ލިވަޕޫލުގެ ކުޅުންތެރިން މެޗުތަކުގައި، ހިލޭޖެހުންތަކުގެ ބޭނުން އެންމެ ފުރިހަމަގޮތުގައި ހިފައި، ހިލޭ ޖެހުންތަކުގައި ހޯދާފައިވާ ކުރިއެރުންތަކާ މެދު އުފަލުން ހުރިކަން އެ ކުލަބުގެ ކޯޗު އާނޭ ސްލޮޓް ބުނެފިއެވެ.
ވެސްޓްހަމް ޔުނައިޓެޑާ ދެކޮޅަށް ކުޅެ 2-5 ގެ ފަރަގުބޮޑު ނަތީޖާއަކުން މޮޅުވި މެޗަށްފަހު ސްލޮޓް ވަނީ ލިވަޕޫލްގެ ކުޅުންތެރިން ދެއްކި ކުޅުމަށް ވަރަށް ބޮޑަށް ތައުރީފުކޮށްފައެވެ.
މި މެޗުގެ ފުރަތަމަ ހާފު ނިމުނުއިރު ލިވަޕޫލް އޮތީ ތިން ލަނޑުގެ ލީޑެއްގައެވެ. ފާހަގަކޮށްލަން ޖެހޭ ގޮތުގައި ހޫގޯ އެކިޓިކޭ، ވާޖިލް ވެންޑައިކް އަދި މެކެލިސްޓާ ޖަހައިދިން މި ތިން ލަނޑަކީ ވެސް ސެޓް ޕީސްގައި، ކޯނަރުން ތަނަވަސްވި ފުރުސަތުތަކުން އެ ކުޅުންތެރިން ޖަހައިދީފައިވާ ލަނޑުތަކެކެވެ.
ސްލޮޓް ބުނީ، މި މެޗުން ލިވަޕޫލް މޮޅުވީ ހިލޭ ޖެހުންތަކުގައި ހޯދުނު ކުރިއެރުންތަކުގެ ސަބަބުން ކަމަށާއި އެކަމާ މެދު ނުހަނު ހިތްހަމަޖެހޭ ކަމަށެވެ.
މިއީ މި ސީޒަނުގައި ލިވަޕޫލުން ކުޅުނު އެންމެ ރަނގަޅު މެޗު ނޫންކަމަށާއި މިއަށްވުރެ މޮޅަށް ކުޅެ ވެސް ބައެއް މެޗުތަކުން ބަލިވެފައިވާ ކަމަށެވެ. އެހެންނަމަވެސް މި މެޗުން ހޯދި މޮޅާއެކު ލިބެމުންދާ ތައުރީފުގެ ބަސްތަކާމެދު ނުހަނު އުފާވާކަމަށް އާނޭ ސްލޮޓް ބުންޏެވެ.
ސްލޮޓް އިތުރަށް ބުނީ، ސީޒަނުގެ ކުރީކޮޅުގައި ވެސް ލިވަޕޫލުން މެޗުތަކުގައި ގިނަ ފުރުސަތުތަކެއް ސެޓް ޕީސްތަކުން ތަނަވަސްކުރި ކުރި ކަމަށާއި، އެހެންކަމުން ގޯސް ދުވަސްތަކަކަށްފަހު ޓީމު އެނބުރި އާންމު ހާލަތަށް އައިކަމުގެ އިހުސާސްކުރެވޭކަމަށް ވެސް ސްލޮޓް ބުންޏެވެ. މިއީ މުޅި ޓީމާއި ޓީމުގެ ސަޕޯޓަރުންނަށް ވެސް އުފާވެރި ދުވަސްތަކެއް ކުރިއަށް އޮތްކަމުގެ ފެހި ސިގްނަލެއްކަމަށް އޭނާ ބުންޏެވެ.
ލިވަޕޫލުން ވެސްޓްހަމްއާ ދެކޮޅަށް ކުޅެ ފުރަތަމަ ހާފުގައި ތިން ލަނޑު ޖަހާފައިވަނީކޮށް ދެވަނަ ހާފަށް ނުކުމެ ހަތަރު މިނެޓުގެ ތެރޭގައި ވެސްޓްހަމް އިން ލަނޑެއްޖަހައި ފަރަގު ކުޑަކުރިއެވެ.
އެފަހުން، އަނެއްކާވެސް ލިވަޕޫލުން 70 ވަނަ މިނެޓުގައި ލަނޑެއް ޖަހައި އަލުން ލީޑުފުޅާކުރިއިރު އޭގެ ފަސް މިނެޓުފަހުން ވެސްޓްހަމްއިން އަލުން ލަނޑެއް ޖަހައި ފަރަގު ކުޑަކުރިއެވެ. ތިންވަނަ ފަހަރަށް ލިވަޕޫލުން ލީޑުފުޅާކުރި ލަނޑު ޖެހީ 82 ވަނަ މިނެޓުގައެވެ.
ލިވަޕޫލަށް ލީގު ތާވަލުގައި ލިބެނީ ފަސްވަނައެވެ. އެއީ 28 މެޗުން 48 ޕޮއިންޓާއެކުއެވެ.