އިސްރާޢީލޭ ކިޔުނު ޔަހޫދީ ދައުލަތުން، މުސްލިމުންގެ މުޤައްދަޞް ބިން، ފަލަސްޠީނުގައި ހިންގަމުން ގެންދާ ލާއިންސާނީ އަމަލުތަކާ ދެކޮޅަށް، ފަލަސްޠީނުގެ ރައްޔިތުންގެ ހައްގުގައި ދުނިޔެ ދުށް އެންމެ މޮޅު އެއް ފުޓުބޯޅަ ކޯޗު، ޕެޕް ގާޑިއޯލާ އަސަރުގަދަ ސްޕީޗެއް ދީފިއެވެ.
މީގެކުރިން ވެސް އެކި މަންސަތަކުގައި ފަލަސްޠީނުގެ ހައްގުގައި ވަކާލާތުކޮށް ވާހަކަދައްކާފައިވާ ގާޑިއޯލާ ވަނީ، ސްޕެއިންގެ ބާސެލޯނާގައި ބޭއްވި ޗެރިޓީ ކޮންސާޓެއްގައި މުހިންމު ވާހަކަތަކެއް ދައްކާފައެވެ.
ފަލަސްޠީނުގެ ރަމްޒެއްކަމަށްވާ ކެފާޔާ ސްކާފެއް ކަރުމަތީގައި އޮޅާލައިގެން ހުރެ ވާހަކަދައްކަމުން ގާޑިއޯލާ ވަނީ، ފަލަސްޠީނުގެ ކުޑަކުދިން ތަހައްމަލުކުރަމުންދާ ހިތްދަތި ހާލަތާއި، މީސްމީޑިއާއިން ފެނުނު ބައެއް މަންޒަރުތަކުގެ ވާހަކަ ހިއްސާކޮށްފައެވެ. ކުޑަކުއްޖަކު، އެ ކުއްޖާގެ މަންމަ ނުފެނިގެން ރޮއެ އާދޭސްކުރަމުންދިޔަ މަންޒަރު މީސްމީޑއާއިން ފެނުނު ކަމަށާއި، އެ މަންޒަރު އަދިވެސް ލޮލަށް ސިފަވަމުންދާކަމަށް ގާޑިއޯލާ ބުނެފައިވެއެވެ.
މިއަދާ ހަމައަށް އައި އިރުވެސް އެ ތުއްތު ކުއްޖާއަށް އޭނާގެ މަންމަ ފެނުނުކަމެއް ވެސް ނުވަތަ ނުފެންނަކަން ވެސް ޔަގީން ނުވާ ކަމަށާއި އެވަގުތު އެ ތުއްތު ފުރާނައިގެ ބޮލުތެރޭގައި އުފެދޭނެ ސުވާލުތައް އިހުސާސްކޮށްލަންވެސް ނޭނގޭކަމަށް އޭނާ ބުންޏެވެ.
"އެކުއްޖާ ހިތަށް އަރާނެދޯ އަހަރުމެން އެކަކުވެސް އޭނާއާ އަޅާ ނުލިޔޭ. އަހަރުމެން އޭނާ ދޫކޮށްލިއްޔޭ ވާނެގޮތެއް ވާން. އަހަރެންނަށް ވެސް ގަބޫލުކުރެވެނީ ދޫކޮށްލެވުނީކަމަށް". ގާޑިއޯލާ ބުންޏެވެ.
ގާޑިއޯލާ ވަނީ ދުނިޔޭގެ ބޮޑެތި ބާރުތައްކަމަށް ބުނާ ގައުމުތަކުގެ ވެރިންނަށް ވެސް ފާޑުކިޔުންތައް އަމާޒުކޮށްފައެވެ. އެގޮތުން، މިހާރުވެސް އެތައް ބަޔަކު ފަލަސްްޠީނުގައި ޝަހީދުކޮށްލަމުންދާއިރު އެކަމާ އެއްވެސް ބަޔަކު އަޅާ ނުލާ ކަމަށާއި، އެއީ ބޮޑެތި މަގާމުތަކުގައި ތިބި މީހުންގެ "ފިނޑިކަމުގެ" ސަބަބުންކަމަށް ގާޑިއޯލާ ބުންޏެވެ. އަދި އިސްރާޢީލުން ކުރާ ކަމަކީ، ތަސައްރަފު ނުފުދޭ ޅަ ކުދިން ފޮނުވައިގެން، މައުސޫމް ކުޑަކުދިންތަކެއް މެރުންކަމަށް ބުނެ ގާޑިއޯލާ ވަނީ ފާޑުކިޔުންތައް އަމާޒުކޮށްފައެވެ.
މިއީ ފަލަސްޠީނުގެ ހައްގުގައި، އިންސާނިއްޔަތަށްޓަކައި ތެދުވަންވީ ވަގުތުކަމަށް ބުނެ، އަތްއުރާލައިގެން ނުތިބުމަށް ގާޑިއޯލާ ގޮވާލިއެވެ.
ފާޙަގަކޮށްލަން ޖެހޭ ގޮތުގައި ގާޑިއޯލާ މި ކޮންސަޓަށް ގޮސްފައިވަނީ، ހުކުރު ދުވަހު ބޭއްވި މެންޗަސްޓަރ ސިޓީގެ ފަރިތަކުރުންތަކަށް ހާޒިރުނުވެއެވެ.