރިކާގެ އަސްކަރިއްޔާއާއި ޔަހޫދީ ފައުޖުން ދަނީ އީރާންގެ ވެރިރަށް ތަހްރާނާއި ޢާންމުން ދިރިއުޅޭ އެހެން ބޮޑެތި ރަށްތަކަށް ވައިގެ ޙަމަލާ ދެމުންނެވެ. އެ ޙަމަލާތަކުގައި އީރާންގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަނާޢީ ވަނީ ޝަހީދު ކޮށްލާފައެވެ.
ބަދަލު ހިފުމުގެ ގޮތުންނާއި، އީރާންގެ މިނިވަންކަން ދިފާޢު ކުރުމުގެ ގޮތުން އެ ޤައުމުގެ އަސްކަރިއްޔާއިން ވަނީ ޔަހޫދީންނާއި މެދުއިރުމަތީގެ އެކި ޤައުމުތަކުގައި އެމެރިކާގެ ސިފައިން ތިބި މަރުކަޒުތަކަށް ޙަމަލާ ދޭން ފަށާފައެވެ.
އެގޮތުން، އީރާނުން މިއަދު ވެސް ވަނީ ކުވެއިތަށް ވަރުގަދަ ޙަމަލާތަކެއް ފޮނުވާލައިފައެވެ. ކުވެއިތުގެ ދިފާޢީ ވުޒާރާއިން ބުނީ، އީރާނުން ފޮނުވައިލި ގިނަ ޢަދަދެއްގެ ޑްރޯން ޙަމަލާ ނާކާމިޔާބުކޮށްލާފައިވާ ކަމަށެވެ.
ނަމަވެސް، އެ ޙަމަލާތަކުގައި އެމެރިކާގެ ހަނގުރާމަމަތީ މަތިންދާބޯޓުތަކެއް ވައްޓާލާފައިވާކަމަށް އެ ވުޒާރާއިން ބުނެފައިވެއެވެ. އެ މަތިންދާބޯޓުތަކުގައި ދަތުރުކުރި އެމެރިކާ ސިފައިން ސަލާމަތްކޮށް، ހަސްފަތާލަށް ގެންގޮސްފައިވާކަމަށް ވެސް ބުންޏެވެ.
އީރާނުން ފޮނުވައިލި ޑްރޯނެއްގެ ބައިތަކެއް ކުވެއިތުގެ ތެޔޮ ކާރުޚާނާއަކަށް ވެއްޓި، އެތަނުގައި މަސައްކަތްކުރާ ދެ މީހަކު ޒަޚަމްވެފައިވާކަމަށް ވެސް ރިޕޯޓުތައް ބުނެފައިވެއެވެ.
ކުވެއިތަށް ޢަމާޒުކުރަމުންދާ ޙަމަލާތަކާ ގުޅިގެން، އެ ޤައުމުގައި ހުންނަ އެމެރިކާ އެމްބަސީއަށް ނައުމަށް، ކުވެއިތުގައި ދިރިއުޅޭ އެމެރިކާގެ ރައްޔިތުންނަށް އެމެރިކާ ސަރުކާރުން ވަނީ އަންގައިފައެވެ.
އީރާނުން ދެމުންދާ ޙަމަލާތަކާ ގުޅިގެން ކުވެއިތުގެ އިތުރުން، ދުބާއީ އާއި ޤަތަރުގެ ވެރިރަށް ދޯހާގައި ވެސް ބާރުގަދަ ގޮވުންތަކުގެ އަޑުތައް މިއަދުވެސް އިވެމުންދާކަމަށް ރިޕޯޓުތައް ބުނެފައިވެއެވެ.