"ބީއެމްއެލްއަށް ލިބޭ ފައިދާ އިތުރުވުމަކީ މުޅި ރާއްޖެއަށް ފައިދާ ކުރާނެ ކަމެއް"
-
މާލީ ފައިދާއިތުރުވެ، ޚިދުމަތްތައް ފުޅާކުރުމަށް ފުރުސަތު ލިބޭ
-
މިއަހަރުތެރޭ 70 ޑޮލަރު އޭޓީއެމް ބަހައްޓާ 12 ބުރާންޗު ހުޅުވާނެ
ބޭންކު އޮފް މޯލްޑިވްސް، ބީއެލްއެމްއަށް ލިބޭ މާލީ ފައިދާ އިތުރުވެ، ޚިދުމަތްތައް ފުޅާވުމަކީ އޭގެ ފައިދާ މުޅި ރާއްޖެއަށް ކުރާނެ ކަމެއްކަމުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ.
ވަޒީރު ވަނީ ބޭންކަށް މިހާރު އަންނަމުންދާ ކުރިއެރުންތަކާއި އެކު، މުޅި ޤައުމަށް އެކަމުގެ ސަބަބުން ލިބެމުންދާ ފައިދާތައް ފާހަގަކުރައްވާފައެވެ.
ބީއެމްއެލް ކުޑަހުވަދޫ ބުރާންޗުގެ އައު އިމާރާތް ހުޅުވުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކެވިވާހަކަފުޅުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވީ ދިވެހިންގެ ޤައުމީ ބޭންކަށް މިހާރު ބޮޑެތި ކުރިއެރުންތަކެއް ލިބެމުންދާ ކަމަށެވެ. ވަޒީރު ވިދާޅުވީ މާލީގޮތުން ބޭންކަށް ލިބެމުންދާ ކުރިއެރުންތަކުގެ ފައިދާ މުޅި ރާއްޖެއަށް ކުރާ ކަމަށެވެ.
"ދިވެހި ޤައުމީ ބޭންކުގެ އަސްލު މަޤާމަށް އަންނަތަން މި ފެންނަނީ، މުސްތަޤުބަލްގައި މިކަންތައް އިތުރުވެގެންދާނެ ކަމަށް ގަބޫލުކުރަން، ބޭންކުގެ ފައިދާ އިތުރުވީމަ، އޭގެ ނަތީޖާއަކީ މުޅި ރާއްޖޭގެ ކުރިއެރުމަށް އެހީވެދޭ" ވަޒީރު ޒަމީރު ވިދާޅުވިއެވެ.
ރާއްޖޭގެ އިޤްތިޞާދު ފުޅާކުރުމުގައި ވިޔަފާރިތަކަށް އަންނަ ކުރިއެރުން މުހިއްމުކަން ފާހަގަކުރައްވާ ވަޒީރު ޒަމީރު ވިދާޅުވީ މިމަސައްކަތުގައި ޤައުމީ ބޭންކުގެ ދައުރު ބޮޑު ކަމަށެވެ. ޤައުމީ ބޭންކު ފުޅާކުރުމަށް ހުރިހައި އެންމެން ގުޅިގެން މަސައްކަތްކުރުމަށް ވަޒީރު ވަނީ އިލްތިމާސްކުރައްވާފައެވެ.
ވަޒީރު ޒަމީރު ވަނީ ބޭންކާ ހަވާލުކުރާ މަސައްކަތްތައް ކަނޑައެޅޭ ތާރީޚުތަކަށް މަސައްކަތްތައް ނިންމާކަން ފާހަގަކުރައްވާފައެވެ. އެގޮތުން މިއަހަރު ހާއްސަވެގެންދާނީ ބީއެމްއެލްގެ ޑޮލަރު އޭޓީއެމް ބަހައްޓާ ބުރާންޗުތައް އިތުރުކުރުމަށް ކަމަށެވެ. ވަޒީރު ވިދާޅުވީ މިއަހަރުތެރޭ ބީއެމްއެލްގެ 70 ޑޮލަރު އޭޓީއެމް ބަހައްޓާ 12 ބުރާންޗު ހުޅުވިގެންދާނެކަމަށެވެ.
"ޑޮލަރު އޭޓީއެމްތަކުގެ ސަބަބުން ރާއްޖޭގެ އެކި ހިސާބުތަކުގައި ގެސްޓުހައުސްތައް ފަދަ ސިނާއަތްތައް އިތުރުވެގެންދާއިރު، އާއްމު ފަރުދުންނާ ވިޔަފާރިތަކަށް ފަސޭހަވެގެންދާނެ،" ވަޒީރު ޒަމީރު ވިދާޅުވިއެވެ.
ވަޒީރު ވަނީ ބީއެމްއެލްއަށް އިތުރު ކުރިއެރުންތައް ލިބޭނެ މަގު ފަހިކޮށްދިނުމަށް މަސައްކަތްތަކެއް ކުރަން ޖެހޭ ކަމަށް ވިދާޅުވެފައެވެ. އެގޮތުން ބީއެމްއެލްއަށް ސީދާ ވިޔަފާރީގައި ބައިވެރިވެވޭނެ ނިޒާމެއް ރޭވުން މުހިއްމު ކަމަށް ވަޒީރު ވިދާޅުވިއެވެ.