އޭނާގެ ކުރީގެ ކޯޗު އަދި މިރޭ ރެއާލް މެޑްރިޑާ ދެކޮޅަށް ނުކުންނަ ޕޯޗުގަލްގެ ބެންފީކާގެ ކޯޗު ހޯސޭ މޮރީނިއޯ، އޭނާއާ ބެހޭ ގޮތުން ދެއްކި ރަނގަޅު ވާހަކަތަކަށް ރެއާލްގެ ކޯޗު އަލްވާރޯ އާބެލޯއާ ޝުކުރު އަދާކޮށްފި އެވެ.
ޗެމްޕިއަންސް ލީގުގައި ރެއާލް އާއި ބެންފީކާ ކުރިމަތިލާ މެޗަކީ ވާދަވެރި ކޯޗުންގެ ގޮތުގައި މޮރީނިއޯ އާއި އާބެލޯއާ ފުރަތަމަ ބައްދަލުވުމެވެ. އާބެލޯއާ އަކީ މޮރީނިއޯގެ ކޯޗުކަމުގައި ރެއާލް އަށް ކުޅުނު ދިފާއީ ކުޅުންތެރިއެކެވެ. މެޗުގެ ކުރިން ނޫސްވެރިން އެންމެ ގިނައިން ސުވާލު ކުރީ ވެސް މިކަމާ ބެހޭ ގޮތުންނެވެ.
"އޭނާ އަކީ އަހަރެންގެ ކުރީގެ ކުޅުންތެރިއެއް. އަހަރެން ވަރަށް ގަޔާވި ކުޅުންތެރިއެއް އެއީ. އޭނާ އަކީ އެންމެ މޮޅު މީހާ އަށް ނުވެދާނެ. އެކަމަކު އޭނާ އަކީ ރެއާލް މެޑްރިޑުގައި ހުރި އެންމެ ރަނގަޅު މީހާ. އޭނާ އަކީ ވަރަށް ބަރާބަރު ޝަހުސިއްޔަތެއް،" މޮރީނިއޯ ބުންޏެވެ.
ރެއާލްގެ ކޯޗުކަން އާބެލޯއާ އަށް ލިބުމުން އޭނާއަށް ގުޅައި މަރުހަބާ ނުކިޔާ ކަމަށް ވެސް މޮރީނިއޯ ބުންޏެވެ. ސަބަބުތައް ވެސް ބުނެދިނެވެ.
"ބައެއް ފަހަރު އެހެން ވެދާނެ. އެއީ އަހަރެންގެ އެއް ފޯނު އޮންނާނީ ހަމައެކަނި އަހަރެންގެ ކުލަބުގެ މީހުންނާއި އާއިލާގެ މީހުންނަށް ހާއްސަކޮށްފައި. އަނެއް ފޯނު ނަންބަރު ވަރަށް އަވަހަށް ބަދަލުވާނެ. އެހެންވީމާ އަހަރެން އަތުން ބައެއް ފަހަރު މީހުންގެ ނަންބަރު ވަރަށް ފަސޭހައިން ގެއްލޭ. އަދި އެހެން މީހުންނަށް ވެސް އަހަރެންގެ ނަންބަރު ގެއްލޭ. ދެން އޭނާ އަށް ގުޅައި މަރުހަބާ ނުކިޔަސް އަހަރެން އޭނާއާ މެދު ދެކޭނެ ގޮތް އޭނާ އަށް އެނގޭނެ،" މޮރީނިއޯ ބުންޏެވެ.
މެޗުގެ ކުރިން އާބެލޯއާ ވަނީ މޮރީނިއޯގެ ވާހަކަތަކަށް ޝުކުރު އަދާ ކޮށްފަ އެވެ. އަދި ބުނީ މޮރީނިއޯ އަކީ އޭނާގެ ކެރިއަރުގައި ވަރަށް މުހިންމު މީހެއް ކަމަށެވެ.
"ހަމައެކަނި ދަނޑުމަތީގައި އެކަންޏެއް ނޫން. ދަނޑު ބޭރުގައި ވެސްމެ. އަހަރުމެން ދެ މީހުންކީ މިހާރު ރަހުމަތްތެރިން. އަހަރެން މިހުރީ މާދަމާ (މިރޭ) އޭނާއާ ބައްދަލުކުރަން ކެތްމަދުވެފައި. އަދި އޭނާގެ ގައިގައި ބައްދާލަން ބޭނުން،" ޒަބީ އަލޮންސޯ ވަކިވުމުން ސީޒަނުގެ މެދުތެރެއިން ކޯޗުކަން ލިބުނު އާބެލޯއާ ބުންޏެވެ.
ވާދަވެރި މެޗަކަށް މޮރީނިއޯއާ ދެކޮޅަށް ނުކުންނައިރު އެއީ ކާކުކަމާއި ކިހާވަރެއްގެ މޮޅު ކޯޗެއްކަން ވަރަށް ރަނގަޅަށް އެނގޭ ކަމަށް ވެސް އާބެލޯއާ ބުންޏެވެ.
"އޭނާ އަކީ ވަރަށް ވާދަވެރި މީހެއް. އޭނާ އަކީ ވަރަށް ވަރުގަދަ ލީޑަރެއް. އޭނާ މޮޅުވާނެ ގޮތް ހޯދާނެ. އޭނާގެ ޓީމަކާ ދެކޮޅަށް ކުޅުމަކީ ފަސޭހަ ކަމެއް ނޫން. އަދި އެ މީހުން އެއޮތީ މި މެޗަށް ނުކުންނައިރު މޮޅުވާން ޖެހިފައި. މޮރީނިއޯ އަކީ އަހަރެންނަށް ވަރަށް ގިނަ ގޮތްގޮތުން އިތުބާރު ދިން ކޯޗެއް. އަހަރެން ދޮގު ހަދާކަށް ނެތިން. އަހަރެންނާއި އޭނާއާ އަބަދުވެސް ގުޅުން އޮވޭ. އޭނާ ފޯނު ނަންބަރު އަވަސް އަވަހަށް ބަދަލު ކުރަނީ ކީއްވެކަން ވެސް އެނގޭ. އޭނާއަށް އަހަރެން ތިނެއް ޖަހާއިރު ޖަހާއިރު ގުޅައިފިނަމަ ޔަގީނުން ވެސް ފޯނު ނަގާނެ. އެފަދަ މީހެއް އެއީ،" އާބެލޯއާ ބުންޏެވެ.
މި މެޗަށް ނުކުންނައިރު މޮރީނިއޯގެ ޓީމު އޮތީ ޗެމްޕިއަންސް ލީގުގެ 29 ވަނާގަ އެވެ. އެއީ ހަތް މެޗުން ހަ ޕޮއިންޓާއެކުގަ އެވެ. މިހެންވެ ދެ ވަނަ ބުރަށް ދިއުމަށް ޕްލޭއޯފް ކުޅެން ފުރުސަތު ހޯދުމަށް ރެއާލް ބަލިކުރަން ޖެހޭނެ އެވެ. ރެއާލް މެޑްރިޑް އޮތީ ހަތް މެޗުން 15 ޕޮއިންޓާއެކު ޓޭބަލުގެ ތިން ވަނާގަ އެވެ.