ފުޓްސަލް ޓީމުގެ ކާމިޔާބީ އުމެއިރު ޚާއްސަކުރީ ނިޔާވެފައިވާ 3 ފަރާތަކަށް

ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕުގެ ރަން ކާމިޔާބީއާއެކު، ޤައުމީ ޓީމުގެ މެނޭޖަރު މުޙައްމަދު އުމެއިރު، މިހާރު ދުނިޔެ ދޫކޮށްފައިވާ އޭނާއަށް ވަރަށް މުހިންމު ތިން ފަރާތަކަށް މި ކާމިޔާބީ ޙާއްސަ ކޮށްފިއެވެ.

ފުޓުބޯޅައިގައި ވެސް ރާއްޖެއިން ފުރަތަމަ ފަހަރަށް ރަން ކާމިޔާބީ ހޯދި ފަހަރު، 2008 ވަނަ އަހަރުގެ ސާފް ޗެމްޕިއަންޝިޕް ހޯދިއިރު ޤައުމީ ފުޓުބޯޅަ ޓީމުގައި ވެސް މުހިންމު ދައުރެއް އަދާކުރި އުމެއިރު، ފުޓްސަލްއިން ރާއްޖެއިން ފުރަތަމަ ހޯދި ރަން ކާމިޔާބީ ޚާއްސަކުރީ އޭނާއާއެކު ފުޓުބޯޅަ ކެރިއަރުގައި މުހިންމު ދައުރެއް އަދާކުރި ދިވެހި ފުޓުބޯޅައިގެ ތިން ޝަހުސިއްޔަތަކަށެވެ.

ރާއްޖެއިން ފުޓްސަލްގައި ހޯދި ފުރަތަމަ ރަން މެޑަލް ކަރުގައި އަޅުވައިގެން ހުރެ ނަގާފައިވާ ފޮޓޯއެއް އުމެއިރު މީސްމީޑިއާގައި ހިއްސާކުރިއިރު، އޭނާގެ ކުރިމަތީގައި ޤައުމީ ފުޓްސަލް ޓީމުގެ ތިން ޖާޒީއެއް އޮތެވެ. އެ ތިން ޖާޒީގައި ވަނީ، އުމެއިރުގެ މި ކާމިޔާބީ ޚާއްސަކޮށްފައިވާ ތިން ޝަހުސިއްޔަތުގެ ނަމެވެ.

އެއީ އުމެއިރުގެ ފުޓުބޯޅަ ކެރިއަރުގެ ފެށުމުގެ ތެރެއިން ބޮޑު އެހީތެރިކަމެއް ދިން ތަޖުރިބާކާރު ކޯޗު އިހުސާން ޢަބްދުލްޣަނީ (ސާންތީ) އާއި، ގައުމީ ޓީމާއި ކުލަބް ލެވެލްގައި އެއްކޮށް ކުޅުނު މުޙައްމަދު އާރިފް (ބަކާ) ގެ އިތުރުން އުމެއިރާއެކު ގައުމީ ޓީމަށް ކުޅުނު ގޯލްކީޕަރު އިފްރާހު އަރީފް (އިފްރާ) ގެ ނަމެވެ.

މި ތިން ފަރާތަކީ ވެސް، ފާއިތުވީ ދެތިން އަހަރުގެ ތެރޭގައި، އެކިއެކި ސަބަބުތަކާހުރެ މި ވަގުތީ ދުނިޔެ ދޫކޮށްފައިވާ ތިން ފަރާތެވެ.

މި ތިން ޝަޙްސިޔަތުގެ ހަނދާން އައުކޮށް، މި ކާމިޔާބީ އެ ތިން ފަރާތަށް ޚާއްސަކޮށް ކުރި ޕޯސްޓުގައި އުމެއިރު ބުނެފައި ވަނީ، މި ތިން ނަމަކީ ދުވަހަކު ވެސް ހިތުން ފިލައިގެން ނުދާނެ، ހަނދާނުން ފިލައިގެން ނުދާނެ ތިން ނަން
ކަމަށެވެ.

