އަލިފާނުގެ ހާދިސާގައި ހިޔާ ޓަވަރުގެ ފާހާނާ ހޮޅިއަށް ގެއްލުންތަކެއް!

ހުޅުމާލެ ދެވަނަ ފިޔަވަހީގެ ހިޔާ ފްލެޓުގެ 5 ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން ފާހާނާ ހޮޅިއަށް ގެއްލުންވެފައިވާތީ އެންޑީއެމްއޭއިން ހަރަކާތްތެރިވާން ފަށައިފި.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ވިދާޅުވީ، މި ހާދިސާގެ ސަބަބުން އިމާރާތުގެ މައި ފާހާނާ ހޮޅިއަށް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި މި ގެއްލުންތަކާ ގުޅިގެން އެ ޓަވަރުގެ ބައެއް އެޕާޓްމަންޓުތަކުގެ ފާހާނާ ބޭނުން ނުކުރެވޭ ކަމަށް އިންސިޑެންޓް ކޮމާންޑަރު މައުލޫމާތުދެއްވާފައިވާ ކަަމަށް އެ އޮތޯރިޓީން ވިދާޅުވެއެވެ.

އެންޑީއެމްއޭއިން ވިދާޅުވީ، މިހާދިސާއާއި ގުޅިގެން ލިބުނު ގެއްލުންތައް ދެނެގަނެ، މަރާމާތުގެ މަސައްކަތްތައް އަވަސް ކުރުމަށްޓަކައި އެ އޮތޯރިޓީގެ އިތުރުން އެމްއެންޑީއެފްއާއި، ދިވެހި ފުލުހުންގެ ޚިދުމަތާއި، އެޗްޑީސީއާއި، އެމް.ޑަބްލިއު.އެސް.ސީގެ އިތުރުން ސްޓެލްކޯއިން ގުޅިގެން މަސައްކަތް ކުރަމުންދާ ކަމަށެވެ.

ހިޔާ ފްލެޓުގެ 5 ވަނަ ޓަވަރުގައި އަލިފާނުގެ ހާދިސާ ހިނގާފައިވަނީ މިރޭ ހަތެއް ޖަހާކަށްހާއިރެވެ. އަދި އެމްއެންޑީއެފް ހުޅުމާލެ ފަޔަރ ސްޓޭޝަނުން ވަނީ އަލިފާން ނިއްވުމުގެ މަސައްކަތުގައި ހަރަކާތްތެރިވެ، އަލިފާންގަނޑު ކޮންޓްރޯލް ކޮށްފައެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބުނު ކަމުގެ ރިޕޯޓެއް އަދި ލިބިފައެއް ނުވެއެވެ.