ބަނގުރާ އުފައްދަން ގެންގުޅޭ ސާމާނުތަކެއް ފުވައްމުލަކުން އަތުލައިގެންފި

ބަނގުރާ އުފެއްދުމަށް ބޭނުންކުރާ ކަމަށް ބެލެވޭ ގިނަ އަދަދެއްގެ ތަކެތި ފުވައްމުލަށް ސިޓީއިން ފުލުހުން ހޯދައިފިއެވެ.

މިތަކެތި ހޯދާފައިވަނީ މަސްތުވާތަކެއްޗާއި، ބަނގުރަލާއި ދެކޮޅަށް ފުވައްމުލައް ސިޓީ ފުލުހުން ކުރައްވަމުން ގެންދަވާ މަސައްކަތުގެ ތެރެއިން، މި މަހުގެ 29 ވަނަ ދުވަހު ހިންގި ޚާއްޞަ އޮޕަރޭޝަނެއްގައެވެ.

ފުލުހުން ވިދާޅުވީ، މި އޮފަރޭޝަނުގައި ފުވައްމުލައް ސިޓީގެ އެކި ސަރަޙައްދުތަކުގެ ވަލުތެރެ ބަލައި ފާސްކޮށްފައިވާ ކަމަށެވެ. އަދި ބަނގުރާ ކަމަށް ބެލެވޭ އެއްޗެއް ހުރި ފުޅިތަކަކާއި، ހަންތަކެއްގެ އިތުރުން ބަނގުރާ އުފެއްދުމަށް ބޭނުންކުރާ ކަމަށް ބެލެވޭ ސާމާނު ފެނިފައިވާ ކަމަށެވެ.

މި މައްސަލައާއި ގުޅިގެން އަދި މީހަކު ހައްޔަރުކޮށްފައިނުވާ ކަމަށް ފުލުހުން ވިދާޅުވެއެވެ.

ފުލުހުން ދަނީ، މިމައްސަލަ އިތުރަަށް ތަޙުޤީޤު ކުރައްވަމުންނެވެ.