އިރުމަތީ ޤުދުސްގައި ދިރިއުޅޭ ފަލަސްޠީންގެ ރައްޔިތުން ގެދޮރު ދޫކޮށް ދިޔުމަށް އަންގައި، އެތަނަށް އަތްގަދަގަ ކުރުމުގެ މަސައްކަތް ޔަހޫދީން އަނެއްކާވެސް ވަރުގަދަކޮށްފިއެވެ.
އިރުމަތީ ޤުދުސް ޔަހޫދީން އިސްތިޢުމާރުކޮށްފައިވަނީ 1967ވަނަ އަހަރު ޢަރަބިންނާ ދެކޮޅަށް ކުރި ހަނގުރާމައިގައެވެ. އަދި އޭގެ ފަހުން ޔަހޫދީންގެ ނިރުބަވެރި ދައުލަތުން ވަނީ އިރުމަތީ ޤުދުސްއަކީ އެ ޤައުމުގެ ބައެއްގެ ގޮތުގައި ކަނޑައަޅައިފައެވެ. ނަމަވެސް އެއީ ބައިނަލްއަޤްވާމީ މުޖުތަމަޢުން ބަލައިގެންފައިވާ ނިންމުމެއް ނޫނެވެ.
އިރުމަތީ ޤުދުސްގައި ދިރިއުޅޭ ފަލަސްޠީންގެ ބައެއް ރައްޔިތުންނާ ޙަވާލާދީ ރޮއިޓަރސް ނޫހުން ބުނީ، ރަސްމީ ލިޔުމެއް ދައްކައި، ގެދޮރުތައް ހުސްކުރަން އަންގަމުންދާ ކަމަށެވެ.
މިގޮތުން، ޔަހޫދީންގެ ސުޕްރީމް ކޯޓުން ނެރެފައިވާ ޢަމުރެއް ދައްކައި، އަންނަ ރަމަޟާން މަހުގެ ނިޔަލަށް ގެދޮރު ހުސްކުރަން، 30އަށް ވުރެ ގިނަ ފަލަސްޠީންގެ އާއިލާތަކަށް އަންގާފައިވާ ކަމަށް ބުނެފައިވެއެވެ.
މީގެއިތުރުން، ބައެއް ގެދޮރުތައް ގަންނަން ވެސް ބައެއް ޔަހޫދީން ފައިސާގެ ބޮޑު ޢަދަދުތައް ހުށަހަޅަމުންދާ ކަމަށް ވެސް ވަނީ ރިޕޯޓުކޮށްފައެވެ.
ނަމަވެސް، އެ ސަރަޙައްދުގައި ދިރިއުޅޭ ފަލަސްޠީންގެ ގިނަ އާއިލާތަކުން ދަނީ ގެދޮރު ދޫކޮށް ދިޔުމަށް އިންކާރު ކުރަމުންނެވެ.
އިރުމަތީ ޤުދުސްއަކީ މުސްތަޤްބަލުގައި އުފައްދާ ފަލަސްޠީނުގެ މިނިވަން ދަޢުލަތުގެ ވެރިރަށުގެ ގޮތުގައި ކަނޑައަޅާފައިވާ ސަރަޙައްދެކެވެ.
ނަމަވެސް އެކަމަށް ހުރަސްއެޅުމަށް، ޔަހޫދީން ވަނީ ތަކުރާރުކޮށް އިރުމަތީ ޤުދުސްގައި ދިރިއުޅޭ ފަލަސްޠީންގެ ރައްޔިތުންގެ ބިންތައް ފޭރި އެ މީހުންގެ ގެދޮރުން ނެރެ އިމާރާތްތައް ސުންނާފަތިކޮށްފައެވެ.