ވެލިދޫގައި ސީ އެމްބިއުލާންސްގެ ޚިދުމަތް ފަށައިފި

ނ. ވެލިދޫގައި ސީ އެމްބިއުލާންސްގެ ޚިދުމަތް ފަށައިފިއެވެ.

މިދިޔަ އަހަރުގެ ޖުލައި މަހުގެ 23 ވަނަ ދުވަހު ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ނ. ވެލިދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ވަނީ، 2026 ވަނަ އަހަރުގެ ޖަނަވަރީ މަހުން ފެށިގެން، އެރަށަށް ޚާއްޞަކޮށް ސީ އެމްއެމްބިއުލާންސްގެ ހިދުމަތް ޤާއިމްކޮށްދޭނެ ކަމަށް ވިދާޅުވެފައެވެ.

ނ.އަތޮޅުގައި މިހާރު ސީ އެމްބިއުލާންސް ޚިދުމަތް ދެނީ، ނ. މަނަދޫގައި އޮތް ސީ އެމްބިއުލާންސްއިންނެވެ. އެ އެމްބިއުލާންސްއިން ބައެއް ޙާލަތްތަކުގައި މާލެއަށްވެސް ބަލި މީހުން އުފުލަން ޖެހޭތީ ދަތިތަކާއި ދަނީ ކުރިމަތިވަމުންނެވެ. ނަމަވެސް ވެލިދޫގައި ސީ އެމްބިއުލާންސްގެ ޚިދުމަތް ފެށުމާއެކު، އަތޮޅު ތެރޭގައި ބަލި މީހުން އުފުލުމުގައި މިހާރު ދިމާވާ ދަތިތަކަށް ވަރަށް ބޮޑު ޙައްލެއް ލިބިގެންދާނެ ކަމަށް ދިފާޢީ ވުޒާރާއިން ވިދާޅުވެއެވެ. މީގެ އިތުރުން ނ. އަތޮޅަކީ، ފަތުރުވެރިކަމުގެ ސިނާޢަތް ވަރަށް ބޮޑަށް ކުރިއަރާފައިވާ އަތޮޅެއްކަމުން، އެސަރަހައްދުގައި ވަކިން ޚާއްޞަކޮށް ވެލިދޫގައި ސީ އެމްބިއުލާންސްގެ ޚިދުމަތް ޤާއިމްވެގެން ދިއުމަކީ، އެ އަތޮޅުގައި ދޭ ޞިއްޙީ ޚިދުމަތްތައް އިތުރަށް ހަރުދަނާވެ، ފަތުރުވެރިކަމާ އެހެނިހެން އިޤްތިސާދީ ތަރައްޤީތައް ގެނައުމަށް ލިބިގެންދާނެ ވަރަށް ބޮޑުފަސޭހައަކަށް ވާނެއެވެ.

ވެލިދޫގައި ސީ އެމްބިއުލާންސްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ދިފާއީ ވަޒީރުގެ ނައިބު ފާޠިމަތު މިޒުނާ ޢަލީ ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ވެލިދޫގައި މި ޚިދުމަތް ޤާއިމްކުރުމަށްޓަކައި ވަގުތުން މަސައްކަތް ފައްޓަވާ އެވުޒާރާއަށް ބޭނުންވާ އެހީތެރިކަން ރައީސް ދެއްވި ކަމަށެވެ. އަދި ވެލިދޫއަކީ، ފަތުރުވެރި ކަމުގައި ކުރިއަރާފައިވާ ރަށަކަށް ވުމުން ސީއެމްބިއުލާންގެ ޚިދުމަތް ޤާއިމްވުމަކީ، ޞިއްޙީ ދާއިރާގެ އިތުރަށް އެ ސަރަޙައްދުގެ އިޤްތިޞާދީ މަސައްކަތްތަކަށްވެސް ވަރުގަދަ އައްޑަނައަކަށް ވާނެ ކަމަށެވެ. މިޒުނާ ވިދާޅުވީ، ސިއްޙީ ރައްކާތެރިކަމާއި އަވަސް ފަރުވާގެ ނިޒާމެއް އޮތުމަކީ ވިޔަފާރިވެރިންނަށް އިންވެސްޓަރުންގެ މެދުގައި އިތުބާރު ބޮޑުވެ، އެތައް ބަޔަކަށް ލިބޭނެ ބޮޑު ހިތްހަމަޖެހުމެއް ކަމަށެވެ.

"މި ޚިދުމަތުގެ ފައިދާ މުޅި ނ. އަތޮޅަށް ފުޅާވެގެންދާނެ. މިއީ، އަތޮޅުގެ ޞިއްޙީ ނިޒާމަށް ލިބުނު އިންޤިލާބީ ބަދަލަކަށްވާތީ މަނަދޫގައި ހުންނަ ހޮސްޕިޓަލުގައި އައިސީޔޫގެ ޚިދުމަތް ޤާއިމްވެފައިވުމާއި، ލަންދޫ ފަދަ ރަށްރަށުގައި ޞިއްޙީ މަރުކަޒުތައް 24 ގަޑިއިރަށް ބަދަލުކޮށްފައިވާއިރު، މި ސީ އެމްބިއުލާންސްއަކީ މި ހުރިހާ ޚިދުމަތެއް އެކަކު އަނެކަކަށް ގުޅުވާލަދޭނެ ވަރަށް މުހިއްމު ބޮޅެއް." ދިފާއީ ވަޒީރުގެ ނައިބު ފާޠިމަތު މިޒުނާ ޢަލީ ވިދާޅުވިއެވެ.

ދިފާޢީ ވުޒާރާއިން ވިދާޅުވީ، މިއަހަރުގެ ތެރޭގައި ދިވެހި ދަޢުލަތުން ޚަރަދު ކުރައްވައިގެން މުޅިން އައު 9 ސީއެމްއެމްބިއުލާންސް ހޯއްދަވާ އަތޮޅުތެރޭގެ 9 ރަށެއްގައި މުޅިން އަލަށް ސީއެމްބިއުލާންސްގެ ޚިދުމަތް ޤާއިމްކުރުމަށް ހަމަޖެހިފައިވާ ކަމަށެވެ. އަދި މިހާރު ޚިދުމަތް މެދުކެނޑިފައިވާ 3 ރަށެއްގައި އަލުން ސީއެމްބިއުލާންސްގެ ޚިދުމަށް ފަށާނެ ކަމަށެވެ. އެ ވުޒާރާއިން ވިދާޅުވީ، އަލަށް ސީއެމްބިއުލާންގެ ޚިދުމަތް ފޯރުކޮށްދޭން ފެށުމުގެ އިތުރުން މިހާރު ބޭނުންކުރާ ސީއެމްބިއުލާންސް ފްލީޓް އަޕްގްރޭޑް ކުރުމުގެ މަސައްކަތްތައްވެސް ކުރަމުންދާ ކަމަށެވެ.