އެލްޗޭއާއި އެސްޕަންޔޯލް މެޗު މެދުކަނޑާލީ ނަސްލީގޮތުން ދިމާކުރުމުން

ސްޕެނިޝް ލަލީގާގައި އާދިއްތަދުވަހު އެލްޗޭ އާއި އެސްޕެންޔޯލް ބައްދަލުކުރި މެޗު ނަސްލީ ތަފާތުކުރުންތަކުގެ ޕްރޮޓޮކޯލްގެ ދަށުން 3 މިނެޓަށް މަޑުޖައްސާލަންޖެހިއްޖެއެވެ.

މެޗުގެ ރެފްރީ ގަލެޗް އަޕެޒްޓެގިއާ އާއި ހަވާލާދީ މީޑިއާ ރިޕޯޓްތައް ބުނާގޮތުގައި އެސްޕަންޔޯލްގެ އޮމަރު އެލް ހިލާލީ، އެލްޗޭގެ ރަފާ މިރްއަށް ނަސްލީ ގޮތުން ދިމާކުރާފަދަ "ބަސްތަކެއް" ބޭނުންކޮށްގެން އޭނާއާއި ވަނީ ދިމާކޮށްފައެވެ.

އެހެންކަމުން އޭނާ މެޗު ހުއްޓާލީ އެސްޕެންޔޯލްގެ އުމަރު އެލް ހިލާލީ، އެލްޗޭގެ ރަފާ މިރު އޭނާއަށް ނަސްލީ ތަފާތުކުރުން ގެންގުޅޭކަމަށް ބުނެ އެވާހަކަ ހިއްސާކުރުމުން ކަމަށް ރެފްރީ ވަނީ ބުނެފައެވެ.

މިހާދިސާ ހިނގާފައިވަނީ މެޗުގެ 78 ވަނަ މިނެޓުގައެވެ.

ޔޫއެފާގެ ޕްރޮޓޮކޯލްގެ ދަށުން ކުޅުންތެރިއަކު ނަސްލީ ތަފާތުކުރުންތައް ހިންގާ ކަމަށް ބުނެ ރިޕޯޓްކޮށްފިނަމަ ރެފްރީ މެޗެއް ހުއްޓާލާން ޖެހޭނެއެވެ. އަދި ހަތަރުވަނަ އޮފިޝަލަށް ތަފްސީލު ދޭން ޖެހޭނެއެވެ.

އެސްޕެންޔޯލް އިން ފަހުން ވަނީ ސްޕެއިންއަށް އުފަން މޮރޮކޯގެ ކުޅުންތެރިޔާ، އުމުރުން 22 އަހަރުގެ އެލް ހިލާލީގެ ފޮޓޯއެއް ސޯޝަލް މީޑިއާގައި އާންމުކޮށް، ކެޕްޝަންގައި "ވިތު ޔޫ" ޖަހާ އާންމުކޮށް އޭނާއާއި އެކުގައި ކުލަބުން ވާކަން ހާމަކޮށްދޭން މަސައްކަތްކޮށްފައެވެ.

ލަލީގާއިން ބުނީ ނަސްލީ ތަފާތުކުރުން ގެންގުޅޭ ކޮންމެ އަމަލެއް ކުށްވެރިކުރާ ކަމަށާއި، ދަނޑުގައި ވެސް އަދި ދަނޑުން ބޭރުގައި ވެސް ނަފްރަތު އުފައްދާ މީހުންނަށް ޖާގައެއް ނެތް ކަމަށެވެ.

އެލްޗޭއިން ބުނެފައިވަނީ ނަސްލީ ތަފާތުކުރުމުގެ އެއްވެސް އަމަލެއް ހިންގާފައިވާނަމަ އެކަން ކުށްވެރިކުރާ ކަމަށާއި، އެހެންނަމަވެސް "ހެކި ނެތް" ހާލަތްތަކަށް ސަމާލުވާން ޖެހޭ ކަމަށެވެ.

ދާދިފަހުން ރެއާލް މެޑްރިޑްގެ، ވިނީޝިއަސް ޖޫނިއާއަށް ދަނޑުމަތީގައި ނަސްލީ ތަފާތުކުރުންތަކާއި ދިމާވި މައްސަލަތަކެއްވެސް ފެންމަތިވެ ކަމާބެހޭ ފަރާތްތަކުން ވަނީ ފިޔަވަޅު އަޅާފައެވެ.