ދިރާސީ އައު އަހަރު ފަށައިިފި، ސަރުކާރު ސްކޫލްތަކުގައި 77000އަށްވުރެ ގިނަ ދަރިވަރުން

މަސްދުވަހުގެ ޗުއްޓީއަކަށް ފަހު ދިރާސީ އައު އަހަރުގެ ކިޔެވުން މިއަދު ފަށައިފިއެވެ. މިއަދަކީ އަހަރުތަކަކަށް ފަހު ޖަނަވަރީ މަހު ދިރާސީ އަހަރުގެ ކިޔެވުން ފެށި އަހަރުކަން ފާހަގަކޮށްލެވެއެވެ.

ދިރާސީ އަހަރުގެ ކިޔެވުން މިއަދު ފެށިއިރު ސަރުކާރުގެ 218 އެއްހާ ސްކޫލްގައި 77000އަށްވުރެ ގިނަ ދަރިވަރުން ތަޢުލީމް ހާސިލްކުރަމުން ދާނެއެވެ. އެހެން އަހަރުތަކެކޭ އެއްގޮތަށް މިއަހަރު ގްރޭޑް 1 އަށް ގިނަ އަދަދެއްގެ ދަރިވަރުން ވަނީ ވައްދާފައެވެ. ގްރޭޑް 1 އަށް ވަނުމަށްޓަކައި 4790 ދަރިވަރުންނަށް އެކި ސްކޫލްތަކުން ޖާގަ ދީފައިވެއެވެ. އޭގެ ތެރޭގައި މާލެ ސަރަހައްދުގެ ސްކޫލްތަކުގެ ގްރޭޑް 1 އަށް 1748 ދަރިވަރުން ވައްދާފައިވެއެވެ. އަދި އަތޮޅުތެރޭގެ ސްކޫލްތަކުންވެސް ގްރޭޑް 1 އަށް 3042 ދަރިވަރަކަށް ވަނީ ޖާގަ ދީފައެވެ.

އަތޮޅުތަކުން މާލޭގެ ސްކޫލްތަކަށް މިއަހަރު 1530 ދަރިވަރަކު ބަދަލުވުމަށް އެދުނެވެ. އޭގެ އިތުރުން މާލެއިން ހުޅުމާލޭގެ ސްކޫލްތަކަށް 836 ދަރިވަރުންވެސް ވަނީ ބަދަލުވެފައެވެ. ދިރާސީ އަހަރުގެ ކިޔެވުން ފެށިއިރު ދަރިވަރުންނަށް އުނގަންނައިދިނުމަށް ސަރުކާރުގެ ސްކޫލްތަކުގައި 10500 މުދައްރިސުން ހަރަކާތްތެރިވާނެއެވެ. އޭގެ ތެރޭގައި ހިމެނެނީ 8000 ދިވެހި މުދައްރިސުންނާއި ބިދޭސީ 2500 މުދައްރިސުންނެވެ.

ދިރާސީ އަހަރުގެ ކިޔެވުމާއެކު ހުޅުމާލެ ދެވަނަ ފިޔަވަހީގައި ވަނީ ދާއިމީ އިތުރު ސްކޫލެއްވެސް ހުޅުވާފައެވެ. ގްރޭޑް 1 އިން ފެށިގެން 10 އާ ހަމައަށް ކިޔަވައިދޭ މި ސްކޫލުން 1900އަށް ވުރެ ގިނަ ދަރިވަރުންނަށް ވަނީ ޖާގަ ދީފައެވެ. އަދި އެ ސްކޫލްގައި 230 މުދައްރިސުން މަސައްކަތް ކުރާނެއެވެ.

ދިރާސީ އަހަރު ކިޔެވުން ފެށުމަށް ތަޢުލީމީ ވުޒާރާއިން ވަނީ ދުރާލާ ތައްޔާރުވާން ފަށާފައެވެ. ޚާއްސަކޮށް ދަރިވަރުންނަށް ބޭނުންވާ ޓެކްސްޓް ފޮތްތައް ސްކޫލްތަކަށް ފޮނުވުމުގެ މަސައްކަތް މިދިޔަ ޑިސެންބަރު މަހުގެ ތެރޭގައި ވަނީ ފަށާފައެވެ. މީގެ އިތުރުން މުދައްރިސުން ހަމަކުރުމުގެ މަސައްކަތްވެސް ކުރައްވާފައިވާކަން ފާހަގަކޮށްލެވެއެވެ. އަދި ސްކޫލްތަކުގެ އުމްރާނީ ތަރައްޤީއަށްވެސް ގިނަ މަސައްކަތްތަކެއް ވަނީ ކުރައްވާފައެވެ. އޭގެ ތެރޭގައި ސްކޫލްތަކުގެ އާބާތުރަ ފިލުވުމުގެ މަސައްކަތްތައް ހިމެނެއެވެ.

މިއަހަރުގެ ދިރާސީ ކަލަންޑަރަށް ބަލާއިރު މި ފެށޭ ރަމަޟާންމަހުގެ ފުރަތަމަ ހަފްތާގައި ކިޔަވައިދިނުމަށްފަހު ދަރިވަރުންނަށް ސްކޫލް ބަންދުވާނެއެވެ. އަދި ފިޠުރު އީދު ބަންދަށް ފަހު އަލުން ކިޔެވުން ފަށާނީ މާޗްމަހުގެ 23 ވަނަ ދުވަހުއެވެ. ފުރަތަމަ ޓާމްގެ ކިޔެވުން ނިމުމަށްފަހު ދަރިވަރުންނަށް ބަންދުވާނީ ޖުލައި މަހުގެ 14 ވަނަ ދުވަހުން ފެށިގެން އޮގަސްޓް މަހުގެ ފުރަތަމަ ދުވަހާހަމައަށެވެ. އަދި ދެވަނަ ޓާމުގެ ކިޔެވުން އޯގަސްޓްމަހުގެ 2 ވަނަ ދުވަހު ފަށާއިރު އަހަރުގެ ކިޔެވުން ނިންމާ ދަރިވަރުންނަށް ބޮޑު ޗުއްޓީ ލިބޭނީ 18 ޑިސެންބަރުން 12 ޖަނަވަރީ 2027އާ ހަމައަށެވެ.