އޮސްޓްރޭލިއާގައި މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ފައިނަލުގެ ޖާގައެއް ސަރބިޔާގެ ނޯވަކް ޖޮކޮވިޗް ހޯދައިފި އެވެ.
އުމުރުން 38 އަހަރުގެ ޖޮކޮވިޗް މި މުބާރާތުގެ ފައިނަލުގެ ޖާގައެއް ހޯދާފައިވަނީ ކުރިން ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާގެ ގޮތުގައި ހުރި އިޓަލީގެ ޔަނިކް ސިނާ އާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު ތިން ސެޓު ދެ ސެ ޓުން މެޗު ކާމިޔާބުކޮށްގެންނެވެ.
މި މެޗުގެ ފުރަތަމަ ސެޓު ތިނެއް ހައެއްގެ ނަތީޖާއަކުން ސިނާ ކާމިޔާބު ކުރި ނަމަވެސް ހައެއް ތިނެއްގެ ނަތީޖާއަކުން ދެވަނަ ސެޓު ޖޮކޮވިޗް ވަނީ ކާމިޔާބުކޮށްފަ އެވެ. އަދި ތިންވަނަ ސެޓު ހަތަރެއް ހައެއްގެ ނަތީޖާއަކުން ސިނާ ކާމިޔާބުކުރިއިރު މި މެޗުން އޭނާ މޮޅުވާނެ ކަމަށް ގިނަޔަބަކު ގަބޫލުކުރި އެވެ. ނަމަވެސް ހަތަރުވަނަ ސެޓާއި ފަސް ވަނަ ސެޓު ހައެއް ހަތަރެއްގެ ނަތީޖާއަކުން ޖޮކޮވިޗް ވަނީ ކާމިޔާބުކޮށްފަ އެވެ.
އޮސްޓްރޭލިއަން އޯޕަން ޓެނިސް މުބާރާތް މީގެ 18 އަހަރު ކުރިން ފުރަތަމަ ފަހަރަށް ޖޮކޮވިޗް ކާމިޔާބު ކުރިއިރު މި އަހަރުގެ މުބާރާތުގެ ފައިނަލުން ޖާގަ ހޯދުމާއިއެކު އޭނާ ވެފައިވަނީ މި މުބާރާތުގެ ފައިނަލުން ޖާގަ ހޯދި އެންމެ ދުވަސްވީ ކުޅުންތެރިޔާއަށް ވެފަ އެވެ.
މި މުބާރާތުގެ ފައިނަލުގައި ޖޮކޮވިޗް އާއި ދެކޮޅަށް ނިކުންނާނީ ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާގެ ގޮތުގައި މިވަގުތު ހުރި ސްޕެއިންގެ ކާލޮސް އަލްކަރާޒް އެވެ.
އަލްކަރާޒް މި މުބާރާތުގެ ފައިނަލުގެ ޖާގަ ހޯދާފައިވަނީ އެލެކްޒެންޑަރ ޒްވްރޭވް އާއި ދެކޮޅަށް ކުޅުނު މެޗު ފަސް ސެޓަށްގޮސް ދެ ސެޓު ތިން ސެޓުން މެޗު ކާމިޔާބުކޮށްގެންނެވެ. މި މެޗުގެ ސެޓުތައް އަލްކަރާޒް ކާމިޔާބުކޮށްފައިވަނީ ހައެއް ހަތަރެއް, ހަތެއް ހައެއް, ހައެއް ހަތަރެއް, ހައެއް ހަތެއް އަދި ހަތެއް ފަހެއްގެ ނަތީޖާއަކުންނެވެ.
މި މެޗުގެ ތިންވަނަ ސެޓުގައި އަލްކަރާޒްގެ ފަޔަށް ލިބުނު އަނިޔާ އަކާއި ގުޅިގެން އޭނާއަށް ފަރުވާ ދީފައިވާއިރު, ޖަރުމަނަށް އުފަން ޒްވެރޭވް ބުނެފައިވަނީ އެއީ އޮފިޝަލުންނަށް ދެވިގެންދާނެ ފަދަ މެޑިކަލް ޓައިމް އައުޓެއް ނޫން ކަމަށެވެ.