ކޯޗު އިޙުސާން އަކީ 16 އަހަރުން ދަށުގެ ގައުމީ ޓީމުގައި ކޯޗުކޮށްދީ ޕްރޮފެޝަނަލްކޮށް ފުޓްބޯޅަ ކުޅެވިދާނެ ކަމުގެ ޔަގީންކަން ދިން އެއް ފަރާތްކަން ފާހަގަކޮށް އުމެއިރު ވަނީ އޭނާއަށް ޝުކުރު އަދާކޮށްފައެވެ.

ގައުމީ ޓީމާއެކު އަދި ކްލަބްތަކުގައި ވެސް ވަރަށް އުފާވެރި ވަގުތުތަކެއް އާރިފް (ބަކާ) އާއިއެކު ހޭދަކުރެވުނު ކަމަށާއި އެއީ ބައްދަލުވި އެންމެ ހިތްހެޔޮ މީހުންގެ ތެރެއިން އެކަކުކަން ފާހަގަކޮށް އުމެއިރު ވަނީ، މިއަދު ދުނިޔޭގައި ނެތް ނަމަވެސް، ދުނިޔޭގައި ހުރެ، އެކުގައި އުޅެ، ދިން ހަނދާންތަކަށް ޝުކުރު އަދާކޮށްފައެވެ.

މީގެއިތުރުން، 15 އަހަރުން ފެށިގެން އިފްރާހު އަރީފް (އިފްރާ) އާއިއެކުގައި އުޅުނު ކަމަށާއި ބޮޑެތި ހުވަފެންތަކެއް އެކުގައި ދެކުނުކަމަށް އުމެއިރު ބުންޏެވެ. ދެމީހުންގެ މެދުގައި ވަރަށް ގާތް ރަހުމަތްތެރިކަމެއް އުފެދިގެންދިޔަކަން ފާޙަގަކޮށް، އިފްރާހު އަކީ ހަމަ ހަގީގަތުގައި ވެސް ތަފާތު މީހެއްކަމަށް އުމެއިރު ދޫކޮށްލި އަސަރުން ފުރިފައިވާ މެސެޖުގައި ބުނެފައިވެއެވެ.

މި ތިން ފަރާތަކީ ވެސް ރާއްޖެއަށް 2008 ގެ ސާފް ޗެމްޕިއަންޝިޕް ހޯދިއިރު ޓީމުގައި މުހިންމު ދައުރެއް އަދާކުރި ފަރާތްތަކަކަށްވާއިރު، އަބަދުވެސް އެ ހަނދާންތައް އެކުގައިވާނެ ކަމަށް އުމެއިރު ބުނެފައިވެއެވެ.

ފާހަގަކޮށްލަން ޖެހޭ ގޮތުގައި އުމެއިރަކީ ފުޓުބޯޅައާއި ފުޓްސަލްގައި ރާއްޖެއިން ހޯދި ފުރަތަމަ ރަން މެޑަލް ހޯދުމުގައި ހިއްސާވާ ހަމައެކަނި ޝަހުސިއްޔަތެވެ. ފުރަތަމަ ފަހަރަށް ފުޓްސަލްގެ ތަށި އުފުލައިލައި މި ރަން ކާމިޔާބީ ހޯދައިދިން ޓީމުގެ މެނޭޖަރުކަން ފުރިހަމައަށް އަދާކޮށް، މި ކާމިޔާބީ ކޯޗު އިހުސާން އާއި، އިފްރާހު (އިފްރާ) އާއި އާރިފް (ބަކާ) އަށް އުމެއިރު ޚާއްސަކުރިއިރު، ކޯޗު ނިޔާވީ ކެންސަރަށް ފަރުވާ ހޯދަމުން ދަނިކޮށެވެ. އިފްރާހު ނިޔާވީ ސްޓްރޯކެއް ޖެހިގެންނެވެ. އަދި އާރިފް ވަކިވެދިޔައީ، ހައްޖުގެ މާތް އަޅުކަން އަދާކޮށް އެނބުރި އައިތާ ދުވަސްކޮޅެއްގެ ތެރޭގައި ބަލިވެ އުޅެނިކޮށެެވެ.