ޗެމްޕިއަންސް ލީގުގައި ރެއާލް މެޑްރިޑް ބަލިކުރި މެޗުގައި އޭނާގެ ޓީމުން މެޗުގެ ފަހު މިނިޓްގައި ޖެހި ފަހު ގޯލާއެކު މާބޮޑަށް އުފާފާޅު ކުރެވުނީތީ ކޯޗު އަލްވާރޯ އާބެލޯއާ ކިބައިން މައާފަށް އެދޭ ކަމަށް ޕޯޗުގަލްގެ ބެންފީކާގެ ކޯޗު ހޯސޭ މޮރީނިއޯ ބުނެފި އެވެ.
މި މެޗު 4-2އިން ބެންފިކާ ކާމިޔާބު ކުރުމުން އެ ޓީމު ވަނީ ޕްލޭއޯފް ބުރަށް ކޮލިފައިވެފަ އެވެ. ނަމަވެސް ރެއާލް މެޑްރިޑަށް ވަނީ ގަދަ އަށަކުން ފުރުސަތު ގެއްލި ޕްލޭއޯފް ކުޅެފަ އެވެ.
މޮރީނިއޯ ބުނީ ރެއާލްގެ މިހާރުގެ ކޯޗު އާބެލޯއާ އަކީ އޭނާ ރެއާލް މެޑްރިޑުގައި ކޯޗުކޮށްދިން ކުޅުންތެރިއެއް ކަމަށާއި އަދި އޭގެ ފަހުން ދެ މީހުންނަކީ ވަރަށް ގާތް ދެ މީހުން ކަމަށެވެ.
"އަހަރެން މައާފަށް އެދެން އެހާވަރަށް އުފާފާޅު ކުރެވުނީތީވެ. ދެން އަހަރެން ދެކޭ ގޮތުގައި އާބެލޯ އަކީ ފުޓްބޯޅައިގެ މީހެއް. އޭނާ އަށް އެނގޭނެ އެ ވަގުތުގެ އިހުސާސް ހުންނާނެ ގޮތް. އަހަރުމެން ކޮލިފައިވާން އޮތީ އެ ގޯލު ޖަހައިގެން. އަހަރެން މަސައްކަތް ކުރީ އަހަރެންގެ ޓީމު މޮޅުކޮށްދޭން،" މޮރީނިއޯ ބުންޏެވެ.
އޭނާ އަދި ބުނީ މި މެޗުން ބަލިވި ނަމަވެސް ރެއާލް މެޑްރިޑަކީ ޗެމްޕިއަންސް ލީގު ކާމިޔާބު ކުރެވިދާނެ ޓީމެއް ކަމަށެވެ.
މޮރީނިއޯ ވަނީ މެޗުގެ ކުރިން އާބެލޯއާއާ އޮތް ގުޅުން ފާހަގަކޮށް އޭނާ އަށް ކާމިޔާބު ލިބުމަށް އެދޭކަމަށް ބުނެފަ އެވެ.
"އަލްވާރޯ (އާބެލޯއާ) އަކީ އަހަރެންގެ ކުރީގެ ކުޅުންތެރިއެއް. އޭނާ އަކީ އަހަރެން ވަރަށް ގަޔާވި ކުޅުންތެރިއެއް. އޭނާ އަކީ އެންމެ މޮޅު ކުޅުންތެރިޔާ އަށް ނުވެދާނެ. އެކަމަކު އޭނާ އަކީ ރެއާލް މެޑްރިޑުގައި މޮޅަށް ކުޅުނު ކުޅުންތެރިއެއް. އަހަރެން އޭނާ އަށް ކާމިޔާބު ލިބުމަށް އެދެން. އެކަމަކު މި މެޗު ފިޔަވައި،" މޮރީނިއޯ ބުންޏެވެ.
މެޗުގެ ކުރިން އާބެލޯއާ ވެސް ބުނީ މޮރީނިއޯ އޭނާއާ ބެހޭ ގޮތުން ދެއްކި ވާހަކަތަކަށް ޝުކުރު އަދާ ކުރާ ކަމަށެވެ. އަދި މޮރީނިއޯ އަކީ އޭނާގެ ކެރިއަރުގައި ވަރަށް މުހިންމު މީހެއް ކަމަށެވެ.
"ހަމައެކަނި ދަނޑުމަތީގައި އެކަންޏެއް ނޫން. ދަނޑު ބޭރުގައި ވެސްމެ. އަހަރުމެން ދެ މީހުންކީ މިހާރު ރަހުމަތްތެރިން. އަހަރެން މިހުރީ މާދަމާ (މިރޭ) އޭނާއާ ބައްދަލުކުރަން ކެތްމަދުވެފައި. އަދި އޭނާގެ ގައިގައި ބައްދާލަން ބޭނުން،" އާބެލޯއާ ބުންޏެވެ.
އޭނާ ބުނީ ވާދަވެރި މެޗަކަށް މޮރީނިއޯއާ ދެކޮޅަށް ނުކުންނައިރު އެއީ ކާކުކަމާއި ކިހާވަރެއްގެ މޮޅު ކޯޗެއްކަން ވަރަށް ރަނގަޅަށް އެނގޭ ކަމަށެވެ. އަދި "އަހަރެން މޮރީނިއޯ ކޮޕީ ކުރަން އުޅެފިނަމަ އަހަރެން ވާނީ ފެއިލް،" ކަމަށެވެ.