އޮޅުވާލައިގެން އެހެން ގައުމެއްގެ ހަތް ކުޅުންތެރިން މެލޭޝިޔާ ކުޅުންތެރިންނަށް ހެދި މައްސަލަ ނާކާމިޔާބު ނުވުމުން މެލޭޝިޔާގެ ފުޓްބޯޅަ އެސޯސިއޭޝަނުގެ އެކްސްކޯގެ ހުރިހާ މެމްބަރުން އިސްތިއުފާދީފި އެވެ.
މިއާއެކު އާ އިންތިހާބެއް ބާއްވާނެ ތާރީހެއް އަދި އިއުލާނު ނުކުރެ އެވެ. އަދި ފީފާ އާއި އޭއެފްސީން ވެސް މެލޭޝިޔާގެ ފުޓްބޯޅަ އެސޯސިއޭޝަން އިންޓަރިމް ހާލަތަކަށް ގެންނާނެކަން ކަށަވަރުކޮށްނުދެ އެވެ. ބުދަ ދުވަހު މެލޭޝިޔާގެ އެފްއޭގެ ވަގުތީ ރައީސް މުހައްމަދު ޔޫސުފް މަހާދީ ވިދާޅުވީ އައު އިންތިހާބު ބާއްވަން ކުރަންޖެހޭ މަސައްކަތްތައް ކުރުމަށާއި ދުވަހުން ދުވަހަށް އެސޯސިއޭޝަން ހިންގުމަށް ޖެނެރަލް ސެކްރެޓަރީ ނޫޒް އަޒްމަން ރަހްމާން މަގާމުގައި ހުންނަވާނެ ކަމަށެވެ. އޭނާ އަކީ ގަވާއިދާ ހިލާފަށް ރަޖިސްޓަރ ކުޅުންތެރިންގެ މައްސަލަ ފަޅާ އެރުމުން އެންމެ ފުރަތަމަ ސަސްޕެންޑްކުރި އޮފިޝަލެވެ. ފަހުން އޭނާގެ މަގާމު ވަނީ އިއާދާ ކޮށްފަ އެވެ.
މެލޭޝިޔާގެ އެފްއޭގެ އެކްސްކޯ އިސްތިއުފާދިން އިރު މިހާރުގެ އެކްސްކޯ އިންތިހާބު ކުރީ 2025 ވަނަ އަހަރުން ފެށިގެން ހަތަރު އަހަރު ދުވަހަށެވެ. ބާކީ ތިން އަހަރު އޮއްވައި އެކްސްކޯ އިސްތިއުފާ ދިނުމާ ބެހޭ ގޮތުން މެލޭޝިޔާއިން އެފްއޭއިން ބުނީ މިއީ ހަތް ކުޅުންތެރިންގެ މައްސަލާގައި އާއްމުންގެ އިތުބާރު އަލުން ހޯދުމަށާއި ކަންކަން ވީހާ ވެސް ބޮޑަށް އޮޅުން ފިލުވައިދިނުމަށް ނިންމި ނިންމުމެއް ކަމަށެވެ.
މެލޭޝިޔާގެ އެފްއޭގެ ހުރިހާ އޮފިޝަލުން އިސްތިއުފާ މިދިނީ ހަތް ކުޅުންތެރިންގެ މައްސަލަ ފީފާ އަށް ހުށަހަޅައި ނާކާމިޔާބު ވުމުން ކުޅިވަރުގެ މައްސަލަތައް ނިންމާ އެންމެ މަތީ ކޯޓު ކަމަށްވާ އިންޓަނޭޝަނަލް ކޯޓް އޮފް އާބިޓްރޭޝަން (ކާސް) އަށް މައްސަލަ ހުށަހަޅައިގެން ވެސް ކާމިޔާބު ނުވުމުންނެވެ. މީގެ ދެ ދުވަސް ކުރިން ކާސް ވަނީ މި މައްސަލާގައި ފީފާގެ ނިންމުން ބަލައިގަންނަ ކަމަށް ބުނެފަ އެވެ.
މެލޭޝިޔާގެ ކުޅުންތެރިންގެ ގޮތުގައި ރަޖިސްޓަރީކޮށް ކުޅުވި ހަތް ކުޅުންތެރިންގެ ތެރޭގައި ހިމެނެނީ ސްޕޭނުގެ ތިން ކުޅުންތެރިއަކާއި އާޖެންޓީނާގެ ދެ ކުޅުންތެރިންނާއި ނެދަލޭންޑްސް އަދި ބްރެޒިލްގެ ކުޅުންތެރިއެކެވެ. މެލޭޝިޔާއިން ބުނަނީ މި ކުޅުންތެރިންގެ ކާފަމެން ނިސްބަތްވަނީ އެ ގައުމަށް ކަމަށެވެ. ނަމަވެސް ފީފާއިން ބެލިބެލުމުން މިއިން އެއްވެސް ކަމަކަށް ހެއްކެއް ނުލިބުނެވެ. މިހެންވެ ކުޅުންތެރިން ސަސްޕެންޑްކޮށް މެލޭޝިޔާގެ އެފްއޭ ވަނީ 326000 ޕައުންޑުން ޖޫރިމަނާ ކޮށްފަ އެވެ.