ގޯލްޑަން ފުޓްސަލް ޗެލެންޖް 2026 ގެ ޒޯން ބުރުގައި ޒޯން 8 ނުވަތަ މާލެއަށް ޙާއްސަ ޒޯނުން، ރައުންޑް އޮފް 16 ގެ ޖާގަތައް ވިލިމާލެއާއި މައްޗަންގޯޅިން ހޯދައިފިއެވެ.
ވިލިމާލެއިން ގަދަ 16 ގެ ޖާގައެއް ހޯދީ ޒޯން ބުރުގައި ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށް، މި ޒޯނަށް ޙާއްސަ ގުރޫޕުގެ އެއްވަނައިގެ ގޮތުގައެވެ.
މި ބުރުގައި ވިލިމާލެއިން ކުޅުނު ފަހު މެޗުގައި، ހުކުރު ދުވަހުގެރޭ ވަނީ މާފަންނުގެ މައްޗަށް 1-4 ގެ ނަތީޖާއަކުން ކުރިހޯދާފައެވެ.
މި މެޗުގައި ވިލިމާލޭގެ ލަނޑުތައް ޖަހައިދިނީ އިސްމާޢީލް ވަޖީހު (ވައްޖެ) އާއި ޢަބްދުﷲ ސަމީޙް މޫސާގެ އިތުރުން އަޙްމަދު ބައްސާމް މުޙައްމަދު ނައީމެވެ. ވަޖީހު ވަނީ މެޗުގައި ދެ ލަނޑު ޖަހައިފައެވެ. މެޗުގެ މޮޅު ކުޅުންތެރިއަކަށް ހޮވުނީ ވެސް ވަޖީހުގެއެވެ.
މި ޒޯނުން، މުބާރާތުގެ ގަދަ 16 ގެ ޖާގައެއް މައްޗަންގޯޅިން ކަށަވަރުކުރީ މި ބުރުގައި އެ ޓީމުން ކުޅުނު ފަހު މެޗުގައި ހުޅުމާލެއާ ދެކޮޅަށް ކުޅެ އެއްވަރުވެ، ޕޮއިންޓެއް ހޯދައިގެންނެވެ.
މި ދެ ޓީމުގެ ކުރިމަތިލުން އެއްވަރުވީ 2-2 ގެ ނަތީޖާއަކުންނެވެ.
މެޗުގައި މައްޗަންގޯޅީގެ ދެ ލަނޑު ވެސް ޖަހައިދިނީ އަޙްމަދު ޙުސެއިންއެވެ. ހުޅުމާލޭގެ ލަނޑުތައް ޖަހައިދިނީ އަޙްމަދު މައީޝް މުޙައްމަދާއި އަޙްމަދު މަހުދީއެވެ.
މެޗުގެ މޮޅު ކުޅުންތެރިއަކަށް ހޮވުނީ އަޙްމަދު ޙުސެއިނެވެ.
މާލެއަށް ޚާއްސަ ޒޯން 8 ގެ ޕޮއިންޓް ތާވަލުގެ އެއްވަނަ ހޯދި ވިލިމާލެއަށް ތިން މެޗުން ހަ ޕޮއިންޓު ލިބިފައިވެއެވެ. ދެވަނައިގައި އޮތް މައްޗަންގޯޅިއަށާއި ތިންވަނަ ލިބުނު ހުޅުމާޅެއަށް ވެސް ހަަތަރު ޕޮއިންޓު ލިބިފައިވެއެވެ. މައްޗަންގޯޅިއަށް ތާވަލުގައި ކުރި ލިބި ގަދަ 16 ގެ ޖާގައެއް ލިބިފައިވަނީ ޖަހައިފައިވާ ލަނޑުން ކުރި ލިބޭތީއެވެ. މި ގުރޫޕުގެ ފުލުގައި އޮތް މާފަންނަށް ތިން ޕޮއިންޓު ލިބިފައިވެއެވެ.