އިންޑިޔާ އާއި ސްރީލަންކާގައި އަންނަ މަހު ފަށާ ޓުވެންޓީ20 ކްރިކެޓް މުބާރާތް ކަވަރު ކުރަން ބަނގްލަދޭޝްގެ ނޫސްވެރިންނަށް ފުރުސަތު ނުލިބޭނެ ކަމުގެ އިޝާރާތެއް އިންޓަނޭޝަނަލް ކްރިކެޓް ކައުންސިލް (އައިސީސީ) އިން ދީފި އެވެ.
ބަނގްލަދޭޝްގެ ކްރިކެޓް ބޯޑުން ބުނީ އެ ގައުމުން މުބާރާތް ކަވަރު ކުރަން 130 އާއި 150 ދެމެދުގެ ނޫސްވެރިން ފޯމު ހުށަހެޅި ކަމަށެވެ. ނަމަވެސް މީގެ ތެރެއިން ވަރަށް ގިނަ ނޫސްވެރިންގެ ފޯމު ބަލައިނުގަންނަން އައިސިސީން ވަނީ ނިންމާފަ އެވެ. ބައެއް މީޑިއާތަކުން ބުނަނީ އައިސީސީން މިހާތަނަށް ހުއްދަ ދީފައިވަނީ ބަނގްލަދޭޝްގެ ވަރަށް މަދު ފޮޓޯ ގްރާފަރަކަށް ކަމަށެވެ.
މި މައްސަލަ ކުރިމަތިމިވީ މުބާރާތް ބާއްވާ އެއް ގައުމު ކަމަށްވާ އިންޑިޔާއާ މެދު ހިތްހަމަ ނުޖެހިގެން ބަނގްލަދޭޝް މުބާރާތުން ވަކިވެފައިވަނިކޮށެވެ. އެ ޖާގަ މިހާރު ދީފައިވަނީ ސްކޮޓްލޭންޑަށެވެ.
ނޫސްވެރިންގެ މައްސަލާގައި އައިސީސީން މިހާތަނަށް ބުނެފައިވަނީ ކޮންމެ ގައުމަކަށް ވެސް ޖާގަ ދޭނީ ވަކި ވަރަކަށް ކަމަށާއި މި ގޮތުން މުބާރާތް ކުޅޭ ކޮންމެ ގައުމަކަށް 40 ނޫސްވެރިންގެ ޖާގަ ދިނުމަށް މަސައްކަތް ކުރާ ކަމަށެވެ. އެނޫން ގައުމުތަކަށް ފުރުސަތު ލިބޭނީ ފަހުން ކަމަށެވެ.
ޓުވެންޓީ20 ކްރިކެޓް މުބާރާތުން ބަނގްލަދޭޝް ވަކިވީ އިންޑިޔާގެ ބަދަލުގައި ބަނގްލަދޭޝްގެ މެޗުތައް ލަންކާ އަށް ބަދަލުކޮށްދިނުމަށް އެ ގައުމުން އެދުމުން އެކަމަށް އައިސީސީން ދެކޮޅު ހެދުމުންނެވެ. ލަންކާ އަށް މެޗުތައް ބަދަލުކޮށްދޭން ބަނގްލަދޭޝް އެދުނީ އިންޑިޔާގައި ބަނގްލަދޭޝްގެ ކުޅުންތެރިންނާއި އޮފިޝަލުންގެ ސަލާމަތާއި ރައްކާތެރިކަން ކަށަވަރުނުވާ ކަމަށް ބުނެ އެވެ. އެ ގައުމުން މިހެން ބުނީ އިންޑިޔާގެ އައިޕީއެލްގައި ކުޅުވަން ގެންދިޔަ ބަނގްލަދޭޝްގެ ކުޅުންތެރިއަކަށް މަޖުބޫރުކޮށް އިންޑިޔާއިން ފޮނުވާލާފައިވާތީ އެވެ. މިއީ އިންޑިޔާގެ ހިންދޫގެ އަމަލެއް ކަމަށް ވެސް ބަނގްލަދޭޝް ބުނެ އެވެ.
އައިސިސީގެ މި ނިންމުމާމެދު ޕާކިސްތާން ވެސް ހިތްހަމަ ނުޖެހެ އެވެ. މިހެންވެ އެ ގައުމުން ވިސްނަމުންދަނީ އިންޑިއާ ދެކޮޅަށް ކުޅެން ޖެހޭ މެޗު ބޮއިކޮޓް ކުރުމަށެވެ.